Premji Amaren: சேலத்து மணமகள்.. கைகூடிய காதல்.. பிரேம்ஜியின் வருங்கால மனைவி பற்றிய தகவல்கள்!

Premji Amaren : நடிகர் பிரேம்ஜிக்கு நாளை திருத்தணி கோயிலில் அவரது நெருங்கிய நண்பர்கள், உறவினர்கள் சூழ திருமணம் நடைபெற உள்ளது.

பிரேம்ஜி அமரன்

தமிழ் திரையுலகின் மிகவும் பிரபலமான பன்முகக் கலைஞரான கங்கை அமரனின் இளைய மகனான நடிகர் பிரேம்ஜியின் திருமணம் குறித்த ஆர்வம் ரசிகர்கள் மத்தியில் அதிகமாக இருந்து வந்தது. இன்னும் பேச்சுலராகவே இருக்கிறாரே என விமர்சிக்கப்பட்டு வந்த நிலையில் தான், திடீரென சில தினங்களுக்கு முன்னர் நடிகர் பிரேம்ஜியின் திருமண அழைப்பிதழ் ஒன்று சோசியல் மீடியாவில் வெளியாகி வைரலாகியது. பிரேம்ஜிக்கு வரும் ஜூன் 9ஆம் தேதி இந்து என்ற பெண்ணுடன் திருத்தணி முருகன் கோயிலில் திருமணம் நடைபெற உள்ளது.
 

 

இதுவரையில் பிரேம்ஜி திருமணம் குறித்து ஆர்வமாக இருந்த ரசிகர்கள் தற்போது அவர் திருமணம் செய்து கொள்ள இருக்கும் மணமகள் குறித்த தகவல்களை அறிந்து கொள்ள மிகவும் ஆர்வமாக இருக்கிறார்கள். அப்படி மணப்பெண் குறித்த சில வதந்திகளும் சோசியல் மீடியாவில் மிகவும் வைரலாகி வந்தது. அவர் மீடியாவை சேர்ந்தவர் என்றும் நடிகை என்றும் பலதரப்பட்ட வகையில் விமர்சனம் செய்து வந்தார்கள். அந்த வதந்திகளுக்கு முற்றுப்புள்ளி வைக்கும் வகையில் நடிகர் பிரேம்ஜியின் அண்ணனும், இயக்குநருமான வெங்கட் பிரபு அறிக்கை மூலம் தெளிவுபடுத்தினார். 

வெங்கட் பிரபு வெளியிட்ட அறிக்கையில் பிரேம்ஜியின் திருமணம் குறித்த உங்களின் கேள்விகள் அனைத்திற்கும் ஜூன் 9ஆம் தேதி தீர்வு கிடைக்கும். குடும்ப உறுப்பினர்கள் மற்றும் நெருங்கிய நண்பர்கள் மட்டுமே கலந்து  கொள்ள அம்மாவின் ஆசியோடு பிரேம்ஜி திருமணம் எளிமையாக நடைபெற உள்ளது. திருமணம் முடிந்தவுடன் புகைப்படங்களைப் பகிர்கிறோம் எனத் தெரிவித்து அறிக்கை ஒன்றை வெளியிட்டு இருந்தார். 

இருப்பினும் பிரேம்ஜி திருமணம் செய்து கொள்ள போகும் பெண் பற்றின விவரங்களை தெரிந்து கொள்வதில் மக்களுக்கு இருக்கும் ஆர்வம் தணியவில்லை. அந்த வகையில் மணமகள் இந்து குறித்த சில தகவல்கள் இணையத்தில் கசிந்துள்ளன. சேலத்தைச் சேர்ந்த இந்து தான் முதலில் தன்னுடைய காதலை பிரேம்ஜியிடம் சொல்ல இருவரும் சில காலம் காதலித்து வந்த நிலையில், இருவீட்டாரின் பெற்றோர் சம்மதமும் கிடைக்கவே திருமணம் முடிவானது.

மணமகள் இந்து வங்கியில் பணிபுரிகிறார். அவர்கள் இருவரும் எப்போது, எங்கே சந்தித்துக் கொண்டார்கள் என்பது தெரியவில்லை. இந்துவின் ஆசையின்படி திருத்தணியில் திருமணத்தை நடத்த திட்டமிடப்பட்டுள்ளது. அவரின் நெருங்கிய குடும்ப உறுப்பினர்கள் சிலர் சேலத்தில் தான் வசிக்கிறார்கள் என்ற இந்த தகவல் பிரேம்ஜியின் உறவினர்கள் சிலரின் மூலம் தெரியவந்துள்ளது. நாளை மணமக்களின் புகைப்படங்கள் வெளியாகி பரவி வரும் வதந்திகள் அனைத்திற்கும் முற்றுப்புள்ளி வைக்கும் என ரசிகர்கள் ஆர்வமுடன் எதிர்பார்த்து காத்திருக்கிறார்கள். பிரேம்ஜி - இந்துவுக்கு அட்வான்ஸ் திருமண நாள் வாழ்த்துக்கள்!