கனவு பலித்தது... பாடகி பி. சுசீலாவை சந்தித்த விக்ரம்!

சுசீலாவின் பாடல்கள் போலவே அவரின் பேச்சும் அத்தனை இனிமையாக இருக்கிறதே என்று வியந்தார். அம்மாவிடம் பல பாடல்கள் பற்றி பேசினார். அம்மா சில பாடல்கள் பாட அவரும் உடன் பாடினார்.

சுசீலா, விக்ரம்

தமிழ் சினிமாவில் மிகச்சிறந்த நடிகர்களில் விக்ரம் ஒருவர். ரசிகர்களால் சீயான் என்று அழைக்கப்படும் விக்ரம் தான் நடிக்கும் கதாபாத்திரமாகவே மாறிவிடுவார். அவரை நேரில் சந்திக்க வேண்டுமென விக்ரமின் ரசிகர்கள் தவமாய் தவமிருக்கின்றனர்.

ஆனால் ஒருவரை சந்திக்க வேண்டுமென விக்ரமுக்கு  கனவு இருந்தது. விக்ரம் சந்திக்க விரும்பிய நபர் பின்னணி பாடகி பி.சுசீலா. விக்ரம் சுசீலாவை சந்திக்க வேண்டுமென கடந்த அக்டோபர் மாதம் தனது விருப்பத்தை வெளிப்படித்தியிருந்தார். அவரது விருப்பத்தை நிறைவேற்றும்விதமாக விக்ரமை சந்திப்பதற்கு சுசீலாவும் ஒத்துக்கொண்டார். 

இந்தச் சந்திப்பு குறித்து பாடகி பி.சுசீலாவின் அதிகாரப்பூர்வ முகநூல் பக்கத்தில், “அக்டோபர்  மாதம் ஒரு நாள் சுசீலாம்மா வீட்டிற்கு ஒரு போன்  வந்தது . நடிகர் விக்ரம் அவர்களின் மேனேஜர் பேசினார். அம்மாவின் பெரிய ரசிகர் விக்ரம் என்றும் அவர்களை சந்திக்க விரும்புவதாகவும் கூறினார். அடுத்த நாள் மாலை வரலாம் என்று அம்மா கூறினார்கள்.  

அம்மாவை பார்த்த மகிழ்ச்சி ஒரு பக்கம், பயம் கலந்த மரியாதை ஒரு பக்கம்  சிறிது நேரம் கனவுலகில் இருந்தார்  என்றால் மிகையாகாது .  அம்மா அத்தனை சகஜமாக பழகுவார் என்று அவர் எதிர்பார்க்கவில்லை , அவர்களின் பாடல்கள் போலவே அவர்களின் பேச்சும் அத்தனை   இனிமையாக இருக்கிறதே என்று வியந்தார்.  அம்மாவிடம் பல பாடல்கள் பற்றி பேசினார். அம்மா சில பாடல்கள் பாட அவரும் உடன் பாடினார். 

 

இன்றைய முன்னணி கதாநாயகர் விக்ரம் இத்தனை பணிவாக எந்த ஒரு பந்தாவும் இல்லாமல்  அத்தனை அடக்கமாக பழகியது ஆச்சரியப்படும் வகையில் இருந்தது. மனதிற்கு சந்தோஷமாகவும் இருந்தது. பத்து நிமிடம் அம்மாவை பார்த்துவிட்டு போகலாமென வந்தவர் 2 மணிநேரம் பேசிகக்கொண்டிருந்து விட்டு மனமில்லாமல் அவசர வேலையாய் கிளம்பி சென்றார். என் வாழ்க்கை கனவு நனவானது என்றும் அதற்கு அந்த ஆண்டவனுக்கு நன்றி என்றும் கூறி விட்டு சென்றார். 

அம்மாவுக்கு ஆட்சேபனை இல்லையென்றால் அடிக்கடி வருகிறேன் என்றும் கூறிவிட்டு சென்றார். நல்ல ஒரு மாலை பொழுதை எங்களுக்கு அளித்த விக்ரம் அவர்களுக்கு நன்றி. இத்தனை உயர்ந்த இடத்தில் இருக்கும் ஒரு முன்னணி நடிகர், இவ்வளவு எளிமையாக இருப்பது அபூர்வம். நன்றி விக்ரம் சார்” என பதிவிடப்பட்டுள்ளது.

பாடகி பி.சுசீலா தென்னிந்திய மொழிகளில் 50,000க்கும் மேற்பட்ட பாடல்களைப் பாடி கின்னஸ் சாதனை படைத்துள்ளார். ஐந்து முறை சிறந்த பின்னணிப் பாடகிக்கான தேசிய விருதையும் பெற்றிருக்கிறார்.

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூட்யூபில் வீடியோக்களை காண