15 ஆண்டுகளாகத் தொடரும் இசைப் பயணம்.. ரசிகர்களுக்கு நன்றி தெரிவித்த அனிருத்!
15 Years of Anirudh : திரைத்துறையில் 15 ஆண்டுகளை நிறைவு செய்த இசையமைப்பாளர் அனிருத் ரசிகர்களுக்கு நன்றி தெரிவித்துள்ளார்

இசையமைப்பாளர் அனிருத் காவ்யா மாறன் திருமணம் நவம்பர் 12 ஆம் தேதி கிரீஸ் நாட்டில் நடைபெற்றது. வரும் நவம்பர் 21 ஆம் தேதி சென்னையில் திருமண வரவேற்பு நிகழ்ச்சி நடைபெற உள்ளது. திருமண வாழ்வில் அனிருத் அடியெடுத்து வைத்துள்ள நிலையில் தமிழ் திரைத்துறையிலும் இசையமைப்பாளராக 15 ஆண்டுகளை நிறைவு செய்துள்ளார். இதனை முன்னிட்டு தனது ரசிகர்களுக்கு அனிருத் நன்றி தெரிவித்துள்ளார்
ரசிகர்களுக்கு அனிருத் நன்றி
தனது எக்ஸ் பக்கத்தில் அனிருத் வெளியிட்டுள்ள அறிக்கையில் " 15 ஆண்டுகளுக்கு முன்பு இதே நாளில்தான் என்னுடைய முதல் பாடல் உலகம் முழுவதும் ரசிகர்களைச் சென்றடைந்தது. அன்றிலிருந்து இன்று வரை எங்களுடைய பயணம் தடையின்றித் தொடர்ந்து கொண்டிருக்கிறது.
15 ஆண்டுகள் இசை, நினைவுகள், கொண்டாட்டங்கள் என ஏராளமான அனுபவங்களைக் கொடுத்துள்ளன. தமிழ், தெலுங்கு, இந்தி, ஆங்கிலம் எனப் பல மொழிகளில் எங்களுடைய இசைப் பயணம் விரிவடைந்துள்ளது. தனி இசைப் பாடல்கள், சர்வதேச கலைஞர்களுடன் இணைந்து பணியாற்றிய அனுபவம், ரசிகர்கள் விரும்பும் எந்த மொழியிலும் பாடல்களை உருவாக்கும் வாய்ப்பு எனப் பல மகிழ்ச்சியான தருணங்கள் கிடைத்துள்ளன. நாட்டின் மிகப்பெரிய வெற்றிப் படங்களில் ஒரு பகுதியாக இசையமைக்கும் வாய்ப்பும் கிடைத்துள்ளது.
இந்தப் பயணத்தில் நாட்டின் முன்னணி இயக்குநர்கள், நடிகர்கள், தயாரிப்பாளர்கள் எனப் பலருடன் இணைந்து பணியாற்றியிருக்கிறோம். அவர்களுடன் இணைந்து இசையையும் மறக்க முடியாத நினைவுகளையும் உருவாக்கியிருக்கிறோம்.
இசை ஸ்ட்ரீமிங் தளங்களில் புதிய சாதனைகள் படைத்தது முதல் உலகம் முழுவதும் அரங்கம் நிறைந்த இசை நிகழ்ச்சிகளை நடத்தியது வரை ஏராளமான சாதனைகளைப் படைத்திருக்கிறோம். இசை ரசிகர்களின் மனதில் இடம்பிடித்து, எங்களுடைய பாடல்களை ஆயிரக்கணக்கான குரல்கள் ஒன்றாகப் பாடுவதைக் கேட்பது வார்த்தைகளால் விவரிக்க முடியாத மகிழ்ச்சி. இசை நிகழ்ச்சிகளின் உற்சாகமும், ரசிகர்களின் அன்பும் எங்களுடைய கனவுகளுக்கு அப்பாற்பட்டவை.
ஒவ்வொரு பாடலும், ஒவ்வொரு கூட்டணியும், ஒவ்வொரு இசைத்தொகுப்பும், ஒவ்வொரு மேடையும் எங்களுக்குக் கிடைத்த ஆசீர்வாதம். அதிலும் 2026 ஆம் ஆண்டு மிகவும் சிறப்பானதாக அமைந்துள்ளது. LIK, ஜனநாயகன், பாரடைஸ் மற்றும் ஜெயிலர் 2 ஆகிய படங்களில் பணியாற்றியிருப்பது 15 ஆண்டுகால இசைப் பயணத்தைக் கொண்டாடுவதற்கான சிறந்த தருணம்.
இதற்கிடையில் எங்களுடைய புதிய முயற்சியான அல்புகர்கி ரெக்கார்ட்ஸ் (Albuquerque Records) புதிய அத்தியாயத்தைத் தொடங்கியுள்ளது. எங்களுக்கு இவ்வளவு கொடுத்த இசைத்துறைக்கு மீண்டும் பங்களிக்கவும், அடுத்த தலைமுறை இசைக் கலைஞர்களுக்கு வாய்ப்புகளை உருவாக்கவும் இது ஒரு சிறந்த வாய்ப்பாக அமைந்துள்ளது.
இந்தப் பயணத்தில் எத்தனையோ சவால்களையும் வெற்றிகளையும் சந்தித்திருக்கிறோம். ஆனாலும் ஒரு நாள் கூட ஓய்வெடுக்காமல் தொடர்ந்து பயணித்துக் கொண்டிருக்கிறோம். இசை மீதான அதே காதல்தான் இன்றும் எங்களை இயக்கிக் கொண்டிருக்கிறது.
எங்களுடைய பாடல்களைக் கேட்டு, எங்களுடன் இணைந்து பாடி, கொண்டாடி, ஆதரவளித்து, எங்களை நம்பிய அனைவருக்கும் மனமார்ந்த நன்றி. இந்தப் பயணம் எங்களுக்கு எவ்வளவு சொந்தமானதோ, அதே அளவுக்கு உங்களுக்கும் சொந்தமானது.
15 ஆண்டுகள் கடந்துவிட்டன. எண்ணற்ற நினைவுகள், துரத்திச் செல்ல இன்னும் பல கனவுகள் இருக்கின்றன. மீண்டும் இசைக்கூடத்திற்குத் திரும்புகிறோம். இன்னும் சிறந்த படைப்புகள் வரவிருக்கின்றன. இது வெறும் தொடக்கம்தான். உங்கள் அனைவரையும் நேசிக்கிறோம். நன்றி!" என்று தெரிவித்துள்ளார் .
தலைப்பு செய்திகள்
ட்ரெண்டிங் செய்திகள்






















