Puducherry Election: யார் அந்த 14 பேர்? புதுச்சேரி பாஜகவின் மெகா பிளான்... ரெடியாகும் தேர்தல் அறிக்கை!
புதுச்சேரி 2026 சட்டப்பேரவைத் தேர்தல் களம் சூடுபிடித்துள்ள நிலையில், பாஜக வேட்பாளர் பட்டியலை இறுதி செய்வதற்காக அக்கட்சியின் மாநிலத் தலைவர்கள் நாளை டெல்லிக்கு அவசரமாகப் பயணம் மேற்கொள்கின்றனர்.
புதுச்சேரி: புதுச்சேரி 2026 சட்டப்பேரவைத் தேர்தல் களம் சூடுபிடித்துள்ள நிலையில், பாஜக வேட்பாளர் பட்டியலை இறுதி செய்வதற்காக அக்கட்சியின் மாநிலத் தலைவர்கள் நாளை டெல்லிக்கு அவசரமாகப் பயணம் மேற்கொள்கின்றனர். இது தொடர்பாக புதுச்சேரி மாநில பாஜக தலைவர் வி.பி.ராமலிங்கம் இன்று செய்தியாளர்களிடம் கூறியதாவது:
வேட்பாளர் தேர்வு தீவிரம்
“இந்திய தேர்தல் ஆணையத்தின் அறிவிப்பைத் தொடர்ந்து, வேட்பு மனு தாக்கல் செய்யும் பணிகள் கடந்த திங்கள்கிழமை முதலே தொடங்கிவிட்டன. கால அவகாசம் மிகவும் குறைவாக இருப்பதால், வேட்பாளர் பட்டியலை இறுதி செய்யும் பணிகளில் கட்சி தீவிரமாக இறங்கியுள்ளது.பாஜக மேலிடத்தின் அழைப்பின் பேரில், புதுச்சேரி சட்டப்பேரவைத் தலைவர் செல்வம், உள்துறை அமைச்சர் நமச்சிவாயம் மற்றும் கட்சியின் மாநிலத் தலைவராகிய நானும் நாளை டெல்லி செல்கிறோம். அங்கு கட்சியின் உயர்மட்டக் குழுவுடன் ஆலோசனை நடத்தி வேட்பாளர்கள் இறுதி செய்யப்படுவார்கள்.”
ஒவ்வொரு தொகுதிக்கும் 3 பெயர்கள்
“தற்போதைய நிலவரப்படி, தேசிய ஜனநாயகக் கூட்டணியில் புதுச்சேரி பாஜக மற்றும் அதன் கூட்டணிக் கட்சிகளுக்கு 14 தொகுதிகள் ஒதுக்கப்பட்டுள்ளன. இதில் பாஜக போட்டியிடும் ஒவ்வொரு தொகுதிக்கும் தலா 3 உத்தேச வேட்பாளர்களின் பெயர்கள் அடங்கிய பட்டியல் தயார் செய்யப்பட்டுள்ளது. இந்தப் பட்டியலிலிருந்து தகுதியான ஒருவரை கட்சியின் மேலிடம் முடிவு செய்து, ஜனநாயக முறைப்படி அதிகாரப்பூர்வமாக அறிவிக்கும்.”
மன்சுக் மாண்டவியா வருகை
புதுச்சேரி மாநில பாஜக பொறுப்பாளரும், மத்திய அமைச்சருமான மன்சுக் மாண்டவியா இன்று மாலை புதுச்சேரி வருகிறார். அவர் இங்குள்ள தற்போதைய அரசியல் சூழல் மற்றும் தேர்தல் தயார் நிலை குறித்து விரிவான ஆய்வு மேற்கொள்ள உள்ளார்.
மோடி, அமித் ஷா பங்கேற்கும் ‘ரோடு ஷோ’
பிரச்சாரம் குறித்த திட்டங்களை விளக்கிய அவர், “வேட்பு மனு தாக்கல் முடிந்த பிறகு, பொதுமக்களைச் சந்திக்க 13 நாட்கள் மட்டுமே அவகாசம் உள்ளது. எனவே, புதுச்சேரியில் பிரம்மாண்டமான முறையில் ரோடு ஷோ (Road Show) நடத்தத் திட்டமிடப்பட்டுள்ளது. இதில் பங்கேற்க பிரதமர் நரேந்திர மோடி, மத்திய உள்துறை அமைச்சர் அமித் ஷா, பாஜக தேசியத் தலைவர் நிதின் நபின் உள்ளிட்ட முக்கியத் தலைவர்கள் ஒப்புதல் அளித்துள்ளனர். இதற்கான தேதிகள் விரைவில் அறிவிக்கப்படும். மேலும், கூட்டணியின் பொதுக்கூட்டத்திற்கான ஏற்பாடுகளும் நடைபெற்று வருகின்றன,” என்றார்.
தேர்தல் அறிக்கை
“புதுச்சேரி பாஜகவின் தேர்தல் அறிக்கை இன்னும் இரண்டு அல்லது மூன்று நாட்களில் வெளியிடப்படும். கூட்டணியில் உள்ள மற்ற கட்சிகளுக்கு எத்தனை தொகுதிகள் என்பது குறித்தும், லட்சிய ஜனநாயகக் கட்சி கூட்டணியில் நீடிப்பது குறித்தும் பாஜக தேசியத் தலைமை விரைவில் இறுதி முடிவை அறிவிக்கும்,” என வி.பி.ராமலிங்கம் தெரிவித்தார்.
தலைப்பு செய்திகள்
ட்ரெண்டிங் செய்திகள்
