HBD Prabhu : கன்னக்குழி நாயகன்.. சார்மிங் நடிகர்.. பப்ளி நடிகர் பிரபு பிறந்தநாள் இன்று..

Prabhu birthday : வாரிசு நடிகர் என்றாலும் தமிழ் சினிமாவில் தனக்கென ஒரு தனி இடத்தை பிடித்த நடிகர் பிரபு பிறந்தநாள் இன்று.

பிரபு பிறந்தநாள்

நடிகர் திலகம் சிவாஜி கணேசன் என்ற மகா கலைஞனின் வாரிசு என அடையாளப்படுத்தப்பட்டாலும் தனக்கென ஒரு தனி இடத்தை தமிழ் சினிமாவில் மிகவும் ஆழமாக பதித்தவர் நடிகர் பிரபு. 200க்கும் மேற்பட்ட படங்களில் ஹீரோவாக நடித்துள்ள பிரபு தமிழ் சினிமா மட்டுமின்றி ஒரு சில தெலுங்கு மற்றும் மலையாள படங்களில் நடித்துள்ளார். இன்றும் திரைப்படங்களில் துணை கதாபாத்திரங்களில் நடித்து வரும் பிரபு இன்று தனது 67வது பிறந்தநாளை கொண்டாடுகிறார். 

பெங்களூருவில் உள்ள பிஷப் காட்டன் பள்ளியில் தனது பள்ளி படிப்பை முடித்த பிரபு தனது மாமா VC சண்முகனிடம் நிர்வாக தயாரிப்பாளராக வேலை பார்த்தார். மகன் திரைத்துறையில் நுழைவதை நடிகர் திலகம் விரும்பவில்லை என்றாலும் திரைப்பட தயாரிப்பாளர்களிடம் இருந்து தொடர்ந்து சலுகைகள் வர பிரபு ஒரு வழியாக நடிகரானார்.  

பிரபுவின் திரைப்பயணம் :

1980ல் வெளியான 'சங்கிலி' என்ற திரைப்படத்தின் மூலம் திரைத்துறையில் அடியெடுத்து வைத்தார். அதை தொடர்ந்து ஏராளமான படங்களில் ஹீரோவாகவும், துணை கதாபாத்திரங்களிலும் நடித்து வந்தார். பி. வாசு - பிரபு கூட்டணியில் உருவான குரு சிஷ்யன், தங்கச்சி படிச்சவ, அக்னி நட்சத்திரம், செந்தமிழ் பாட்டு என தொடர் வெற்றி படங்களை தொடர்ந்து  1991ம் ஆண்டு வெளியான 'சின்ன தம்பி' திரைப்படம் மிகப்பெரிய திருப்புமுனையாக அமைந்த படம். அப்படத்தில் வெகுளித்தனமான நடிப்பை சிறப்பாக வெளிப்படுத்தியதற்காக அந்த ஆண்டின் சிறந்த நடிகருக்கான தமிழ்நாடு மாநில திரைப்பட விருதை பெற்றார்.

அதை தொடர்ந்து பேமிலி ஆடியன்ஸை கவரும் படங்களாக தேர்ந்து எடுத்து நடித்து வந்தார். மேலும் மற்ற ஹீரோக்களின் படங்களில் துணை கதாபாத்திரங்களிலும் நடித்து வந்தார். 

துணை கதாபாத்திரங்கள் :

டூயட், அக்னி நட்சத்திரம், அறுவடை நாள், சார்லி சாப்ளின், சந்திரமுகி, அயன், தாமிரபரணி, உனக்கும் எனக்கும், இராவணன், மனசுக்குள் மத்தாப்பு உள்ளிட்ட ஏராளமான படங்களில் தன்னுடைய திறமையான நடிப்புக்காக சிறந்த நடிகருக்கான விருதுகளை பெற்றார். நடிகர் கமல்ஹாசனுடன் இணைந்து நடித்த வசூல் ராஜா எம்.பி.பி.எஸ், நடிகர் ரஜினிகாந்துடன் இணைந்து சந்திரமுகி உள்ளிட்ட படங்கள் மூலம் பாராட்டுகளை குவித்தார்.

நடிகர் பிரபு நடிப்பில் சமீபத்தில் நடிகர் விஜய் நடித்த வாரிசு மற்றும் இயக்குநர் மணிரத்னத்தின் 'பொன்னியின் செல்வன்' உள்ளிட்ட படங்களில் நடித்திருந்தார். 

தனிப்பட்ட வாழ்க்கை:

நடிகர் பிரபுவுக்கு 1982-ஆம் புனிதாவுடன் திருமணம் நடைபெற்றது. இந்த தம்பதியினருக்கு ஒரு மகன் மற்றும் மகள் உள்ளனர். மகன் விக்ரம் பிரபு ஏற்கனவே தமிழ் சினிமாவின் பிரபலமான நடிகராக இருந்து வருகிறார். மகள் ஐஸ்வர்யாவுக்கு சமீபத்தில் தான் இயக்குநர் ஆதிக் ரவிச்சந்திரனுடன் திருமணம் நடைபெற்றது.