“சார், நாம குடும்பம்” - வெங்கட் பிரபுவுக்கு சிவகார்த்திகேயன் பதில்

சிவகார்த்திகேயன் குறித்து கங்கை அமரன் பேசியது சர்ச்சையான நிலையில், வெங்கட் பிரபுவின் விளக்கத்துக்கு சிவகார்த்திகேயன் பதிலளித்துள்ளார்.

சிவகார்த்திகேயன் , வெங்கட் பிரபு

Source : X

சிவகார்த்திகேயன் குறித்து கங்கை அமரன் பேசிய கருத்து சமூக வலைதளங்களில் பேசுபொருளான நிலையில், அதற்கு வெங்கட் பிரபு விளக்கம் அளித்திருந்தார். இந்நிலையில், வெங்கட் பிரபுவின் விளக்கத்துக்கு நடிகர் சிவகார்த்திகேயன் பதிலளித்துள்ளார்.

பராசக்தி திரைப்படத்தைத் தொடர்ந்து இயக்குநர் வெங்கட் பிரபு இயக்கத்தில் சிவகார்த்திகேயன் சைன்ஸ் ஃபிக்‌ஷன் திரைப்படத்தில் நடிக்க இருந்தார். வெங்கட் பிரபு இந்த தகவலை அவரே பல முறை உறுதிபடுத்தி இருந்தார். சத்யஜோதி ஃபிலிம்ஸ் இந்த படத்தை தயாரிக்க இருந்தது. ஆனால் இந்த படம் கைவிடப்பட்டதாக சமீபத்தில் தெரியவந்தது. இதற்கான காரணம் குறித்து பல்வேறு காரணங்கள் விவாதிக்கப்பட்டன. குறிப்பாக சமீபத்தில் வெங்கட் பிரபுவின் தந்தை கங்கை அமரன் சிவகார்த்திகேயன் தனது மகனை தவிர்த்ததால் அந்த படத்தை அவர் இயக்கவில்லை என்று தெரிவித்தது பெரியளவில் சர்ச்சையை ஏற்படுத்தியது. 

கங்கை அமரன் சொன்னது என்ன?

இதற்கிடையே கங்கை அமரன் அளித்த பேட்டி ஒன்றில், கங்கை அமரன், வெங்கட் பிரபு ஒரு முன்னணி நடிகரை வைத்து படம் இயக்கத் திட்டமிட்டிருந்ததாகவும், அந்த நடிகர் முதலில் கால்ஷீட் கொடுத்துவிட்டு பின்னர் வேறு படங்களில் நடிக்கச் சென்றதாகவும் கூறியிருந்தார். மேலும், அந்த நடிகர் வெங்கட் பிரபுவை தவிர்ப்பதாகத் தெரிந்ததால், அவரை வைத்து படம் எடுக்க வேண்டாம் என வெங்கட் பிரபுவிடம் தான் கூறியதாகவும் கங்கை அமரன் தெரிவித்திருந்தார். அவரது பேச்சு பெரியளவில் பேசுபொருளாகவே இயக்குநர் வெங்கட் பிரபு தனது எக்ஸ் பக்கத்தில் இது குறித்து விளக்கமளித்தார் 

வெங்கட் பிரபு விளக்கம் 

சிவகார்த்திகேயனுக்கும் தனக்கும் இடையே எந்த பிரச்னையும் இல்லை என்றும், அவர் தனக்கு நெருக்கமானவர் என்றும் தெரிவித்திருந்தார். மேலும், சிவகார்த்திகேயனுடன் இணைந்து பணியாற்றும் வாய்ப்புக்காக காத்திருப்பதாகவும் கூறியிருந்தார்.

சிவகார்த்திகேயன் பதில் 

இதற்கு பதிலளித்துள்ள சிவகார்த்திகேயன், “சார், நாம குடும்பம். இதற்குப் போய் நீங்கள் சீரியஸாக பதில் சொல்லிக்கொண்டிருக்கிறீர்கள்!” என தெரிவித்துள்ளார்.

மேலும், “உங்கள் வாழ்த்துகளுக்கு மிக்க நன்றி சார். உங்களுடைய அடுத்த படத்துக்கும் எனது வாழ்த்துகள்” என குறிப்பிட்டுள்ளார். தொடர்ந்து, “சார், இதை நான் ஏற்கனவே உங்களிடம் சொல்லியிருக்கிறேன். மீண்டும் சொல்கிறேன். நான் எப்போதும் வெங்கட் பிரபுவின் ரசிகனாக இருப்பேன். விரைவில் உங்களுடன் இணைந்து பணியாற்ற காத்திருக்கிறேன்” என சிவகார்த்திகேயன் தெரிவித்துள்ளார்.

Sir, we are family. Idhuku poi neenga serious-ah reply pannitu irukeenga!

Thank you so much for your wishes, sir, and my best wishes for your next project 🤗

Sir, I’ve told you this before, and I’m saying it again - I’ll always be a VP fan. Waiting to collaborate with you… https://t.co/HGxdc876NC

— Sivakarthikeyan (@Siva_Kartikeyan) September 28, 2026