Lal Salaam Update: 'முடிவுக்கு வந்த மொய்தீன் பாய் ஆட்டம்’ .. லால் சலாம் படத்தின் ரஜினி காட்சிகள் ஓவர்..!

லால் சலாம் படத்தின் ரஜினி தொடர்பான காட்சிகள் முடிவடைந்து விட்டதாக அப்படத்தின் இயக்குநர் ஐஸ்வர்யா ரஜினிகாந்த் தெரிவித்துள்ளார். 

லால் சலாம் படத்தில் ரஜினிகாந்த்

லால் சலாம் படத்தின் ரஜினி தொடர்பான காட்சிகள் முடிவடைந்து விட்டதாக அப்படத்தின் இயக்குநர் ஐஸ்வர்யா ரஜினிகாந்த் தெரிவித்துள்ளார். 

தமிழ் சினிமாவின் சூப்பர் ஸ்டாராக கொண்டாடப்பட்டு வரும் நடிகர் ரஜினிகாந்த் தற்போது ஜெயிலர் படத்தில் நடித்து முடித்துள்ளார். இந்த படம் வரும் ஆகஸ்ட் மாதம் 10 ஆம் தேதி வெளியாகவுள்ளது. இதனைத் தொடர்ந்து ஜெய்பீம் ஞானவேல் இயக்கும்  படத்தில்  ரஜினி நடிக்க உள்ளார். இதற்கான முன்னேற்பாடுகள் விறுவிறுப்பாக நடைபெற்று வருகிறது. விரைவில் ஷூட்டிங் தொடங்கும் என எதிர்பார்க்கப்படுகிறது. 

இப்படியான நிலையில், ரஜினி தனது மூத்த மகளாக ஐஸ்வர்யா இயக்கத்தில் ‘லால் சலாம்’ படத்தில் நடித்து வருகிறார். 3, வை ராஜா வை படங்களை இயக்கிய ஐஸ்வர்யா நீண்ட இடைவெளிக்குப் பின் இப்படத்தை இயக்கி வருகிறார்.   லைகா புரொடக்ஷன்ஸ் தயாரிக்கும் இப்படத்தில் விஷ்ணு விஷால் மற்றும் விக்ராந்த் இருவரும் ஹீரோக்களாக நடிக்கின்றனர். கிரிக்கெட் விளையாட்டை மையப்படுத்திய இந்த படத்தில் ’மொய்தீன் பாய்’ என்னும் கேரக்டரில் ரஜினி சிறப்பு தோற்றத்தில் நடிக்கிறார். ஏ.ஆர்.ரஹ்மான் இப்படத்திற்கு இசையமைக்கிறார். 

லால் சலாம் படத்தின் ஷூட்டிங் திருவண்ணாமலை, மும்பை உள்ளிட்ட பகுதிகளில் தொடர்ச்சியாக நடைபெற்று வருகிறது. கடந்த மே 8 ஆம் தேதி லால் சலாம் படத்தில் நடிக்கும் ரஜினியின் கேரக்டர் அறிமுகம் செய்யப்பட்ட நிலையில் அடுத்தக்கட்ட அப்டேட்டுக்காக ரசிகர்கள் காத்திருக்கின்றனர். கடந்த ஜூலை 1 ஆம் தேதி திருவண்ணாமலை சென்ற ரஜினி, அங்கு அண்ணாமலையார் கோயிலில் சாமி தரிசனம் செய்த புகைப்படங்கள், வீடியோக்கள் இணையத்தில் வைரலானது. 

இப்படியான நிலையில் லால் சலாம் படத்தில் ரஜினி தொடர்பான காட்சிகள் முடிவுக்கு வந்துள்ளது. இதுதொடர்பான புகைப்படம் ஒன்றும் வெளியாகி இணையத்தில் வைரலாகியுள்ளது. இதில் ரஜினி மொய்தீன் பாய் கெட்டப்பில் உள்ளார். மேலும் ஐஸ்வர்யா ரஜினிகாந்த், நடிகை ஜீவிதா, நடிகர் விஷ்ணு விஷால் உள்ளிட்டோரும் உள்ளனர்.