ஒன்ஸ் மோர் – திரை விமர்சனம்

அர்ஜூன் தாஸ் , அதிதி ஷங்கர் ஆகியோர் நடித்துள் ஆகஸ்ட் 28 ஆம் தேதி திரையரங்கில் வெளியாகியுள்ள ஒன்ஸ் மோர் திரைப்படத்தின் விமர்சனம்

ஒன்ஸ் மோர் , அர்ஜூன் தாஸ் , அதிதி ஷங்கர்

Source : X

அர்ஜுன் தாஸ், அதிதி ஷங்கர் நடிப்பில் விக்னேஷ் ஸ்ரீகாந்த் இயக்கத்தில் வெளியாகியுள்ள காதல் திரைப்படம் ‘ஒன்ஸ் மோர்’. யுவராஜ் கணேசன் தயாரித்துள்ள இப்படத்திற்கு ஹேஷம் அப்துல் வஹாப் இசையமைத்துள்ளார். அரவிந்த் விஸ்வநாதன் ஒளிப்பதிவு செய்துள்ளார். அர்ஜுன் தாஸ், அதிதி ஷங்கர், சோனா ஒலிக்கல், டிராவிட் செல்வம், அனுஷா பிரபு உள்ளிட்டோர் முக்கிய கதாபாத்திரங்களில் நடித்துள்ளனர். படம் ஆகஸ்ட் 28, 2026 அன்று திரையரங்குகளில் வெளியானது.

படத்தின் கதை

காதலில் ஏற்பட்ட தோல்வியால் கடந்த எட்டு ஆண்டுகளாக அந்த வலியிலிருந்து வெளியே வர முடியாமல் வாழ்ந்து வருகிறார் ரகுவரன். வாழ்க்கையில் எந்த விஷயத்திலும் பெரிய ஈடுபாடு இல்லாமல், தனக்குள் சுருங்கிக்கொண்டிருக்கும் அவருடைய உலகத்திற்குள் அஞ்சலி வருகிறார். ரகுவரனின் கல்லூரி ஜூனியரான அஞ்சலி, அவருடைய சோகமான வாழ்க்கையை மாற்ற வேண்டும் என்று முயற்சி செய்கிறார்.

முதலில் அஞ்சலியின் முயற்சிகளை ஏற்றுக்கொள்ள மறுக்கும் ரகுவரன், கொஞ்சம் கொஞ்சமாக அவருடன் நெருக்கமாகிறார். பல ஆண்டுகளுக்குப் பிறகு மீண்டும் காதலையும் மகிழ்ச்சியையும் உணரத் தொடங்கும் நிலையில், அவரது கடந்த கால காதல் மீண்டும் வாழ்க்கைக்குள் வருகிறது. அதன் பிறகு ரகுவரன் எதிர்கொள்ளும் உணர்வுகள், பழைய காதலின் தாக்கம், புதிய காதலை ஏற்றுக்கொள்வதில் இருக்கும் குழப்பம் ஆகியவற்றை படம் பேசுகிறது.

விமர்சனம்

‘ஒன்ஸ் மோர்’ படத்தின் அடிப்படையான யோசனை புதிதானது அல்ல. காதல் தோல்விக்குப் பிறகு ஒருவர் மீண்டும் காதலை சந்திப்பது, கடந்த காலத்திலிருந்து விடுபடுவது, இரண்டாவது வாய்ப்பை ஏற்றுக்கொள்வது போன்ற கதைக்களங்கள் ஏற்கெனவே பல படங்களில் வந்துள்ளன. இருந்தாலும், முதல் பாதியில் அதை சுவாரஸ்யமாக சொல்லியிருக்கிறார் இயக்குநர் விக்னேஷ் ஸ்ரீகாந்த்.

குறிப்பாக ரகுவரன் கதாபாத்திரத்திற்குள் அஞ்சலி நுழைந்த பிறகு வரும் காட்சிகள் படத்திற்கு நல்ல வேகத்தைக் கொடுக்கின்றன. அஞ்சலியின் துறுதுறுப்பும், ரகுவரனின் அமைதியான குணமும் ஒன்றுக்கொன்று எதிர்மறையாக இருப்பதால் இருவருக்கும் இடையிலான காட்சிகள் ரசிக்க வைக்கின்றன. முதல் பாதி பெரும்பாலும் இலகுவான காதல் காட்சிகளுடன் நகர்கிறது.

