Anushka Sharma | அனுஷ்கா ஷர்மா வெளியிட்ட மகளின் புகைப்படம்! இணையத்தில் வைரல்!
மகள் வாமிகாவின் புகைப்படத்தை வெளியிட்ட அனுஷ்கா ஷர்மாவின் பதிவு வைரலானது. பல திரை பிரபலங்கள் குழந்தையையும் விராட் கோலி, அனுஷ்கா சர்மாவையும் வாழ்த்தி வருகின்றனர்.
பாலிவுட் சினிமாவில் முன்னணி நடிகையான அனுஷ்கா ஷர்மா, பான்ட் பாஜா பாராத், பிகே, ஏ தில் ஹய் முக்ஷில் சஞ்சு மற்றும் சுய் தாஹா போன்ற படங்களில் நடித்து புகழின் உச்சிக்குச் சென்றவர். மூன்று வருடங்களுக்கு முன்னால், இந்திய அணியின் கேப்டன் விராட் கோலியை திருமணம் செய்துகொண்டார். அதன் பிறகு இந்த வருடம் அவர் கர்ப்பமாக இருப்பதாக அறிவிக்கப்பட்டது. இந்நிலையில் அவருக்கு சில மாதங்கள் முன்பு ஒரு பெண் குழந்தை பிறந்தது. அந்த நேரத்தில் கிரிக்கெட்டுக்கு விடுப்பு எடுத்து கொண்டு மனைவி குழந்தையுடன் நேரத்தை செலவழித்தார் கோலி.
View this post on Instagram
இந்நிலையில், நடிகை அனுஷ்கா ஷர்மா அஷ்டமி தினத்தை ஒட்டி விராட் கோலி மற்றும் அவருடைய மகள் வாமிகாவுடன் ஒரு புகைப்படத்தைப் பகிர்ந்துள்ளார், மேலும் இந்த பதிவு பிரபலங்கள் மற்றும் ரசிகர்களிடமிருந்து நல்ல ரெஸ்பான்ஸை பெற்று வருகிறது. பலரும் அந்த பதிவின் கீழ் அன்புகளை பொழியும் கமெண்டுகளை பதிவிட்டு வருகின்றனர். அனுஷ்கா தனது மகள் தன்னை ஒவ்வொரு நாளும் மேலும் மேலும் தைரியமாக ஆக்குவதாக பதிவின் கீழ் எழுதியுள்ளார். "ஒவ்வொரு நாளும் என்னை மேலும் மேலும் தைரியமாக ஆக்குகிறது. என் குட்டி வாமிகாவிடம் தெய்வத்தின் வலிமையை நீங்கள் எப்போதும் காணலாம். அஷ்டமி வாழ்த்துக்கள்" என்று அனுஷ்கா சர்மா எழுதியிருந்தார்.
பிரியங்கா சோப்ரா மற்றும் ரன்வீர் சிங் உட்பட பல பிரபலங்கள் தாயையும் சேயையும் கண்டு தங்கள் அன்பை பொழிந்தனர். ஆனால் தங்களது மகளின் புகைப்படத்தை வெளியிடுவதில் விருப்பமில்லை என்று இருவரும் கூறியிருந்த நிலையில் அனுஷ்கா ஷர்மா புகைப்படம் பதிவிட்டிருப்பதை குறித்து ரசிகர்கள் ஆச்சர்யமடைந்துள்ளனர். எங்களது மகளின் புகைப்படங்களை சமூக ஊடகத்தில் பதிவிட வேண்டாம் என்றும், பத்திரிகைகளுக்கும் இதே வேண்டுகோளை வைக்கிறோம் என்றும் விராட் கோலி, அனுஷ்கா ஷர்மா ஆகியோர் சில நாட்களுக்கு முன்பு கோரிக்கை வைத்திருந்தனர் என்பது குறிப்பிடத்தக்கது.
அனுஷ்கா தனது குழந்தையை எப்படி வளர்க்க திட்டமிட்டுள்ளார் என்பது பற்றி முன்னரே விரிவாக பேசியிருந்தார். "நாங்கள் குழந்தையை பொது சமூகத்தில் பெரும் ஊடக வெளிச்சத்தோடு செலிபிரிட்டி குழந்தையாக வளர்க்க விரும்பவில்லை. எங்கள் குழந்தையை சமூக ஊடகங்களில் பிரபலப்படுத்த நாங்கள் திட்டமிடவில்லை. சமூக ஊடகங்களில் இயங்குவதும் இயங்காததும் அந்தந்த தனி நபர்களால் எடுக்கப்பட வேண்டிய முடிவு, அந்தந்த குழந்தைகளால் எடுக்கப்பட வேண்டிய முடிவு என்று நான் நினைக்கிறேன். எங்கள் குழந்தை என்பதற்காக எந்த குழந்தையையும் விட ஒரு படி மேலே இருந்துவிட கூடாது. இதனை செய்வது கண்டிப்பாக கடினமாக இருக்கும், ஆனால் நாங்கள் அதைத்தான் பின்பற்ற விரும்புகிறோம்," என்று நடிகை அனுஷ்கா ஷர்மா கூறியிருந்தார்.
அதேபோல விராட் கோலியும் வாமிகாவின் முகத்தை காண ஆவலோடு உள்ளோம், பெயருக்கு அர்த்தம் கூறுங்கள் என்று கேட்ட ரசிகரிடம் "வாமிகா என்பது துர்கை கடவுளின் மற்றொரு பெயர்" எனக் கூறினார். மேலும் பதிலளித்த அவர், "மகளின் புகைப்படத்தை சமூக ஊடகங்களில் பதிவேற்றம் செய்யக் கூடாது என நானும் எனது மனைவியும் முடிவு செய்துள்ளோம். எனது மகளுக்கு சமூக ஊடகம் என்றால் என்ன? என தெரிந்த பிறகுதான், அவளின் புகைப்படத்தை இணையத்தில் பதிவேற்றுவோம்" எனத் தெரிவித்திருந்தார்.
தலைப்பு செய்திகள்
ட்ரெண்டிங் செய்திகள்
