Nagendra Prasad : 'வீட்டை கொடுத்து ஏமாந்துவிட்டேன்.. சினிமாக்காரன் என்பதால் கெட்ட பெயர்..' மன உளைச்சலில் பிரபுதேவா தம்பி!

Nagendra Prasad: நடிகர் மற்றும் நடன இயக்குனர் பிரபுதேவா தம்பி நாகேந்திர பிரசாத் வீட்டை வாடகைக்கு கொடுத்து ஏமாந்து நிற்கும் மிகுந்த மனவேதனையில் உள்ளார்.

சர்ச்சையில் நாகேந்திர பிரசாத்

தென்னிந்திய சினிமாவின் பிரபலமான நடன இயக்குநர் மறைந்த சுந்தரத்தின் மகனும், நடிகர் பிரபுதேவாவின் தம்பியுமான நடிகர் நாகேந்திர பிரசாத் திரை ரசிகர்கள் மத்தியில் மிகவும் பிரபலமானவர். பல திரைப்படங்களுக்கு நடன இயக்குநராக பணியாற்றியதுடன், நடிகராகவும் நடித்து பிரபலமானவர். குஷி, கில்லி, ஒன் டூ த்ரீ உள்ளிட்ட பல படங்களில் துணை கதாபாத்திரங்களில் நடித்தவர். நடிகர் நாகேந்திர பிரசாத் தற்போது ஒரு சர்ச்சையில் சிக்கி தவித்து வருகிறார். 

 

வீட்டை கொடுத்து ஏமாற்றம்:

நடிகர் நாகேந்திர பிரசாத்துக்கு சொந்தமான வீடு ஒன்று  தேனாம்பேட்டையில் உள்ளது. அந்த வீட்டினை எஸ்.டி.எஸ்.கே என்ற நிறுவனத்துக்கு 36,000 ரூபாய் மாத வாடகைக்கு கொடுத்துள்ளார். ஒவ்வொரு மாதமும் வாடகை பணம் கரெக்ட்டாக வந்து கொண்டு இருந்த நிலையில் கடந்த ஒன்றரை ஆண்டுகளாக எஸ்.டி.எஸ்.கே நிறுவனத்திடம் இருந்து வாடகை பணம் வராமல் இருந்துள்ளது. அவர்களை தொடர்பு கொள்ளவும் முடியாத காரணத்தால் வீட்டை காலி செய்ய நோட்டீஸ் அனுப்பியும் பதிலும் வரவில்லை, வாடகையும் வரவில்லை என்பதால் நேரில் சென்று வீட்டில் வசிப்பவரை காலி செய்ய சொல்லி கேட்டுள்ளார் நாகேந்திர பிரசாத். 

அந்த சமயத்தில் தான் நாகேந்திர பிரசாத்துக்கு அதிர்ச்சி ஒன்று காத்திருந்தது. அதாவது அந்த வீட்டில் குடி இருப்பவர் வாடகைக்கு இருப்பவர் அல்ல என்றும் 25 லட்சம் எஸ்.டி.எஸ்.கே நிறுவனத்திடம் கொடுத்து லீசுக்கு வந்து இருப்பதும் தெரியவந்துள்ளது. ஷாக்கான நாகேந்திர பிரசாத் "நான் வீட்டை வாடகைக்காக தான் கொடுத்தேன் தவிர லீசுக்கு விடவில்லை. அது குறித்து எந்த ஒரு அக்ரிமென்ட்டும் போடவில்லை" என்றும் தெளிவு படுத்தியுள்ளார்.  எஸ்.டி.எஸ்.கே தலைமறைவாக இருப்பது தெரிந்து அந்த வீட்டில் வசிப்பவரிடம் காலி செய்ய சொல்லியுள்ளார். அவர்கள் இரண்டு மாதம் கால அவகாசம் கேட்டுள்ளனர். இரண்டு மாதங்களுக்கு பிறகும் காலி செய்யாததால், நேரில் சென்று விசாரித்த போது அவர்கள் நீதிமன்றத்தில் வழக்கு பதிவு செய்து இருப்பதாகவும் தீர்ப்பு வந்த பிறகு தான் காலி செய்வேன் என்றும் சொல்லி பிரச்சினை செய்துள்ளனர். 

 

மன உளைச்சல்:

போலீசில் நாகேந்திர பிரசாத் புகார் அளித்தும் வீட்டில் குடி இருப்பவர்கள் பேச்சுவார்த்தைக்கு வராமல் எங்கேயோ எஸ்கேப்பாகி விடுவார்களாம். கடந்த ஒன்றரை ஆண்டுகளாக இப்படி நடந்து வந்ததால் மிகுந்த மன உளைச்சலுக்கு ஆளான நாகேந்திர பிரசாத் வீட்டில் குடி இருப்பவர்களை பேச்சுவார்த்தைக்கு வர வைக்க வேண்டும் என்பதற்காக வீட்டை வெல்டிங் வைத்து பூட்டியுள்ளார். ஆனால் வீட்டில் வசிப்பவர் வளர்க்கும் நாய் வீட்டில் இருப்பது தெரியாமல் வீட்டை பூட்டியது தெரிய வர பின்னர் அதை ரிமூவ் செய்துள்ளார் நாகேந்திர பிரசாத். 

தன்னுடைய பிரச்சினையை நினைத்து மிகுந்த மன உளைச்சலில் இருக்கிறார் நாகேந்திர பிரசாத். உண்மையிலேயே எஸ்.டி.எஸ்.கே நிறுவனத்திடம் வீட்டில் வசிப்பவர் லீசுக்கு 25 லட்சம் பணம் செலுத்தி ஏமாந்து போனாரா அல்லது அந்த நிறுவனத்துடன் சேர்ந்து தன்னை ஏமாற்றுகிறாரா என்பது புரியாமல் குழம்பி தவிக்கிறார். 

சினிமாவில் இருப்பதால் தன்னை தான் கெட்டவர் என இந்த சமூகம் பார்ப்பதாகவும் இதனால் தன்னுடைய குடும்பம் பாதிக்கப்பட்டுள்ளதாகவும் தெரிவித்துள்ளார். வீட்டையும் இழந்து கெட்ட பெயரையும் பெற்று மிகுந்த மனவேதனையுடன் இந்த தகவல்களை தெரிவித்துள்ளார் நாகேந்திர பிரசாத்.