NEET PG 2024: நீட் தேர்வை கடைசி நேரத்தில் ஒத்திவைப்பதா? திருமண தேதியையே மாற்றினேன்- மன உளைச்சலில் மாணவர்கள்!

நீட் முதுகலைத் தேர்வை கடைசி நேரத்தில் ஒத்திவைப்பதா என்று கேள்வி எழுப்பியுள்ள மாணவி ஒருவர், தனது திருமண தேதியையே மாற்றியதாக வேதனையுடன் தெரிவித்துள்ளார்.

மாணவர்கள் | கோப்புப்படம்

Source : ABP Live

நீட் முதுநிலைத் தேர்வு இன்று (ஜூன் 23) நடைபெறுவதாக இருந்த நிலையில், நேற்று (ஜூன் 22) இரவு தேர்வு ஒத்திவைக்கப்படுவதாக அறிவிப்பு வெளியானது. புதிய தேதி பின்னர் அறிவிக்கப்படும் என்றும், முதுநிலை நீட் தேர்வின் செயல்பாடுகள் குறித்து முழுமையாக ஆய்வு செய்வதற்காக தேர்வுகள் ஒத்திவைக்கப்பட்டதாகவும் மத்திய சுகாதார அமைச்சகம் அறிவித்தது.

திருமணத் தேதியையே மாற்றினோம்

இந்த நிலையில் ஐஸ்வர்யா என்னும் மருத்துவர் தனியார் தொலைக்காட்சிக்கு வேதனை மல்கப் பேட்டி அளித்தார். அவர் கூறும்போது, ’’இந்தத் தேர்வுக்காக எங்களின் திருமணத் தேதியையே மாற்றினோம். தேர்வுக்காக 14 மணி நேரம் பயணித்து தெலங்கானா சென்றேன். ஆனால் கடைசி நேரத்தில் தேர்வை, சுகாதார அமைச்சகம் ரத்து செய்துவிட்டது. அரசு பொறுப்புடன் செயல்பட வேண்டும்’’ என்று கூறினார்.

கடைசி நேரத்தில் ஒத்திவைப்பதா?

இதற்கிடையே முதுநிலை நீட் தேர்வு கடைசி நேரத்தில் ஒத்திவைக்கப்பட்டது கண்டிக்கத்தக்கது என்றும் நீட் தேர்வை முழுமையாக ரத்து செய்யுங்கள் எனவும் பா.ம.க. தலைவர் அன்புமணி ராமதாஸ் வலியுறுத்தி உள்ளார்.

இதுகுறித்து இன்று அவர் வெளியிட்டுள்ள எக்ஸ் பதிவில், ’’இந்தியா முழுவதும் இன்று நடைபெறவிருந்த முதுநிலை மருத்துவ படிப்புக்கான நீட் தேர்வு கடைசி நேரத்தில் ரத்து செய்யப்பட்டு இருக்கிறது. மாணவர்களின் நலனையும், மனநிலையையும் சிறிதும் உணர்ந்து கொள்ளாமல் எடுக்கப்பட்டுள்ள இந்த முடிவு கண்டிக்கத்தக்கது.

துயரமும், அவதியும் விவரிக்க முடியாதவை

நீட் தேர்வுகள் நடத்தப்படும் விதம் தொடர்பாக பல்வேறு குற்றசாட்டுகள் எழுந்துள்ள நிலையில், நீட் தேர்வு நடத்தும் முறை வலிமையாக உள்ளதா? என்பது குறித்து ஆய்வு செய்வதற்காகவே நீட் தேர்வு ஒத்திவைக்கப்படுவதாக மத்திய சுகாதாரத்துறை அறிவித்துள்ளது. இதில் மத்திய அரசின் நோக்கம் சரியானதாக இருக்கலாம், ஆனால் இந்த முடிவால் மாணவர்கள் அனுபவித்த துயரமும், அவதியும் விவரிக்க முடியாதவை.

முதுநிலை நீட் தேர்வுக்காக விண்ணப்பித்திருந்த மாணவர்களுக்கு பல நூறு கிலோ மீட்டர்களுக்கு அப்பால் தேர்வு மையம் ஒதுக்கீடு செய்யப்பட்டிருந்தது. பலருக்கு மாநிலம் விட்டு மாநிலம் தேர்வு மையம் ஒதுக்கப்பட்டிருந்தது.

நீட் தேர்வுக்காக மாணவர்கள் இரு நாட்களுக்கு முன்னதாகவே புறப்பட்டு தேர்வு மையம் உள்ள ஊரில் தங்கியிருந்த நிலையில், கடைசி நிமிடத்தில் தேர்வு ரத்து செய்யப்பட்டிருப்பதால் மாணவர்கள் கடுமையான மன உளைச்சலுக்கு ஆளாகியுள்ளனர். குறைந்தபட்சம் நீட் தேர்வை ஒத்தி வைக்கும் முடிவை 3 நாட்களுக்கு முன்னதாக எடுத்திருந்தால் கூட இந்த மன உளைச்சலை தவிர்த்திருக்கலாம்.

நீட் தேர்வை நிரந்தரமாக ரத்து செய்க

நீட் தேர்வு அறிமுகம் செய்யப்பட்டது முதலே அதில் முறைகேடுகள் நடப்பதாக குற்றச்சாட்டுகள் எழுந்து வருகின்றன. ஆனால் கடந்த ஏழு ஆண்டுகளில் அதை போக்க முடியவில்லை. எனவே நீட் தேர்வு சிக்கலுக்கு நிரந்தர தீர்வு காணும் வகையில் அனைத்து நிலைகளிலும் நீட் தேர்வை நிரந்தரமாக ரத்து செய்ய வேண்டும் என்று வலியுறுத்துகிறேன்’’ என்று அன்புமணி தெரிவித்துள்ளார்.