Rajini Kamal Reunion: இணையும் கமல்-ரஜினி; ரெட் ஜெயண்ட் வெளியிட்ட வெயிட்டான அப்டேட்; 45 ஆண்டுகளுக்குப் பின் சம்பவம்

Rajinikanth Kamal Haasan Reunion: தமிழ் திரையுலகில் 45 ஆண்டுகளுக்குப் பின் ஒரு மிகப்பெரிய சம்பவம் அரங்கேற இருக்கிறது. ஆம், அதற்கான ஒரு அறிவிப்பை ரெட் ஜெயண்ட் தயாரிப்பு நிறுவனம் வெளியிட்டுள்ளது. அது என்ன தெரியுமா.?

கமல்ஹாசன் ரஜினிகாந்த் இணைந்து நடிப்பதாக ரெட் ஜெயண்ட் அறிவிப்பு

Source : Social Media

தமிழ் திரையுலகின் அசைக்க முடியாத இரு துருவங்களாக இருப்பவர்கள், கமல்ஹாசன் மற்றும் ரஜினிகாந்த். ஒருவர் நடிப்பு அரக்கன். ஒருவர் ஸ்டைல் அரக்கன். இவர்கள் இணையும் படம் குறித்துதான் தற்போது அறிவிப்பு வெளியாகியுள்ளது. ரெட் ஜெயண்ட் நிறுவனம் தயாரிக்கும் அந்த படத்தை நெல்சன் இயக்குகிறார். ரெட் ஜெயண்ட்டின் அறிவிப்பு குறித்து இப்போது பார்க்கலாம்.

ரெட் ஜெயண்ட் வெளியிட்ட அசத்தலான அறிவிப்பு

தமிழ் திரையுலகில், நீண்ட காலமாகவே ரஜினிகாந்த்தும் கமல்ஹாசனும் இணைந்து நடிப்பது பற்றி பேச்சுக்கள் இருந்துகொண்டே தான் இருக்கிறது. சரியான கதை கிடைத்தால் இருவரும் சேர்ந்து நடிப்பது குறித்து யோசிக்கலாம் என்று இருவருமே பல சந்தர்ப்பங்களில் தெரிவித்துள்ளனர்.

இந்த நிலையில் தான், தற்போது ரெட் ஜெயண்ட் நிறுவனத்தில் அசத்தலான அறிவிப்பு ஒன்று வெளியாகியுள்ளது. அதன்படி, கமல்ஹாசன் மற்றும் ரஜினிகாந்த் இணைந்து நடிக்க உள்ளனர். இது குறித்த நிறுவனத்தின் அறிவிப்பில், இரு ஜாம்பவான்கள் ஒரு பிரேமில் என்று குறிப்பிட்டு, KHxRK என்று குறிப்பிட்டுள்ளனர். அது கமல்ஹாசன் மற்றும் ரஜினிகாந்த் என்பதுதான். இதன் மூலம், கமல் மற்றும் ரஜினி இணைவது உறுதி செய்யப்பட்டுள்ளது. இது ரெட் ஜெயண்ட் நிறுவனத்தின் 17-வது படமாக தயாரிக்கப்படுகிறது.

Two Legends. One Frame.

Next update at 12:07 tomorrow. ⏳#KHxRK #RedGiant17 ✨ pic.twitter.com/FrAA4MdBMa

— Red Giant Movies (@RedGiantMovies_) February 19, 2026

45 ஆண்டுகளுக்குப் பின் இணையும் கமல்-ரஜினி

திரை உலகில் அசைக்க முடியாத இடத்தை பிடித்திருக்கும் உலக நாயகன் கமல்ஹாசனும், சூப்பர் ஸ்டார் ரஜினிகாந்த்தும், 1975-ம் ஆண்டு வெளியான அபூர்வ ராகங்கள் படத்தில் தான் முதன் முதலாக இணைந்து நடித்தனர். இணைந்து என்று சொல்வதைவிட, ரஜினிகாந்த்திற்கு அது தான் முதல் படம். இந்த படத்தில் கமல்ஹாசன் தான் ஹீரோ.

அதன்பின், அதற்கு அடுத்த வருடமே, அதாவது 1976-ம் ஆண்டு கே. பாலசந்தரின் இயக்கத்தில் வெளியான மூன்று முடிச்சு படத்தில் அவர்கள் இணைந்து நடித்திருந்தனர். இதில் ரஜினிகாந்த் நெகட்டீவ் ஷேடில் நடித்திருப்பார். அதன்பின், 1977-ம் ஆண்டு இருவரும் இரண்டு படங்களில் சேர்ந்து நடித்தனர்.

அந்த படங்கள் ‘அவர்கள்‘ மற்றும் ‘16 வயதினிலே‘. இந்த படங்கள் மிகவும் பேசப்பட்ட படங்களாக அமைந்தன. தொடர்ந்து, 1978-ம் ஆண்டு, இளமை ஊஞ்சலாடுகிறது திரைப்படத்தில் அவர்கள் மீண்டும் இணைந்து நடித்தனர். அதைத் தொடர்ந்து, 1979-ம் ஆண்டு, சூப்பர் டூப்பர் ஹிட் படமான ‘நினைத்தாலே இனிக்கும்‘ படத்தல் இணைந்து நடித்திருந்தனர்.

அதன் பிறகு, 1981-ம் ஆண்டு வெளியான தில்லு முல்லு திரைப்படத்தில் ரஜினிகாந்த் லீட் ரோலில் நடித்திருந்தார். படத்தின் இறுதியில் முக்கியமான கெஸ்ட் ரோலில் கமல்ஹாசன் நடித்திருந்தார். இந்த திரைப்படம் தான் தமிழில் அவர்கள் இணைந்து நடித்த கடைசி படம். அதன் பிறகு, இருவரும் தனித்தனி ஹீரோக்களாக கோலோச்சத் தொடங்கி, இன்று அசைக்க முடியாத இடத்தை பிடித்துள்ளனர்.

தமிழ் மொழியில் 7 படங்களில் மட்டுமே அவர்கள் இணைந்து நடித்திருந்தாலும், மலையாளம், தெலுங்கு, கன்னடம், ஹிந்தி மொழிகளில் சேர்த்து மொத்தம் 21 படங்களில் இணைந்து நடித்துள்ளனர்.

அவர்கள் மீண்டும் இணைய வேண்டும் என்று ரசிகர்கள் நீண்ட காலமாக எதிர்பார்த்திருந்த நிலையில், தற்போது ரெட் ஜெயண்ட் நிறுவனம் அந்த ஆசையை நிறைவேற்றுகிறது.