TVK Candidate List: நாளை மறுநாள் தவெக வேட்பாளர் பட்டியல்; நேரடியாக அறிமுகம் செய்யும் விஜய், சைலண்ட் மோடில் சம்பவமா?
TVK Candidate List 2026: தமிழக வெற்றிக் கழகத்தின் வேட்பாளர்கள் அறிமுகக் கூட்டம், நாளை மறுநாள் (மார்ச் 27) விஜய் தலைமையில் நடைபெற உள்ளதாகத் தகவல் வெளியாகி உள்ளது.
தமிழக வெற்றிக் கழகத்தின் வேட்பாளர்கள் அறிமுகக் கூட்டம் நாளை மறுநாள் (மார்ச் 27) நடக்க உள்ளதாகத் தகவல் வெளியாகி உள்ளது. தேர்தல் அறிவிப்பு வெளியான நாளில் இருந்து இதுவரை பொதுவெளியில் எதுவும் பேசாத விஜய், நாளை மறுநாள் மாமல்லபுரத்தில் நேரடியாக வேட்பாளர்களை அறிமுகம் செய்ய உள்ளதாகவும் தகவல் கசிந்து உள்ளது.
தமிழ்நாட்டில் வெயிலைக் காட்டிலும் தேர்தல் களம் அனல் பறக்கிறது. அனைத்துக் கட்சிகளும் போட்டி போட்டுக் கொண்டு தொகுதிப் பங்கீடு, வேட்பாளர் தேர்வு ஆகியவற்றில் கவனம் செலுத்தி வருகின்றன. நாம் தமிழர், தவெக ஆகிய இரு கட்சிகளும் 234 தொகுதிகளிலும், தனித்துக் களம் காண்கின்றன.
அதிமுக வேட்பாளர் பட்டியல் வெளியீடு
மார்ச் 30ஆம் தேதி வேட்புமனுத் தாக்கல் தொடங்கும் நிலையில், அதிமுக முதற்கட்டமாக வேட்பாளர்கள் பட்டியலை வெளியிட்டுள்ளது. இதில் அதிமுகவின் நட்சத்திர முகங்கள் 23 பேர் அடங்கிய பட்டியல் உள்ளது. ஏற்கெனவே நேற்று மாலை 297 அம்சங்கள் அடங்கிய அதிமுக தேர்தல் அறிக்கை வெளியானது.
இந்த நிலையில் தவெகவில் வேட்பாளர் நேர்காணல் முழுமையாக முடியவில்லை. தவெகவில் சுமார் 120 பேருக்கு மட்டுமே இதுவரை நேரடியாக நேர்காணல் நடந்துள்ளதாகக் கூறப்படுகிறது.
117 பேர் அடங்கிய வேட்பாளர் பட்டியல்
அதனால் முதற்கட்டமாக, 117 பேர் அடங்கிய வேட்பாளர் பட்டியல் வெளியாக உள்ளதாகத் தகவல் வெளியாகி உள்ளது. இந்த வேட்பாளர்களை தவெக தலைவர் விஜய், மாமல்லபுரத்தில் நடைபெற உள்ள அறிமுகக் கூட்டத்தில் பொது மக்களுக்கு அறிமுகம் செய்ய உள்ளார்.
இதற்கிடையே மீதி தொகுதிகளுக்கும் வேட்பாளர்களைத் தேர்வு செய்யும் பணி மும்முரமாக நடைபெற்று வருகிறது. அந்தப் பணியும் விரைவில் முடிந்தால் மீதி தொகுதிகளுக்கும் சேர்த்து தவெக வேட்பாளர்கள் அறிவிக்கப்படுவார்கள் என்று தவெக வட்டாரத்தில் தகவல் வெளியாகி உள்ளது.
சென்னை தொகுதிகளில் யார் யார்?
முதற்கட்டமாக சில நாட்களுக்கு முன், தலைநகர் சென்னையில் உள்ள தொகுதிகளில் போட்டியிடும் தவெக நட்சத்திர முகங்களின் பட்டியல் வெளியானது. இதில்,
விஜய் (தலைவர்)- பெரம்பூர்
செங்கோட்டையன் ( உயர்மட்ட நிர்வாகக் குழு முதன்மைக் ஒருங்கிணைப்பாளர்)– கோபிச்செட்டி பாளையம்
ஆதவ் அர்ஜூனா (தேர்தல் வியூக மேலாண்மை பொதுச் செயலாளர்) - வில்லிவாக்கம்
புஸ்ஸி என்.ஆனந்த் (பொதுச் செயலாளர்) - தி நகர் அல்லது விழுப்புரம்
வெங்கட்ராமன் (தவெக பொருளாளர்) - மைலாப்பூர்
ஜேசிடி பிரபாகர்- ஆயிரம் விளக்கு
மரிய வில்சன் – ஆர்.கே.நகர்
அருண் ராஜ் (கொள்கை பரப்பு பொதுச் செயலாளர்)- திருச்செங்கோடு போட்டியிட உள்ளதாகக் கூறப்படுகிறது.
தேர்தல் அறிவிப்பு வெளியான நாளில் இருந்து இதுவரை பொதுவெளியில் எதுவும் பேசாத விஜய், நாளை மறுநாள் மாமல்லபுரத்தில் நேரடியாக வேட்பாளர்களை அறிமுகம் செய்ய உள்ளார். இதனால் சைலண்ட் மோடிலேயே சம்பவம் செய்ய உள்ளார் தலைவர் என்று தவெக ரசிகர்கள் சிலாகித்து வருகின்றனர்.
தலைப்பு செய்திகள்
ட்ரெண்டிங் செய்திகள்
