எல்லா விதிகளையும் பின்பற்றினோம்...ஸ்டண்ட் மாஸ்டர் மோகன்ராஜ் இறப்பு குறித்து பா ரஞ்சித் உருக்கம்...

வேட்டுவம் படப்பிடிப்பின் போது ஸ்டண்ட் மாஸ்டர் எஸ் மோகன்ராஜ் உயிரிழந்தது குறித்து இயக்குநர் பா ரஞ்சித் அறிக்கை வெளியிட்டுள்ளார்

பா ரஞ்சித் , மோகன்ராஜ்

Source : Twitter

வேட்டுவம் விபத்தில் உயிரிழந்த மோகன்ராஜ்

பா ரஞ்சித் தயாரித்து இயக்கிவரும் வேட்டும் படத்தின் படப்பிடிப்பின் போது சண்டை பயிற்சியாளர் எஸ் மோகன்ராஜ் உயிரிழந்தது திரைத்துறையில் பெரும் அதிர்ச்சியை ஏற்படுத்தியுள்ளது. கடந்த ஜூலை 13 ஆம் தேதி நாகை மாவட்டம் விழுந்தமாவடி கிராமத்தில் வேட்டுவம் படத்தின் படப்பிடிப்பு நடைபெற்றது. அப்போது காரில் கிராஷ் காட்சியில் ஈடுபட்ட  சண்டைப் பயிற்சியாளர் எஸ் மோகன்ராஜ் சம்பவ இடத்திலேயே உயிரிழந்தார். காரின் ஸ்டியரிங் அவரது மார்பில் மோதியதால் மாரடைப்பு ஏற்பட்டு அவர் உயிரிழந்ததாக பிரேத பரிசோதனையில் தெரியவந்தது. 

பா ரஞ்சித் மீது வழக்கு

மோகன்ராஜின் இறப்பைத் தொடர்ந்து கீழையூர் போலீஸார் இயக்குநர் பா. ரஞ்சித் , சண்டை பயிற்சியாளர் வினோத் , கார் உரிமையாளர் பிரபாகரன் மற்றும் தயாரிப்பு நிர்வாகி ராஜ்கமல் ஆகிய நான்கு பேர் மீது வழக்குப்பதிவு செய்தனர். போதுமான பாதுக்காப்பு ஏற்பாடுகளோடுதான் படப்பிடிப்பு நடைபெற்றதா என்கிற சந்தேகத்தில் அடிப்படையில் காவல்துறை விசாரணை நடத்தி வருகிறார்கள். இப்படியான  நிலையில் மோகன்ராஜ் இறந்தது குறித்து இயக்குநர் பா ரஞ்சித் விளக்கமளித்துள்ளார்

பா ரஞ்சித் விளக்கம்

"நீலம் ப்ரொடக்‌ஷன்ஸ் 

கண்ணீர் அஞ்சலி

ஜூலை 13 ஆம் தேதி காலை தமிழ்நாட்டின் நாகப்பட்டிணம் மாவட்டத்தில் நடைபெற்று வந்த “வேட்டுவம்” படப்பிடிப்பு தளத்தில்,  திறமையான சண்டைக் கலைஞரும்,  எங்களுடன் நீண்ட காலம்  பணியாற்றியவருமான  திரு. மோகன் ராஜ் அவர்களை நாங்கள் எதிர்பாரா விதத்தில் இழந்தோம். அவரின் மனைவி, குழந்தைகள்,குடும்பம் மற்றும் அவரை சக பணியாளராக, நண்பராக அறிந்த அனைவரையும் தேற்றும் வழியறியாது எங்கள் உள்ளம் கலங்குகிறது. 

எப்போதும் போலவே கிராஷ் காட்சியை எடுக்கும் முன்பு செய்யும் தெளிவான திட்டமிடல், பாதுகாப்பு ஏற்பாடுகள்,  எங்களின் வேண்டுதல்கள்,   வாழ்த்துக்கள் என எல்லாம் இருந்தன. சண்டைக்காட்சிகளை திட்டமிடுவதில், செயல்படுத்துவதில் தெளிவும், நேர்த்தியும் கொண்டிருந்த நிகரற்ற கலைஞரான அவருடைய வழிகாட்டுதலையும், எங்கள் ஸ்டண்ட் இயக்குனர் திலீப் மாஸ்டரின் விளக்கமான திட்டமிடலையும், பாதுகாப்பு தயாரிப்புகளையும் அனைவரும் பெரிதும் மதித்தோம்; தவறாமல் பின்பற்றினோம். 

ஆனால், அந்த நாள் அண்ணன் மோகன் ராஜ்  உயிரழப்பில் முடிந்தது என்பது தாங்கொணா  அதிர்ச்சியில் ஆழ்த்தியிருக்கிறது. மோகன் ராஜ் அண்ணன் அவர்கள், தன் ஸ்டண்ட் டீம், எங்களது குழு, என அனைவரின் மரியாதையையும், அன்பையும் பெற்றவர். செழுமையான அனுபவமும், சாதனைகளும் கொண்டு தன் நேர்த்தியான வேலையால் தன் குடும்பத்தை, சக ஸ்டண்ட் வீரர்களை, இயக்குனர்களை பெருமைப்படுத்திய கலைஞர் அவர். எங்கள் ஒவ்வொருவரின் மரியாதையும், அன்பும், வந்தனங்களும் என்றென்றென்றும் அவருக்கு சமர்ப்பணம். 

இது எங்கள் அனைவரையும் உலுக்கியிருக்கும் பேரிழப்பு. ஒரு கணவராக, தந்தையாக, பிரமாதமான சண்டைக் கலைஞராக, நேர்த்தியான மனிதராக வாழ்ந்த மோகன் ராஜ் அண்ணாவின் இறப்பிற்கு எங்களின் ஆழ்ந்த இரங்கல்கள். ஆகச்சிறந்த ஸ்டண்ட் கலைஞராய் அறியப்பட விரும்பிய அவரை என்றும் அப்படியே நாங்கள் நினைவில் போற்றுவோம்.