Actor Manikandan: அடுத்தவனுக்காக கல்யாணம் பண்ணிக்க முடியாது... நான் இன்னும் ரெடியாகல... ‘குட் நைட்’ மணிகண்டன் பளிச்!

குட் நைட் படத்தின் வெற்றிக்குப் பிறகு அதிக கவனம் ஈர்த்துள்ள மணிகண்டன் தற்போது தேர்ந்தெடுத்து கதைகளில் நடித்து வருகிறார்.

மணிகண்டன் திருமணம்

விக்ரம் வேதா, காலா, சில்லுக்கருப்பட்டி, ஏலே போன்ற படங்களில் நடித்ததன் மூலம் பிரபலமான நடிகர் மணிகண்டன் ஒரு தேர்ந்த எழுத்தாளரும் கூட. விக்ரம் வேதா திரைப்படத்துக்கு டயலாக் ரைட்டராகவும் பணியாற்றியுள்ளார். ஜெய் பீம் திரைப்படத்தில் ராஜாகண்ணு என முக்கியமான கதாபாத்திரத்தில் நடித்ததன் மூலம் கவனம் ஈர்த்த மணிகண்டன், நடிகராக ஏராளமான ரசிகர்களைப் பெற்றார். 

வரவேற்பை பெற்ற குட் நைட்: 

சமீபத்தில் விநாயக் சந்திரசேகரன் இயக்கத்தில் மணிகண்டன் நடித்த வெளியான 'குட் நைட்' திரைப்படம் நல்ல வரவேற்பைப் பெற்றது. குறட்டை பிரச்சினையால் அவதிப்படும் இளைஞனை சுற்றி நகரும் கதைக்களத்தை மிகவும் ஸ்வாரஸ்யமாக நகர்த்திய திரைக்கதை விமர்சன ரீதியாக பாராட்டப்பட்டது. குட் நைட் படத்தின் வெற்றிக்குப் பிறகு அதிக கவனம் பெற்ற மணிகண்டன் முன்னணி நடிகர்களின் வரிசையில் இடம்பெற்றுள்ளார். 

 

குட் நைட் வெற்றி :

இந்நிலையில், சமீபத்தில் தனியார் பத்திரிகைக்கு அளித்த நேர்காணலில் தன்னைப் பற்றிய பல ஸ்வாரஸ்யமான கேள்விகளுக்கு வெளிப்படையாக பதில் அளித்துள்ளார் மணிகண்டன்.  "ரொம்ப நாளா சீரியஸ் சப்ஜெக்ட் உள்ள படங்களையே நடித்ததால் கொஞ்சம் ஜாலியான லைட் சப்ஜெக்ட் படத்தில் நடிக்கணும் என ஆசைப்பட்டு 'குட் நைட்' படத்தில் நடித்தேன். கடந்த ஆண்டு இந்த படத்தின் பூஜை நடைபெற்ற போது சத்தியமா இது இந்த அளவுக்கு வெற்றி பெரும் என கொஞ்சம் கூட நினைத்து பார்க்கவில்லை. முடிச்சுட்டா போதும் என்ற மனநிலையில் தான் நடித்தேன்” எனப் பேசியுள்ளார்.

கல்யாணம் எப்போ? 

மேலும் 35 வயதாகும் மணிகண்டன் ஏன் இதுவரையில் திருமணம் செய்து கொள்ளவில்லை என்ற கேள்விக்கு பதில் அளிக்கையில் “கல்யாணம் பண்ணிக்க கூடாது என்பது எல்லாம் இல்லை. கல்யாணத்திற்கு தயாராக இருக்கிறோமா இல்லையா என்பது நமக்கு தெரிய வேண்டும். அதுக்கு ரெடியான பிறகு முடிவு எடுப்பது சரியாக இருக்கும். 

அதை விடுத்து நிர்பந்தத்தின் காரணமாக அல்லது கல்யாண  வயசு என்பதால் செய்து கொள்ள வேண்டும் என்ற கட்டாயம் கிடையாது. மற்றவர்கள் நம்மை கேள்வி கேட்கிறார்கள் என்பதற்காக எல்லாம் செய்து கொள்ள முடியாது. நமது வாழ்நாள் முழுக்க மற்றவர்களிடம் இருந்து ஏதாவது ஒரு கேள்வியை எதிர்கொண்டே தான் இருக்க வேண்டும். கடைசியில் இது நம்முடைய வாழ்க்கை நாம் தான் என்ன செய்ய வேண்டும் என்பதை முடிவு செய்ய வேண்டும்” என பதிலளித்துள்ளார்.

தற்போது குட்நைட் படத்தைத் தயாரித்த மில்லியன் டாலர் ஸ்டுடியோஸ் மற்றும் எம் ஆர் பி எண்டர்டெயின்மெண்ட்ஸ் ஆகிய நிறுவனங்கள் மீண்டும் நடிகர் மணிகண்டனுடன்  கூட்டணி வைத்துள்ளன. அறிமுக இயக்குநர் பிரபுராம் வியாஸ் இப்படத்தை எழுதி இயக்கும் நிலையில், மாடர்ன் லவ் புகழ் ஸ்ரீகெளரி பிரியா இப்படத்தில் கதாநாயகியாக நடிக்கிறார்.