Jailer First Single Promo: சூப்பர் ஸ்டார் இல்ல... இது தமன்னா பாட்டு...வழக்கம்போல் ஜாலி அப்டேட் கொடுத்த நெல்சன் - அனிருத் காம்போ!

ஜெயிலர் படத்தின் முதல் பாடலாக வெளியாகவுள்ள இந்தப் பாடல் நடிகர் ரஜினிகாந்துக்கான பாடல் இல்லை என்றும், தமன்னாவுக்கான பாடல் என்றும் இந்த ப்ரோமோ வீடியோவில் ஹிண்ட் கொடுத்துள்ளனர்.

ஜெயிலர் ஃபர்ஸ்ட் சிங்கிள்

ஜெயிலர் படத்தின் ஃபர்ஸ்ட் சிங்கிள் பாடலின் ப்ரோமோ வீடியோ வெளியாகியுள்ளது. செல்லம்மா செல்லம்மா, அரபிக் குத்து பாடல்களின் ப்ரோமோவில் ஜாலியாக நடித்திருந்த அனிருத் - நெல்சன் காம்போ இந்த ப்ரோமோ வீடியோவிலும் ஒருவரை ஒருவர் கலாய்த்து நடித்துள்ளனர்.

மேலும், ஜெயிலர் படத்தின் முதல் பாடலாக வெளியாகவுள்ள இந்தப் பாடல் நடிகர் ரஜினிகாந்துக்கான பாடல் இல்லை என்றும், தமன்னாவுக்கான பாடல் என்றும் இந்த ப்ரோமோ வீடியோவில் நெல்சன் - அனிருத் இணை ஹின்ட் ஒன்றையும் கொடுத்துள்ளனர்.

 

காவாலா எனும் தெலுங்கு வார்த்தையுடன் தொடங்கும் இப்பாடல் ஒரு சில விநாடிகளே இந்த வீடியோவில் ஒலிக்கும் நிலையில், ரசிகர்கள் விரைவில் வெளியாகும் முழு பாடலை எதிர்பார்த்துக் காத்துள்ளனர்.

கோலமாவு கோகிலா, டாக்டர், பீஸ்ட் படங்களை இயக்கிய நெல்சன் இயக்கத்தில், இந்தியாவின் உச்ச நட்சத்திரங்களில் ஒருவரான நடிகர் ரஜினிகாந்த் நடிப்பில் உருவாகி வரும் ஜெயிலர் திரைப்படம் வரும் ஆகஸ்ட் 10ஆம் தேதி வெளியாக உள்ளது.

பான் இந்தியா திரைப்படமாக வெளியாக உள்ள இப்படத்தில், மோகன் லால், சிவராஜ் குமார், ஜாக்கி தெராஃப், சுனில் என பல மொழி சூப்பர் ஸ்டார்களும் நடித்துள்ளனர். மேலும் நடிகைகள் தமன்னா, ரம்யா கிருஷ்ணன், யோகி பாபு, ஜாஃபர், விநாயகன், வசந்த் ரவி, ரெடின் கிங்ஸ்லி எனப் பெரும் நட்சத்திரப் பட்டாளமே இணைந்துள்ளது.

கடந்த ஆண்டு இறுதியில் தொடங்கிய இப்படத்தின் ஷூட்டிங் கடலூர், வேலூர், ராஜஸ்தான், ஹைதராபாத், சென்னை, பெங்களூரு, கொச்சி என பல இடங்களில் நடைபெற்று முடிந்தது.  முன்னதாக படப்பிடிப்பு நிறைவு பெற்றதைக் கொண்டாடும் வகையில் படக்குழு பகிர்ந்த புகைப்படங்கள் இணையத்தில் வைரலாகின மேலும், படப்பிடிப்பு தளத்தில் இருக்கும் ரஜினிகாந்தின் வீடியோக்களும் தொடர்ந்து இணையத்தில் லைக்ஸ் அள்ளின.

இச்சூழலில் படம் வெளியாக இன்னும் ஒரு மாத காலமே உள்ள நிலையில், இப்படத்தின் ப்ரோமோஷன் வேலைகளை படக்குழு தொடங்கியுள்ளது. அதன்படி தற்போது ப்ரோமோ வீடியோ வெளியாகியுள்ள நிலையில், ஜூன் 6ஆம் தேதி முழு பாடலும் வெளியாகும் என படக்குழு அறிவித்துள்ளது.

நான்காவது முறையாக அனிருத் - நெல்சன் காம்போ இணைந்துள்ள நிலையில், நடிகர் ரஜினிகாந்துடன் பேட்ட படத்துக்குப் பிறகு அனிருத் இணைந்துள்ளார். இந்நிலையில், இப்படத்தின் பாடல்கள் பெரும் எதிர்பார்ப்புகளை உருவாக்கியுள்ளன.

மேலும் இந்த மாதம் முடியும் வரை ஜெயிலர் படக்குழு தொடர்ந்து அப்டேட்களை வழங்கி ரஜினிகாந்த் ரசிகர்களை குஷிப்படுத்தும் என எதிர்பார்க்கப்படுகிறது.

மேலும் படிக்க: Udhayanidhi Stalin: ”ஒரே திரைப்படத்தின் மூலம் தலைகீழ் மாற்றத்தை நிகழ்த்த முடியாது.. ஒன்றிணைந்து பயணிப்போம்” - உதயநிதி ஸ்டாலின்