Maamannan First Single : இசை புயலுடன் இணைந்த வைகை புயல்... 'மாமன்னன்' பர்ஸ்ட் சிங்கிள்... தேதியை அறிவித்த படக்குழு

ஏ.ஆர். ரஹ்மான் இசையில் முதல் முறையாக வைகை புயல் வடிவேலு பாடியுள்ள 'மாமன்னன்' படத்தின் ஃபர்ஸ்ட் சிங்கிள் பாடலின் ரிலீஸ் தேதியை வெளியிட்டுள்ளது படக்குழு.  

மாமன்னன் ஃபர்ஸ்ட் சிங்கிள்

பா. ரஞ்சித் தயாரிப்பில் வெளியான 'பரியேறும் பெருமாள்' திரைப்படம் மூலம் மக்களின் கவனத்தை ஈர்த்தவர் இயக்குநர் மாரி செல்வராஜ். தனுஷ் நடித்த 'கர்ணன்' திரைப்படத்தை தொடர்ந்து அவர் இயக்கி வரும் திரைப்படம் 'மாமன்னன்'.

ரெட் ஜெயண்ட் மூவிஸ் நிறுவனம் தயாரிப்பில் உருவாகியுள்ள இப்படத்தில் உதயநிதி ஸ்டாலின், கீர்த்தி சுரேஷ், ஃபகத் ஃபாசில் உள்ளிட்டோர் முக்கியக் கதாபாத்திரத்தில் நடித்துள்ளனர். பிரதான கதாபாத்திரமாக வைகை புயல் வடிவேலு நடித்துள்ளார். ஏ.ஆர். ரஹ்மான் இசையமைக்கும் இப்படத்திற்கு ஒளிப்பதிவு பணிகளை மேற்கொண்டுள்ளார் தேனி ஈஸ்வர். இப்படத்தின் ஃபர்ஸ்ட் லுக் போஸ்டர் சமீபத்தில் வெளியாகி மக்கள் மத்தியில் நல்ல வரவேற்பை பெற்றது. இப்படம் ஜூன் மாதம் வெளியாகும் என அறிவித்துள்ளது படக்குழு.

ஃபர்ஸ்ட் சிங்கிள் :

மிகவும் எதிர்பார்க்கப்படும் 'மாமன்னன்' படத்தில் ஃபர்ஸ்ட் சிங்கிள் பாடல் மே 19ம் தேதி வெளியாகவுள்ளது. ஏ.ஆர். ரஹ்மான் இசையில், கவிஞர் யுகபாரதி எழுத்தில் வைகை புயல் வடிவேலு இப்பாடலை பாடியுள்ளார். இதன் அதிகாரபூர்வமான அறிவிப்பை படக்குழு ட்விட்டர் மூலம் வெளியிட்டுள்ளது. ஏ.ஆர். ரஹ்மான் இசையில் வடிவேலு பாடிய முதல் பாடல் என்பதால் திரை ரசிகர்கள் மத்தியில் எதிர்பார்ப்பு உச்சத்தில் உள்ளது.

ஏ.ஆர். ரஹ்மான் இசையில்  வடிவேலு:

வடிவேலு ஒரு சிறந்த நகைச்சுவை நடிகராக மட்டுமின்றி ஏராளமான பாடல்களையும் பாடியுள்ளார். இளையராஜாவின் இசையில் 'என் ராசாவின் மனசிலே' படத்தில் இடம்பெற்ற 'போடா போடா புண்ணாக்கு' என்ற பாடல் மூலம் பாடகரானார். அதனை தொடர்ந்து எஸ்.ஏ.ராஜ்குமார், தேவா, ஹாரிஸ் ஜெயராஜ், யுவன் ஷங்கர் ராஜா, டி.எஸ்.பி என பல இசையமைப்பாளர்களின் இசையில் பாடியுள்ள வடிவேலு முதல் முறையாக ஏ.ஆர். ரஹ்மான் இசையில் 'மாமன்னன்' படத்தில் பாடியுள்ளார். அது முதல் சிங்கிள் பாடலாக மே 19ம் தேதி வெளியாகவுள்ளது.    

 

 

ரஹ்மான் போஸ்ட் :

 

சமீபத்தில் ஏ.ஆர். ரஹ்மான் தனது இன்ஸ்டாகிராம் போஸ்டில் வடிவேலுவுடன் இணைந்து ரெக்கார்டிங் செய்த போது எடுத்த புகைப்படத்தையும் அந்த அனுபவம் குறித்தும் பதிவு ஒன்றை போஸ்ட் செய்து இருந்தார். "வடிவேலுவுடன் பாடல் பதிவு செய்த போது அவர் எங்களை சிரிக்க வைத்த அனுபவம் மறக்க முடியாதது' என பதிவிட்டு இருந்தார்.