Scholarship: அமெரிக்காவில் இலவசமாகப் படிக்கலாம்! முழு உதவித்தொகை தரும் 5 முக்கியப் பல்கலைக்கழகங்கள்

மாணவர்களின் கல்விக் கட்டணம் மற்றும் வாழ்வாதாரச் செலவுகளை முழுமையாகவோ அல்லது கணிசமான அளவிலோ பல்வேறு பல்கலைக்கழகங்கள் ஏற்றுக் கொள்கின்றன.

உதவித்தொகை

Source : Getty

வெளிநாடுகளுக்குச் சென்று உயர் கல்வி கற்க விரும்பும் இந்திய மாணவர்களின் முதல் தேர்வு எப்போதுமே அமெரிக்காவாகத்தான் இருக்கிறது. தரமான கல்வி, உலகளாவிய வேலைவாய்ப்பு எனப் பல சிறப்புகள் இருந்தாலும், அங்குள்ள அதிகப்படியான கல்விக் கட்டணம் மற்றும் தங்குமிடச் செலவுகள் நடுத்தரக் குடும்பத்து மாணவர்களுக்கு ஒரு பெரிய தடையாகவே உள்ளன.

ஆனால், இந்தக் கவலையைப் போக்கும் வகையில், மாணவர்களின் கல்விக் கட்டணம் மற்றும் வாழ்வாதாரச் செலவுகளை முழுமையாகவோ அல்லது கணிசமான அளவிலோ பல்வேறு பல்கலைக்கழகங்கள் ஏற்றுக் கொள்கின்றன. அந்த வகையில் அமெரிக்காவின் 5 முக்கியப் பல்கலைக்கழகங்கள் மற்றும் அவற்றின் ஸ்காலர்ஷிப் திட்டங்கள் பற்றி இங்கே காணலாம்.

1. செயின்ட் தாமஸ் பல்கலைக்கழகம் (University of St Thomas)

மினசோட்டாவில் உள்ள இப்பல்கலைக்கழகம், பிசினஸ் படிப்பில் சேரும் மாணவர்களுக்கு ‘GHR Fellows Programme’ மூலம் முழுக் கல்விக் கட்டணச் சலுகையை வழங்குகிறது. இதுதவிர, தொழில்முனைவோராக விரும்பும் மாணவர்களுக்கு ‘Schulze Innovation’ என்ற உதவித்தொகையும் உள்ளது. இதற்குப் பள்ளிப் படிப்பில் நல்ல மதிப்பெண்கள் பெற்றிருப்பது அவசியம்.

2. நாட்ரே டேம் பல்கலைக்கழகம் (University of Notre Dame)

பண வசதி இல்லை என்பதற்காகத் திறமையான ஒரு மாணவர்கூட கல்வியை இழக்கக்கூடாது என்ற கொள்கையை இப்பல்கலைக்கழகம் பின்பற்றுகிறது. மாணவர்களின் பொருளாதாரத் தேவையை 100% பூர்த்தி செய்யும் வகையில், பாகுபாடின்றி அனைத்து வெளிநாட்டு மாணவர்களுக்கும் நிதியுதவி வழங்கப்படுகிறது.

3. கார்னல் பல்கலைக்கழகம் (Cornell University)

ஆராய்ச்சிப் படிப்பு மேற்கொள்ளும் மாணவர்களுக்கு இந்த பல்கலைக்கழகம் ஒரு வரப்பிரசாதம். இங்கு பொறியியல், அறிவியல் போன்ற துறைகளில் முனைவர் பட்டம் பயில்வோருக்குக் கல்விக் கட்டணம், மருத்துவக் காப்பீடு மற்றும் கையில் மாதாந்திர உதவித்தொகை உள்ளிட்ட முழுமையான சலுகைகள் வழங்கப்படுகின்றன.

4. மிச்சிகன் டியர்பார்ன் பல்கலைக்கழகம் (University of Michigan-Dearborn)

இங்குள்ள பொறியியல், வணிகம் மற்றும் கலைக்கல்லூரிகளில் சேரும் மாணவர்களுக்கு, அந்தந்தத் துறை ரீதியாகப் பல்வேறு பிரத்யேக நிதியுதவித் திட்டங்கள் உள்ளன.

5. வெஸ்ட் விர்ஜீனியா டெக் (WVU Tech)
   
   

பொறியியல் மற்றும் தொழில்நுட்பத்தில் ஆர்வம் உள்ளவர்களுக்கு இந்தப் பல்கலைக்கழகம் தகுதி அடிப்படையில் உதவித் தொகைகளை வழங்குகிறது.

இந்த உதவித்தொகைகளைப் பெறத் தகுதிகள், விண்ணப்பிக்க வேண்டிய கடைசி தேதி மற்றும் விதிமுறைகள் ஒவ்வொரு ஆண்டும் மாறக்கூடும். எனவே, ஆர்வம் உள்ள மாணவர்கள் சம்பந்தப்பட்ட பல்கலைக்கழகங்களின் அதிகாரப்பூர்வ இணையதளத்திற்குச் சென்று முழு விவரங்களையும் சரிபார்த்துவிட்டு விண்ணப்பிக்குமாறு அறிவுறுத்தப்பட்டுள்ளது.