Rajinikanth - Vasanth Ravi: ரகுவரனை நியாபகப்படுத்தியதாக சொன்ன ரஜினி... ஜெயிலர் மகன் வசந்த் ரவியின் ஹாப்பி மொமண்ட்ஸ்!

தரமணி படத்தைப் பார்த்து தனது நடிப்பை சூப்பர் ஸ்டார் ரஜினிகாந்த் பாராட்டியதாகத் தெரிவித்துள்ளார் நடிகர் வசந்த் ரவி.

வசந்த் ரவி, ரஜினிகாந்த்

தரமணி , ராக்கி முதலிய படங்களில் கதாநாயகனாக நடித்தவர் வசந்த் ரவி. வளர்ந்து வரும் நடிகர்களின் கதைகளுக்கு முக்கியத்துவம் அளித்து வரும் நடிகர்களில் வசந்த் ரவியும் ஒருவர். சினிமாவுக்கு வருகை தந்து ஆறு ஆண்டுகளை கடந்துவிட்டிருக்கும் வசந்த் ரவி, தற்போது சூப்பர் ஸ்டார் ரஜினிகாந்தின் ஜெயிலர் படத்தில் முக்கியமான கதாபாத்திரம் ஒன்றில் நடித்திருக்கிறார்.

நெல்சனின் இயக்கத்தில் சூப்பர் ஸ்டார் ரஜினியுடன் நடித்த தனது அனுபவத்தை பேட்டி ஒன்றில் பகிர்ந்துகொண்டார்.

இதனால்தான்  நடித்தேன்...

தான் நடிக்கும் படங்களின் கதையைத் தேர்வு செய்வதில் அதிக கவனம் செலுத்திவரும் வசந்த், ஜெயிலர் படத்தில் நடிக்க நினைத்ததற்கு இதுதான் காரணம் என்று கூறியிருக்கிறார்.

“நான் ஜெயிலர் படத்தில் நடிக்க சம்மதம் தெரிவித்த காரணம், முதலில் அது நெல்சன் இயக்கும் படம். இரண்டாவது ரஜினிகாந்த் நடிக்கும் படம். என்னுடைய கதாபாத்திரம் எவ்வளவு சின்னதாக இருந்தாலும் அதைப் பற்றி நான் கவலைப்படவில்லை. ரஜினிகாந்தின் அருகில் இருந்து அவரது அனுபவத்தைப் பார்த்து தெரிந்துகொள்வதே எனக்கு மிகப்பெரிய படிப்பினையாக இருக்கும் என்று நான் கருதினேன்.அதனால் இந்தப் படத்தில் நான் நடிக்க சம்மதித்தேன்” என்றார்

தரமணி பார்த்து பாராட்டிய ரஜினிகாந்த்

தரமணி படத்தின் மூலமாக கதாநாயகனாக அறிமுகமான வசந்த் ரவிக்கு  தனது நடிப்பிற்கான மிகப்பெரிய பாராட்டு ரஜினியிடம் கிடைத்திருக்கிறது. தரமணி படத்தை பார்த்த ரஜினி தனக்கு ஃபோன் செய்து வசந்த் சிற்பாக நடித்திருந்ததாகவும், மேலும் பல இடங்களில் ரகுவரனை நினைவுபடுத்தியதாகவும் கூறியிருக்கிறார் ரஜினி. திரைப்படங்களில் ரஜினிக்கு  சவால் விடும் வில்லன் கதாபாத்திரங்களில் நடித்தவர் நடிகர் ரகுவரன் அப்படியான ஒரு நடிகரை தன்னுடன் ஒப்பிட்டு பேசியது குறித்து தனது மகிழ்ச்சியைத் தெரிவித்துள்ளார் நடிகர் வசந்த் ரவி.

‘கமல்ஹாசன் எனர்ஜி உங்ககிட்ட இருக்கு’

மேலும் தரமணி படம் வெளியாகி நான்கு ஆண்டுகள் கழித்து வெளியான ராக்கி படத்தைப் பார்த்த ரஜினி அவரை மீண்டும் அழைத்து இந்த முறை என்ன சொல்லியிருக்கிறார் தெரியுமா? முன்பு ரகுவரன் என்றால் இந்த முறை ரகுவரனின் சாயல் மற்றும் கமல்ஹாசனின் என்ர்ஜி வசந்திடம் இருந்ததாக கூறியுள்ளார் ரஜினி. ரஜினியிடம் வந்த இந்த இரு பாராட்டுக்களும் தனது வாழ்க்கையில் மிக முக்கியமானத் தருணங்கள் என்று கூறியுள்ளார் வசந்த் ரவி.

ஜெயிலர்

சூப்பர்ஸ்டார் ரஜினி நடித்து நெல்சன் திலீப்குமார் இயக்கியிருக்கும் ஜெயிலர் திரைப்படம் வரும் ஆக்ஸ்ட் 10ஆம் தேதி வெளியாக இருக்கிறது. வசந்த் ரவி தமன்னா, ரம்யா கிருஷ்ணன், ஜாக்கி ஷ்ராஃப், விநாயகன், யோகிபாபு, ஷிவ ராஜ்குமார் உள்ளிட்டோர் இந்தப் படத்தில் நடித்துள்ளார்கள். ராக்ஸ்டார் அனிருத் இசையமைத்திருக்கிறார். சன் பிக்சர்ஸ் நிறுவனம் இப்படத்தை தயாரித்துள்ளது.