Annual Exam Time Table: தமிழ்நாட்டில் 1 - 9ஆம் வகுப்பு மாணவர்களுக்கு எப்போது ஆண்டுத் தேர்வு? வெளியான அட்டவணை!

Annual Exam Time Table 2026 for 1 to 9 Tamilnadu: 1 முதல் 9ஆம் வகுப்பு மாணவர்களுக்கு ஏப்ரல் 1ஆம் தேதி முதல் 16ஆம் தேதி வரை முழு ஆண்டுத் தேர்வு நடைபெறும் என்று பள்ளிக் கல்வித்துறை தெரிவித்துள்ளது.

மாணவர்கள் | கோப்புப்படம்

Source : சிறப்பு ஏற்பாடு

தமிழ்நாட்டில் ஏப்ரல் 23ஆம் தேதி சட்டமன்றத் தேர்தல் அறிவிக்கப்பட்டுள்ள நிலையில், 1 முதல் 9ஆம் வகுப்பு மாணவர்களுக்கு ஏப்ரல் 1ஆம் தேதி முதல் 16ஆம் தேதி வரை ஆண்டுத் தேர்வு நடைபெறும் என்று பள்ளிக் கல்வித்துறை தெரிவித்துள்ளது.

முன்கூட்டியே நடத்தப்படும் தேர்வுகள் 

தேர்தல் அறிவிக்கப்பட்ட நிலையில், அதற்கு சில நாட்கள் முன்னதாக பள்ளிகளை ஒப்படைக்க வேண்டியது அவசியம். இதனால், முன்கூட்டியே தேர்வுகள் நடத்தப்படும் என்று எதிர்பார்ப்பு எழுந்தது. அதே வகையில் முழு ஆண்டுத் தேர்வு அறிவிக்கப்பட்டு உள்ளது. 

2025-2026 ஆம் கல்வியாண்டிற்கான அரசு/ அரசு உதவி பெறும்/ தனியார் பள்ளிகளுக்கு 1 முதல் 5ஆம் வகுப்பு வரையிலான மாணவர்களுக்கு ஏப்ரல் 6 முதல் 16ஆம் தேதி வரை ஆண்டு இறுதித் தேர்வுகள் உள்ளன. அதேபோல 6 முதல் 9ஆம் வகுப்பு வரையிலான மாணவர்களுக்கு ஏப்ரல் 1ஆம் தேதி முதல் 16ஆம் தேதி வரையிலும் தேர்வுகள் நடைபெற உள்ளதாக பள்ளிக் கல்வித்துறை  இயக்குநர் கண்ணப்பன் அறிவித்துள்ளார்.

யார் யாருக்கு எப்போது?

குறிப்பாக 1, 2, 3ஆம் வகுப்பு மாணவர்களுக்கு ஏப்ரல் 8ஆம் தேதி அன்று தமிழ் பாடத் தேர்வு நடைபெற உள்ளது. 13ஆம் தேதி அன்று ஆங்கிலப் பாடமும் 16ஆம் தேதி அன்று கணக்கு பாடத்துக்கான தேர்வும் நடைபெற உள்ளது.

அதேபோல 3, 4, 5ஆம் வகுப்புகளுக்கு ஏப்ரல் 6ஆம் தேதி தமிழ் மொழித் தேர்வும் 8ஆம் தேதி ஆங்கில மொழித் தேர்வும் நடைபெற உள்ளது. ஏப்ரல் 9ஆம் தேதி கணக்கு பாடமும் 13ஆம் தேதி அறிவியல் பாடமும் 16ஆம் தேதி சமூக அறிவியல் பாடத்துக்கான தேர்வும் நடக்க உள்ளன. 

 1 முதல் 9 ஆம் வகுப்பு வரையிலான மாணவர்களுக்கு  முழுஆண்டுத் தேர்வு கால அட்டவணை இதோ!

அனைத்து வகை தொடக்க/ நடுநிலை / உயர்நிலை / மேல்நிலைப் பள்ளித் தலைமையாசிரியர்கள் மற்றும் முதல்வர்களுக்கு இத்தேர்வு கால அட்டவணை குறித்த விவரத்தினை தெரிவிக்குமாறு அனைத்து மாவட்ட முதன்மைக் கல்வி அலுவலர்கள் மற்றும் அனைத்து வகை மாவட்டக் கல்வி அலுவலர்களுக்கு பள்ளிக் கல்வித்துறை அறிவித்துள்ளது.