Kerala Election 2026: மகளிருக்கு மாதாமாதம் ரூ.2500, 3ஆயிரம் ஓய்வூதியம்- இலவச வாக்குறுதிகளை அள்ளிவீசிய பாஜக!

BJP Manifesto Kerala Election 2026: பெண்களுக்கும் விளிம்பு நிலை மக்களுக்கும் மாதம் ரூ.3 ஆயிரம் உதவித்தொகை அளிக்கப்படும் என்று அறிவித்துள்ளது.

கேரள பாஜக வாக்குறுதி

Source : சிறப்பு ஏற்பாடு

கேரள மாநிலத்தில் சட்டமன்றத் தேர்தல் விரைவில் நடைபெற உள்ள நிலையில், பாஜக வெற்றி பெற்றால் ஏழை மகளிருக்கு மாதாமாதம் 2,500 ரூபாய் அளிக்கப்படும் என்று அக்கட்சி தேர்தல் வாக்குறுதி அளித்துள்ளது. அதேபோல பெண்களுக்கும் விளிம்பு நிலை மக்களுக்கும் மாதம் ரூ.3 ஆயிரம் உதவித்தொகை அளிக்கப்படும் என்று அறிவித்துள்ளது.

2026ஆம் ஆண்டு சட்டமன்றத் தேர்தல் கேரளாவில் ஏப்ரல் 9ஆம் தேதி நடைபெற உள்ளது. இதனால் அனைத்துக் கட்சிகளும் சூறாவளிப் பிரச்சாரத்தில் இறங்கி உள்ளன.

இந்த நிலையில், 2026 – 31ஆம் ஆண்டுக்கான கட்சியின் இலக்கு என்ற வகையில் பாஜக தனது தேர்தல் அறிக்கையை வெளியிட்டுள்ளது. இதனை பாஜக தேசியத் தலைவர் நிதின் நபின், மூத்த தலைவர்கள் முன்னிலையில் வெளியிட்டார். அப்போது என்டிஏ கூட்டணித் தலைவர்கள் ராஜீவ் சந்திரசேகர், துஷார் வேலப்பள்ளி, சபு ஜேக்கப் உள்ளிட்டோர் உடன் இருந்தனர்.  

தேர்தல் அறிக்கை

பாஜக வெற்றி பெற்றால் ஏழை மகளிருக்கு மாதாமாதம் 2,500 ரூபாய் அளிக்கப்படும் என்று அக்கட்சி உறுதி அளித்துள்ளது. பாக்‌ஷய ஆரோக்ய சுரக்‌ஷா அட்டை என்ற பெயரில் ஏழை மற்றும் வறுமைக் கோட்டுக்குக் கீழே உள்ள குடும்பங்களுக்கு இந்த அட்டை வழங்கப்பட்டு, மாதாமாதம் இந்தத் தொகை வழங்கப்படும்.

அதேபோல பெண்களுக்கும் விளிம்பு நிலை மக்களுக்கும் மாதம் ரூ.3 ஆயிரம் உதவித்தொகை அளிக்கப்படும் என்று அறிவித்துள்ளது.

ஓணம், கிறிஸ்துமஸ் பண்டிகைகளின்போது ஏழைக் குடும்பங்களுக்கு ஆண்டுதோறும் 2 இலவச சிலிண்டர்கள் வழங்கப்படும்.

எய்ம்ஸ் மருத்துவனை, சிபிஐ விசாரணை

கேரளாவில் முதல் எய்ம்ஸ் மருத்துவமனை அளிக்கப்படும். சபரிமலை கோயில் விவகாரத்தில் சிபிஐ விசாரணை மேற்கொள்ளப்படும் என்பன உள்ளிட்ட வாக்குறுதிகளையும் பாஜக அளித்துள்ளது.

தமிழ்நாட்டில் இலவசங்களுக்கு எதிராகக் குரல் எழுப்பும் பாஜக, பிற மாநிலங்களில் இலவசங்களை அறிவிப்பதாக எதிர்க் கட்சிகள் குற்றம்சாட்டி வருகின்றன.