Vijay Sethupathi in Malaysia: விஜய் சேதுபதியுடன் செல்ஃபி வேணும்... மலேசியாவில் அலைஅலையாய் திரண்ட அயல்நாட்டு ரசிகர்கள்!

இந்தோனேசியா, தாய்லாந்து ஆகிய நாடுகளில் இருந்து ஏராளமான சுற்றுலாப் பயணிகள் வருகை தரும் நிலையில், விஜய் சேதுபதியுடன் செல்ஃபி எடுத்துக் கொள்ள தினம் தினம் இவர்கள் கூடி வருகின்றனர்.

விஜய் சேதுபதியைக் காண திரண்ட மக்கள்

விஜய் சேதுபதியுடன் செல்ஃபி எடுத்துக்கொள்ள படப்பிடிப்பு தளத்தில் அலைஅலையாய் வெளிநாட்டு ரசிகர்கள் திரண்ட சம்பவம் நிகழ்ந்துள்ளது.

'மக்கள் செல்வன்' எனக் கொண்டாடப்படும் நடிகர் விஜய் சேதுபதி நடிப்பில் தயாராகி வரும் பெயரிடப்படாத திரைப்படத்தின் படப்பிடிப்பு மலேசியாவில் நடைபெற்று வருகிறது. இந்நிலையில் இந்தப்  படப்பிடிப்பு நடைபெற்று வரும் ஷூட்டிங் தளத்தில் நடிகர் விஜய் சேதுபதியை சந்திக்க மலேசியா, இந்தோனேசியா, தாய்லாந்து உள்ளிட்ட தென்கிழக்கு ஆசிய நாடுகளைச் சேர்ந்த சுற்றுலாப் பயணிகள் அதிக அளவில் வருகை தந்து வருவதாகக் கூறப்படுகிறது.

'ஒரு நல்ல நாள் பார்த்து சொல்றேன்' எனும் படத்தை இயக்கிய இயக்குநர் பி. ஆறுமுக குமார் இயக்கத்தில் தயாராகி வரும் இந்தப்  பெயரிடப்படாத படத்தில், யோகி பாபு, ருக்மணி வசந்த், பி. எஸ். அவினாஷ், திவ்யா பிள்ளை, பப்லு, ராஜ்குமார் உள்ளிட்ட பலரும் நடித்து வருகிறார்கள்.

கரண் பகதூர் ராவத் இந்தப் படத்துக்கு ஒளிப்பதிவு செய்து வருகிறார். ஜஸ்டின் பிரபாகரன் இசையமைக்கிறார். படத்தொகுப்பு பணிகளை ஆர் கோவிந்தராஜ் கவனிக்க, கலை இயக்கத்தை ஏ. கே. முத்து மேற்கொண்டு வருகிறார்.

சண்டைக் காட்சிகளை தினேஷ் சுப்பராயன் அமைத்துள்ள நிலையில், ஆக்சன் என்டர்டெய்னர் ஜானரில் தயாராகும் இந்தத் திரைப்படத்தை 7 சிஸ் என்டர்டெய்ன்மென்ட் எனும் பட நிறுவனம் சார்பில் பிரம்மாண்டமான பொருட்செலவில் தயாரித்து வருகிறது.

இப்படத்தின் படப்பிடிப்பு  முதற்கட்டமாக மலேசிய நாட்டின் வடமேற்கு பகுதியில் உள்ள ஈப்போ எனும் மாநகரில் நடைபெற்று வருகிறது.  இந்நிலையில், படப்பிடிப்பு தளத்திற்கு தினசரி உள்நாட்டிலிருந்து மட்டுமல்லாமல் இந்தோனேசியா, தாய்லாந்து ஆகிய நாடுகளில் இருந்தும் ஏராளமான சுற்றுலாப் பயணிகள் வருகை தருகின்றனர்.

அவர்கள் படப்பிடிப்பனை பார்வையிடுவதுடன், படத்தின் நாயகனான விஜய் சேதுபதியுடன் செல்ஃபி எடுத்துக் கொள்வதிலும் ஆர்வம் காண்பித்து வருகின்றனர். இதனால் படப்பிடிப்பு தளத்தில் பணியாற்றும் தொழில்நுட்ப கலைஞர்கள் மற்றும் படக்குழுவினர், சுற்றுலா பயணிகளையும், விஜய் சேதுபதியின் ரசிகர்களையும் கட்டுப்படுத்த முடியாமல் தவிப்பதாகவும் தகவல் வெளியாகியுள்ளது. 

நடிகர் விஜய் சேதுபதி தற்போது பான் இந்தியப் படங்களில்  கவனம் செலுத்தி வருகிறார். முன்னதாக இந்தியில் த ஃபேமிலி மேன் தொடர் மூலம் புகழ்பெற்ற ராஜ் அண்ட் டிகே இயக்கிய ஃபார்ஸி சீரிஸில் விஜய் சேதுபதி நடித்திருந்தார். இந்த சீரிஸ் பாசிட்டிவ் விமர்சனங்களைக் குவித்தது. இந்நிலையில் அடுத்ததாக கத்ரினா கைஃப் உடன் ‘மெர்ரி க்ரிஸ்துமஸ்’ படத்தில் இணைந்து நடித்து வருகிறார் விஜய் சேதுபதி. ஸ்ரீராம் ராகவன் இயக்கும் இந்தப்படம் இந்த ஆண்டு இறுதியில் க்ரிஸ்துமஸ் பண்டிகையை ஒட்டி வெளியாகும் என எதிர்பார்க்கப்படுகிறது.