QS World University Rankings: உலகின் டாப் பல்கலைக்கழகங்கள் எவை தெரியுமா? முதலிடத்தில் மும்பை ஐஐடி- யாருக்கு எந்த இடம்?
QS World University Rankings 2024: அமெரிக்காவின் மாசாசூசெட்ஸ் பல்கலைக்கழகம் 13 ஆண்டுகளாக முதலிடத்தில் உள்ளது. இரண்டாவது இடத்தை லண்டன் இம்பீரியல் கல்லூரி பெற்றுள்ளது.
உலகின் தலைசிறந்த பல்கலைக்கழகங்களின் பட்டியலில் இந்தியப் பல்கலைக்கழகங்கள் பெற்றுள்ள இடங்கள் குறித்து விளக்கமாகக் காணலாம்.
உலகளவில் உயர்கல்வியின் தரம் குறித்து க்யூஎஸ் (குவாக்கரெல்லி சைமண்ட்ஸ்) என்ற அமைப்பு ஆய்வு செய்து, கல்வி நிறுவனங்களின் தர வரிசைப் பட்டியலை ஒவ்வொரு ஆண்டும் வெளியிட்டு வருகிறது. 9 அம்சங்களை அடிப்படையாகக் கொண்டு, இந்த தர வரிசைப் பட்டியல் வெளியிடப்படுகிறது.
அதன்படி, கல்வி நிறுவனத்தின் நற்பெயர், ஆசிரியர்கள் பிரசுரித்த ஆய்விதழ்கள், கல்வி சார்ந்து இருக்கும் நற்பெயர், வேலைவாய்ப்புகள், நிலைத் தன்மை, ஆசிரிய-மாணவர் விகிதம், கல்வி நிறுவனங்களில் பணியாற்றும் வெளிநாட்டு ஆசிரியர்கள் எண்ணிக்கை, சர்வதேச ஆராய்ச்சி பின்புலம், வெளிநாட்டு மாணவர்களின் எண்ணிக்கை ஆகிய 9 அம்சங்களை அடிப்படையாகக் கொண்டு, மதிப்பெண்கள் வழங்கப்படுகின்றன. அதைக் கொண்டு, க்யூஎஸ் தரவரிசைப் பட்டியல் வெளியிடப்படுகிறது. இந்த ஆண்டு உலகம் முழுவதும் 105 இடங்களில் இருந்து 1,500 கல்வி நிறுவனங்கள் ஆய்வுக்காக எடுத்துக்கொள்ளப்பட்டன.
டாப் 5 கல்வி நிறுவனங்கள் எவை?
இந்த நிலையில் க்யூஎஸ் அமைப்பு தனது 21ஆவது சர்வதேச பல்கலைக்கழக தர வரிசைப்பட்டியலை இன்று (ஜூன் 19) வெளியிட்டது. அதாவது 2025ஆம் ஆண்டுக்கான க்யூஎஸ் உலக பல்கலைக்கழக தர வரிசைப் பட்டியல் இன்று வெளியாகி உள்ளது.
இதில் அமெரிக்காவைச் சேர்ந்த மாசாசூசெட்ஸ் பல்கலைக்கழகம் முதலிடத்தில் உள்ளது. 13 ஆண்டுகளாக இந்த பல்கலைக்கழகமே முதலிடத்தில் உள்ளது. இரண்டாவது இடத்தை லண்டன் இம்பீரியல் கல்லூரி பெற்றுள்ளது. அதேபோல ஆக்ஸ்ஃபோர்டு பல்கலை. 3ஆவது இடத்தையும் ஹார்வர்டு பல்கலை. 4ஆவது இடத்தையும் பிடித்துள்ளன. காம்பிரிட்ஜ் பல்கலைக்கழகம் 5ஆம் இடத்தில் உள்ளது.
க்யூஎஸ் உலக பல்கலைக்கழக தர வரிசைப் பட்டியலின் முதல் 200 இடங்களில், 2 இந்திய பல்கலைக்கழகங்கள் மட்டுமே இடம் பிடித்துள்ளன. முதல் 300 இடங்களில் 6 இந்திய கல்வி நிறுவனங்கள் இடம் பெற்றுள்ளன.
இந்தியாவில் எந்தெந்தக் கல்வி நிறுவனங்கள்?
கடந்த முறை 149வது இடத்தில் இருந்த ஐஐடி மும்பை 118ஆவது இடத்துக்கு முன்னேறி உள்ளது. ஐஐடி டெல்லி 150ஆவது இடத்தையும், ஐஐஎஸ்சி பெங்களூரு 211ஆவது இடத்தையும் பிடித்துள்ளன. ஐஐடி காரக்பூர் 222வது இடத்தில் உள்ளது. ஐஐடி சென்னை 285ஆவது இடத்தில் இருந்து 227ஆவது இடத்துக்கு முன்னேறி உள்ளது.
முதல் இடத்தில் ஐஐடி மும்பை
க்யூஎஸ் தரவரிசைப் பட்டியலில் முதல் 150 இடங்களுக்குள் இடம்பெற்ற ஒரே இந்திய பல்கலைக்கழகம் என்ற சிறப்பை ஐஐடி மும்பை பெற்றுள்ளது. அதேபோல இந்தியாவைப் பொறுத்தவரை முதல் இடத்தைப் பெற்ற கல்வி நிறுவனமாகவும் ஐஐடி மும்பை உள்ளது.
இதோ முதல் 500 இடங்களுக்குள் இடம்பெற்ற இந்தியக் கல்வி நிறுவனங்களின் பட்டியல்!
118 - ஐஐடி மும்பை
150 - ஐஐடி டெல்லி
211- ஐஐஎஸ்சி பெங்களூரு
222- ஐஐடி காரக்பூர்
227 - ஐஐடி சென்னை
263 – ஐஐடி காரக்பூர்
328 – டெல்லி பல்கலைக்கழகம் ( University of Delhi)
383- அண்ணா பல்கலைக்கழகம்
477 - ஐஐடி இந்தூர்
இந்தியாவில் இடம்பெற்றுள்ள பிற பல்கலைக்கழகங்களின் தரவரிசை குறித்து அறிய: https://www.topuniversities.com/region=Asia&countries=in
தலைப்பு செய்திகள்
ட்ரெண்டிங் செய்திகள்
