வெளியாகிறது ஜனநாயகன் ! நாளை படத்தை பார்வையிடும் மறுதணிக்கை குழு

ஜனநாயகன் திரைபடத்தை மறுதணிக்கை செய்ய தணிக்கை வாரியத்தின் மறு ஆய்வுக்குழு நாளை படத்தை பார்வையிட உள்ளதாக தகவல் வெளியாகியுள்ளது

விஜய் , ஜனநாயகன்

Source : X

விஜயின் ஜனநாயகன் திரைப்படம் கடந்த ஜனவரி 9 ஆம் தேதி வெளியாக இருந்து பின் தணிக்கை பிரச்சனையால் ரிலீஸ் ஒத்திவைக்கப்பட்டது. படத்திற்கு தணிக்கை சான்றிதழ் வழங்க கோரி படதயாரிப்பு நிறுவனம் சென்னை உயர் நீதிமன்றத்தில் தொடுத்திருந்த வழக்கை வாபஸ் வாங்கியது. நாளை மார்ச் 17 ஆம் தேதி தணிக்கை வாரியத்தின் மறு ஆய்வுக்குழு ஜனநாயகன் படத்தை பார்வையிட உள்ளதாக தகவல்கள் வெளியாகியுள்ள. 

விஜய் அரசியல் களம் காண்பதற்கு முன்பு அவரது கடைசி படமாக உருவாகியுள்ளது ஜனநாயகன். ஜனநாயகன் திரைப்படம் விஜயின் அரசியல் பயணத்திற்கு சாதகமான அபிப்பிராயத்தை மக்களிடம் ஏற்படுத்தும் என பெரியளவில் எதிர்பார்க்கப்பட்டது. இப்படியான நிலையில் தான் ஜனநாயகன் படத்திற்கு தணிக்கை சான்றிதழ் வழங்க தணிக்கை வாரியம் ஆட்சேபனம் தெரிவித்தது. முன்னதாக படத்திற்கு தணிக்கை U/A சான்றிதழ் வழங்குவதாக தெரிவித்து பின் படத்தை மறுதணிக்கைக்கு உத்தரவிட்டது பெரும் சர்ச்சையை ஏற்படுத்தியது .

படத்திற்கு தணிக்கை சான்றிதழ் பெறுவதற்காக படத்தின் தயாரிப்பு நிறுவனமான கே.வி.என் ப்ரோடக்‌ஷன்ஸ் நீதிமன்றத்தின் உதவியை நாடியது. முதலில் தனி நீதிபதி அமர்வு பின் தலைமை நீதிபதிகள் அமர்வு என இந்த வழக்கு படத்தின் ரிலீஸ் தேதியை மேலும் தாமதப்படுத்தியது. இதனால் தங்களது மனுவை படக்குழு வாபஸ் பெற்றது. 

 நாளை படத்தை பார்வையிடும் மறுதணிக்கை குழு 

கடந்த மார்ச் 9 ஆம் தேதி ஜனநாயகன திரைப்படத்தை மறுதணிக்கை குழு பார்வையிட இருந்தனர். ஆனால் கடைசி நேரத்தில் தணிக்கை குழு உறுப்பினர் ஒருவருக்கு உடல் நிலை சரியில்லாததால் மறுதணிக்கை ஒத்திவைக்கப்பட்டது. தற்போது வெளியாகியுள்ள தகவலின்படி நாளை ஜனநாயகன் திரைப்படத்தை தணிக்கை வாரியத்தின் மறுதணிக்கைக் குழு படத்தை பார்வையிட இருக்கின்றனர். 9 பேர் கொண்ட மறுதணிக்கை குழு படத்தை பார்வையிட்டு தங்களது பரிந்துரைகளை படக்குழுவிற்கு அளிக்கும். தணிக்கை குழு பரிந்துரை செய்த திருத்தங்களை மேற்கொண்ட பின்னர் ஒரு சில வாரங்களில் படத்திற்கு தணிக்கை சான்றிதழ் வழங்கப்படும்.

சட்டமன்ற தேர்தல் ஏப்ரல் 23 ஆம் தேதி நடைபெற உள்ள நிலையில் அனைத்து அரசியல் கட்சிகளும் பரபரப்பாக தேர்தல் பணிகளில் களமிறங்கியுள்ளார்கள். விஜயின் தமிழக வெற்றிக் கழகம் இந்த ஆண்டு தேர்தலில் கனிசமான வாக்குகளை பெறும் என்று எதிர்பார்க்கப்படுகிறது. மே 4 ஆம் தேதி வாக்கு எண்ணிக்கை நடைபெற உள்ளது. தேர்தல் முடிந்த கையோடு ஜனநாயகன் திரைப்படத்தை படம்  திரையரங்கில் வெளியாகும் என எதிர்பார்க்கலாம்.