Mookuthi Amman 2: தீய சக்தியை எதிர்க்க வரும் நயன்தாராவின் மூக்குத்தி அம்மன் 2! அதிகாரப்பூர்வ அப்டேட் வெளியீடு!

Mookuthi Amman 2: ஐசரி கணேஷ் தயாரிப்பில் 'மூக்குத்தி அம்மன் 2' குறித்த அதிகாரப்பூர்வமான அறிவிப்பை படக்குழு வெளியிட்டுள்ளது. மீண்டும் மூக்குத்தி அம்மனாக நயன்தாரா நடிக்க உள்ளார்.

மூக்குத்தி அம்மன் 2

Source : Other

ரேடியோ ஜாக்கியாக இருந்து 'கிராஸ் டாக்' நிகழ்ச்சி மூலம் பட்டி தொட்டி எங்கும் பிரபலமானவர் ஆர்ஜே பாலாஜி. அவரின் பேச்சு திறமையை ரசிக்கவே ஏராளமான ரசிகர் கூட்டம் உள்ளது. அதன் மூலம் கிடைத்த பிரபலத்தை வைத்து திரைப்படத்தில் காமெடியனாக, ஹீரோவின் நண்பனாக  நடிக்க வாய்ப்பு கிடைத்தது.

'தீயா வேலை செய்யணும் குமாரு'. 'நானும் ரவுடி தான்' உள்ளிட்ட படங்கள் மிகப்பெரிய வரவேற்பை பெற்று கொடுத்தன. 

 

மெல்ல மெல்ல மக்கள் மத்தியில் பிரபலத்தை ஏற்படுத்தி கொண்ட ஆர்ஜே பாலாஜி, எல்.கே.ஜி படம் மூலம் ஹீரோவாக அறிமுகமானார்.

முதல் படமே வெற்றி படமாக அமைந்ததால் தொடர்ந்து வீட்ல விசேஷம், மூக்குத்தி அம்மன், சிங்கப்பூர் சலூன், ரன் பேபி ரன் உள்ளிட்ட பல படங்களில் ஹீரோவாக நடிக்கும் வாய்ப்பு கிடைத்தது. தனக்கென செட்டாகும்  ஸ்டைல்  படங்களை மிக சிறப்பாக தேர்வு செய்து நடித்து வருகிறார் நடிகர் ஆர்ஜே பாலாஜி. 

நடிகராக களமிறங்கி வெற்றி கண்ட பிறகு 'மூக்குத்தி அம்மன்' படம் மூலம் இணை இயக்குநராக பரிணாமம் எடுத்தார். நேரடியாக நயன்தாராவை வைத்து அவர் இயக்கிய முதல் படம் பிளாக் பஸ்டர் ஹிட் அடித்தது.

நேரடியாக டிஸ்னி பிளஸ் ஹாட்ஸ்டாரில் வெளியான இப்படம் ரசிகர்களின் பேராதரவை பெற்றது. நயன்தாராவின் அட்டகாசமான நடிப்பு, ஆர்ஜே பாலாஜியின் டைமிங் காமெடி, ஸ்வாரஸ்யமான திரைக்கதை என படத்துக்கு ஏராளமான பிளஸ் பாய்ண்ட் அமைந்து இருந்தன. 

 

இந்நிலையில் 'மூக்குத்தி அம்மன் 2' உருவாக உள்ளது என்ற தகவல்  ஏற்கனவே சமூக வலைத்தளங்கள் எங்கும் வைரலானது. நயன்தாராவுக்கு பதிலாக திரிஷா நடிக்க இருப்பதாக தகவல் வெளியானது. இப்படி பல வதந்திகள் பரவி வந்த நிலையில் தற்போது 'மூக்குத்தி அம்மன் 2 ' குறித்த அதிகாரப்பூர்வமான தகவல் தற்போது வெளியாகியுள்ளது.

வேல்ஸ் ஃபிலிம்ஸ் இண்டர்நேஷனல் நிறுவனத்தின் கீழ் ஐசரி கணேஷ் இப்படத்தை தயாரிக்கிறார். 'தீய சக்தி தலைதூக்கும் போது அம்மன் அங்கே காட்சியளிப்பார்' என்ற கேப்ஷனுடன் மூக்குத்தி அம்மனாக நயன்தாரா நடிக்க உள்ளார் என்ற அறிவிப்பு வீடியோவை தயாரிப்பு நிறுவனம் வெளியிட்டுள்ளது. படத்தின் மற்ற நடிகர்கள், தொழில்நுட்ப கலைஞர்கள் குறித்த விவரங்கள் விரைவில் வெளியாகும் என எதிர்பார்க்கப்படுகிறது. 

மீண்டும் ஒரு கலக்கலான காம்போவில் ஒரு சூப்பர் ஹிட் வெற்றியுடன் உருவாக இருக்கும் 'மூக்குத்தி அம்மன் 2' படத்திற்காக ரசிகர்கள் மிகுந்த ஆர்வத்துடன் எதிர்பார்த்து காத்திருக்கிறார்கள்.