ABP -CVoter Opinion Poll: மக்களவைத் தேர்தலில் முக்கிய மாநிலங்களின் சூழல் யாருக்கு சாதகம்? - ஏபிபி கருத்துக் கணிப்பு முடிவுகள் இதோ..!

ABP -CVoter Opinion Poll: நாடாளுமன்ற மக்களவை தேர்தலை முன்னிட்டு ஏபிபி மற்றும் சி வோட்டர்ஸ் இணைந்து, பல மாநிலங்களில் நடத்திய கருத்து கணிப்புகளின் முடிவுகள் வெளியாகியுள்ளன.

ABP CVoter கருத்துக்கணிப்பு

ABP -CVoter Opinion Poll:  ஏபிபி மற்றும் சி வோட்டர்ஸ் இணைந்து பல மாநிலங்களில் நடத்திய கருத்து கணிப்புகளின் முடிவுகள், பாஜகவிற்கு சாதகாமாகவே அமைந்துள்ளன.

ABP Cvoter மக்களவை தேர்தல் கருத்துக் கணிப்பு:

நாடாளுமன்ற மக்களவை தேர்தலை முன்னிட்டு  ABP மற்றும் Cvoter இணைந்து, நாட்டி பல மாநில மக்களின் கருத்துகளைத் திரட்டி முடிவுகளைத் வெளியிட்டுள்ளது. தேர்தல் முடிவுகளை தீர்மானிக்கும் முக்கிய மாநிலங்களில் உள்ள மக்களிடம் இருந்து கருத்துகளை சேகரித்து இந்த கருத்துக்கணிப்புகள் தயாரிக்கப்பட்டுள்ளன. அதன் முடிவில், ஒவ்வொரு மாநிலத்திலும் என்ன நிலைமை என்று கீழே விவரிக்கப்பட்டுள்ளது.

குஜராத்தில் பாஜக கொடி: 

நாட்டின் முக்கியமான மாநிலங்களில் ஒன்று குஜராத்.  அந்த மாநிலத்தின் தேர்தல் முடிவுகளை அறிய மக்கள் எப்போதும் ஆர்வமாக உள்ளனர். காரணம், மூன்றாவது முறையாக பிரதமராக வர விரும்பும் பிரதமர் மோடியின் சொந்த மாநிலம் அது. கடந்த இரண்டு முறையும் அந்த மாநிலத்தில் உள்ள 26 மக்களவைத் தொகுதிகளில் 26 இடங்களில் பாஜக வேட்பாளர்கள் வெற்றி பெற்றுள்ளனர். ABP-C Voter Opinion Poll மூன்றாவது முறையாக மோடி மீது குஜராத் மக்கள் முழு நம்பிக்கை வைத்துள்ளதாக கூறியுள்ளது. அதன்படி, குஜராத்தில் பாஜக 63 சதவீத வாக்குகளைப் பெற்று, 26 தொகுதிகளையும் கைப்பற்றும் என தெரிவித்துள்ளது. 

உத்தரப்பிரதேசத்தில் பாஜக கூட்டணி ஆதிக்கம்:

நாட்டிலேயே அதிக தொகுதிகளைக் கொண்ட உத்தரபிரதேசத்தில் எந்த கட்சிக்கு பெரும்பான்மை கிடைக்கிறதோ அவர்தான் ஆட்சி அமைப்பர். கடந்த இரண்டு தேர்தல்களிலும் பாஜக அறுதிப் பெரும்பான்மை பெற்றதற்குக் காரணம் இந்த மாநிலத்தில் கிடைத்த ஆதரவு தான். ஏபிபி-சி வோட்டர்ஸ் கருத்துக் கணிப்பில், இம்முறையும் தேசிய ஜனநாயகக் கூட்டணிக்கு பெரும் ஆதரவு கிடைக்கும் என்று தெரிவிக்கப்பட்டுள்ளது. மாநிலத்தில் மொத்தம் உள்ள 80 மக்களவை தொகுதிகளில், பாஜக தலைமையிலான தேசிய ஜனநாயக கூட்டணிக்கு 74 இடங்கள் கிடைக்கும் என கூறப்படுகிறது.  காங்கிரசுக்கு ஒரு இடமும், சமாஜ்வாதி கட்சிக்கு 5 இடங்களும் கிடைக்கும் என, கருத்து கணிப்பு முடிவுகள் தெரிவிக்கின்றன.

இமாச்சல பிரதேசம் - பாஜக முன்னிலை:

இமாச்சலப் பிரதேசத்தில் நான்கு நாடாளுமன்றத் தொகுதிகள் உள்ளன. இது காங்கிரஸ் ஆளும் மாநிலம். இருப்பினும், ABP-C வோட்டர்ஸ் கருத்துக்கணிப்பில், 4 நாடாளுமன்றத் தொகுதிகளிலும் பாஜக வெற்றி பெறுவது உறுதி என்று தெரியவந்துள்ளது. 