ஆனால் படத்தின் முக்கியமான பிரச்சினை இரண்டாம் பாதியில்தான் வருகிறது. ரகுவரனின் கடந்த கால காதலை விளக்கும் பிளாஷ்பேக் எதிர்பார்த்த அளவுக்கு வலுவாக அமையவில்லை. அந்த காதல் ஏன் இவ்வளவு பெரிய தாக்கத்தை ஏற்படுத்தியது என்பதற்கான உணர்வை முழுமையாக பார்வையாளர்களிடம் கடத்துவதில் திரைக்கதை தடுமாறுகிறது. மேலும், சில கதாபாத்திரங்களின் முடிவுகளும் இயல்பாக இல்லாமல் வசதிக்காக எழுதப்பட்டதாக தெரிகின்றன. இதனால் முதல் பாதியில் உருவான ஈர்ப்பு இரண்டாம் பாதியில் படிப்படியாக குறைகிறது.

இருப்பினும், படத்தின் இசை பெரிய பலமாக இருக்கிறது. ஹேஷம் அப்துல் வஹாபின் பாடல்களும் பின்னணி இசையும் காதல் காட்சிகளுக்கு தேவையான உணர்வை கொடுக்கின்றன. அரவிந்த் விஸ்வநாதனின் ஒளிப்பதிவும் படத்தின் மென்மையான காதல் மனநிலைக்கு பொருத்தமாக இருக்கிறது.

நடிப்பு

அர்ஜுன் தாஸ் இந்த படத்தில் தனது வழக்கமான தீவிரமான தோற்றத்திலிருந்து சற்று விலகி நடித்துள்ளார். காதல் தோல்வியால் உடைந்து போன மனிதராகவும், பின்னர் மீண்டும் காதலை உணரத் தொடங்கும் ஒருவராகவும் அவரது நடிப்பு நன்றாக இருக்கிறது. குறிப்பாக அவரது அமைதியான உடல்மொழி ரகுவரன் கதாபாத்திரத்திற்கு பொருத்தமாக அமைந்துள்ளது.

அதிதி ஷங்கருக்கு படத்தில் அதிக உற்சாகம் கொண்ட கதாபாத்திரம். அஞ்சலியாக அவர் வரும் காட்சிகள் படத்திற்கு தேவையான புத்துணர்ச்சியை கொடுக்கின்றன. அர்ஜுன் தாஸுடன் இணைந்து வரும் காட்சிகளில் இருவருக்கும் இடையிலான கெமிஸ்ட்ரி படத்தின் முக்கியமான பலங்களில் ஒன்றாக இருக்கிறது.

சோனா ஒலிக்கல் தனது கதாபாத்திரத்திற்கு தேவையான நடிப்பை வழங்கியிருக்கிறார். இருப்பினும், அவரது கதாபாத்திரத்தைச் சுற்றியுள்ள எழுத்து போதுமான அழுத்தத்துடன் அமையாததால், அந்த கதாபாத்திரத்தின் உணர்வுகள் பார்வையாளர்களிடம் முழுமையாக தாக்கத்தை ஏற்படுத்தவில்லை.

மொத்தத்தில், ‘ஒன்ஸ் மோர்’ முதல் பாதியில் ரசிக்க வைக்கும் அழகான காதல் திரைப்படமாக இருக்கிறது. ஆனால் வலுவாக அமைய வேண்டிய பிளாஷ்பேக் மற்றும் இரண்டாம் பாதி திரைக்கதையில் தடுமாறுவதால் முழுமையான திருப்தியை கொடுக்க முடியவில்லை. அர்ஜுன் தாஸ் – அதிதி ஷங்கரின் நடிப்பு, இசை மற்றும் முதல் பாதை படத்தை தாங்கி நிற்கின்றன. காதல், பிரிவு, மீண்டும் காதலை ஏற்றுக்கொள்வது போன்ற உணர்வுகளை மையமாக கொண்ட படங்களை விரும்புபவர்களுக்கு ஒருமுறை பார்க்கக்கூடிய படமாக ‘ஒன்ஸ் மோர்’ அமைகிறது.