ஜம்மு காஷ்மீரில் யுபிஏ - லடாக்கில் பா.ஜ.க:

ஜம்மு காஷ்மீர் தேர்தல் என்றால் உலகமே உற்று நோக்கும். அந்த வகையில் இம்முறை, அங்குள்ள ஐந்து மக்களவைத் தொகுதிகளுக்கான தேர்தல் நடைபெறவுள்ளது. ஏபிபி-சி வோட்டர்ஸ் கருத்துக் கணிப்பில் காங்கிரஸ் கூட்டணிக்கு 3 இடங்களும், பாஜக கூட்டணிக்கு 2 இடங்களும் கிடைக்கும் என்று தெரிவிக்கப்பட்டுள்ளது. லடாக்கில் உள்ள ஒரு தொகுதியில் பாஜக வெற்றி பெறுவது உறுதி என கருத்துக்கணிப்பில் தெரியவந்துள்ளது. 

கேரளாவில் காங்கிரஸ் ஏறுமுகம்:

நாட்டின் மற்ற பகுதிகளில் இடதுசாரிகள் மற்றும் காங்கிரஸ் நட்புறவுடன் உள்ளது. ஆனால் கேரளாவில் இந்த இரு கட்சிகளும் கடும் எதிரிகளாக உள்ளன. இந்நிலையில் ABP-C வோட்டர்ஸ் கருத்துக்கணிப்பின்படி,  கேரளாவில் உள்ள இருபது மக்களவைத் தொகுதிகளில் காங்கிரஸ் மட்டுமே 16 தொகுதிகளை கைப்பற்றும்.  ராகுல் காந்தி வயநாட்டில் போட்டியிடுவது குறிப்பிடத்தக்கது. இம்முறையும் அவருக்கு நல்ல பெரும்பான்மை வாய்ப்பு உள்ளது. கேரளாவில் காங்கிரஸ் தலைமையிலான யுடிஎப் 45 சதவீத வாக்குகளை பெறக்கூடும்.

ராஜஸ்தானில் பாஜக அமோகம்:

சட்டசபை தேர்தலில் குழப்பம் ஏற்பட்டாலும், நாடாளுமன்ற தேர்தல் வரும்போது ​​பாஜகவிற்கு முழுமையாக ஆதரவளிக்கும் மாநிலங்களில் ராஜஸ்தானும் ஒன்று. அந்த மாநிலத்தில் இருபத்தைந்து மக்களவைத் தொகுதிகள் உள்ளன. இந்த 25 தொகுதிகளிலும் பாஜக அமோக வெற்றி பெறும் என்று ஏபிபி-சி வோட்டர்ஸ் கருத்துக்கணிப்பு தெரிவித்துள்ளது. இங்குள்ள காங்கிரஸ் தலைவர்களிடையே ஏற்பட்டுள்ள ஒற்றுமையின்மையால் அக்கட்சியின் வாய்ப்பு கடுமையாக பாதிக்கப்படும் என தெரிகிறது.

தமிழகத்தில் திமுக வெற்றி

தென்னிந்தியாவின் முக்கிய மாநிலமான தமிழகத்தில் பாஜக அல்லது அதிமுக கூட்டணிக்கு ஒரு தொகுதி கூட கிடைக்காது என கணிக்கப்பட்டுள்ளது. மாநிலத்தில் உள்ள 39 தொகுதிகளிலும் திமுக கூட்டணி வெற்றி பெறும் என ஏபிபி-சி வோட்டர்ஸ் கருத்துக்கணிப்பில் தெரியவந்துள்ளது. கடந்த தேர்தலில் பாஜகவுடன் கூட்டணி வைத்து போட்டியிட்ட அதிமுக இம்முறை தனித்து களம் காண்கிறது. பாஜகவும்  தனித்து போட்டியிடுகிறது. தமிழகத்தில் திமுக கூட்டணிக்கு 54 சதவீதத்திற்கும் அதிகமான வாக்காளர்கள் ஆதரவு அளித்துள்ளனர். 

உத்தரகாண்டிலும் பாஜக:

மலைப்பாங்கான உத்தரகண்ட் மாநிலத்தில் ஐந்து நாடாளுமன்றத் தொகுதிகள் உள்ளன. ஏபிபி-சி வாக்காளர் கருத்துக்கணிப்பின்படி, அந்த ஐந்து இடங்களிலும் பாஜக வெற்றி பெறும். 63 சதவீத வாக்காளர்கள் பாஜகவுக்கு ஆதரவளிக்கின்றனர்.

(பொறுப்பு துறப்பு: கடந்த பிப்ரவரி மாதம் 1ஆம் தேதி தொடங்கி மார்ச் மாதம் 10ஆம் தேதி வரையிலான காலக்கட்டத்தில் இந்த கருத்துக்கணிப்பு எடுக்கப்பட்டுள்ளது. margin of error is +/- 5%)