NEET Fee Refund: வெளியானது விவரம்; நீட் தேர்வுக் கட்டணத்தை உடனே திரும்பப் பெறலாம்- எப்படி?

NEET Fee Refund 2026: பணப்பரிமாற்றம் நேரடியாக வங்கி கணக்கிலேயே செலுத்தப்பட உள்ளதால், மாணவர்கள் வழங்கும் வங்கி கணக்கு தற்போது செயல்பாட்டில் உள்ளதா என்பதை முன்கூட்டியே உறுதி செய்து கொள்ள வேண்டும்.

நீட் தேர்வு

Source : ABP

நீட் தேர்வு கட்டணத்தைத் திரும்பப் பெறுவதற்கான போர்ட்டல் திறக்கப்பட்டுள்ள நிலையில், வங்கி விவரங்களை ஆன்லைனில் பதிவு செய்வது எப்படி என்று காணலாம்.

2026ஆம் ஆண்டு நீட் தேர்வுக்கு விண்ணப்பித்த கட்டணத்தை திரும்பப் பெறுவதற்கான அதிகாரப்பூர்வ ஆன்லைன் போர்ட்டல் தற்போது செயல்பாட்டிற்கு வந்துள்ளது. தகுதியான மாணவர்கள், தங்களுக்குச் சேர வேண்டிய கட்டணத் தொகையைத் திரும்பப் பெறுவதற்காக, தங்களது வங்கி கணக்கு விவரங்களை உடனடியாக ஆன்லைனில் சமர்ப்பிக்கலாம் என அறிவிக்கப்பட்டுள்ளது.

நேரடியாக வங்கிக் கணக்குக்கே!

நீட் தேர்வு மற்றும் அதனையொட்டிய நடைமுறைகளின் போது மாணவர்களால் செலுத்தப்பட்ட முன்பணம் அல்லது திரும்பப் பெறத்தக்க கட்டணத்தை எந்தவிதமான இடையூறுமின்றி நேரடியாக மாணவர்களுக்கே திருப்பி அளிக்கும் பணிகள் தற்போது முடுக்கிவிடப்பட்டுள்ளன.

இதற்காக பிரத்யேகமாகத் திறக்கப்பட்டுள்ள இந்த இணையதளப் பக்கத்தில், மாணவர்கள் தங்களின் சரியான வங்கி விவரங்களைப் பதிவு செய்ய வேண்டியது கட்டாயமாகும்.

வங்கி விவரங்களை ஆன்லைனில் சமர்ப்பிப்பது எப்படி?

1. இணையதளம்: மாணவர்கள் முதலில் nta.nic.in என்னும்  அதிகாரப்பூர்வ இணையதளப் பக்கத்திற்குச் செல்ல வேண்டும்.
2. இணைப்பைக் கிளிக் செய்தல்: முகப்புப் பக்கத்தில் 'NEET Fee Refund 2026' அல்லது 'வங்கி விவரங்களைச் சமர்ப்பிக்கவும்' (Submit Bank Details) என்று குறிப்பிடப்பட்டுள்ள நேரடி இணைப்பைக் கிளிக் செய்ய வேண்டும்.
3. லாகின் செய்தல் (Login): அடுத்த பக்கத்தில், தங்களின் நீட் பதிவு எண் (Application/Roll Number) மற்றும் அதற்கான கடவுச்சொல் அல்லது பிறந்த தேதியை உள்ளிட்டு தங்களின் கணக்கிற்குள் உள்நுழைய வேண்டும்.
4. விவரங்களைப் பதிவு செய்தல்: திரையில் தோன்றும் புதிய படிவத்தில், வங்கி கணக்கு எண், வங்கியின் பெயர், வங்கியின் கிளை மற்றும் ஐ.எப்.எஸ்.சி எண் ஆகியவற்றை எவ்வித எழுத்துப் பிழையுமின்றி கவனமாகப் பதிவு செய்ய வேண்டும். குறிப்பாக, கணக்குதாரரின் பெயர் வங்கிப் புத்தகத்தில் உள்ளவாறே சரியாக இருக்க வேண்டும்.
5. சமர்ப்பித்தல்: அனைத்து விவரங்களையும் ஒருமுறைக்கு இருமுறை சரிபார்த்த பின்னர் சமர்ப்பிக்க வேண்டும். எதிர்காலத் தேவைக்காக, விவரங்கள் சமர்ப்பிக்கப்பட்டத பக்கத்தை டவுன்லோடு செய்துகொள்ளலாம்.

பணப்பரிமாற்றம் நேரடியாக வங்கி கணக்கிலேயே செலுத்தப்பட உள்ளதால், மாணவர்கள் வழங்கும் வங்கி கணக்கு தற்போது செயல்பாட்டில் உள்ளதா என்பதை முன்கூட்டியே உறுதி செய்து கொள்ள வேண்டும். இதற்கு மே 27ஆம் தேதி இரவு 11.50 மணி வரை அவகாசம் அளிக்கப்பட்டுள்ளது. 

முடக்கப்பட்ட அல்லது தவறான வங்கி கணக்கு விவரங்களை அளித்தால், பணத்தைத் திரும்பப் பெறுவதில் தேவையற்ற சிக்கல்களும் தாமதமும் ஏற்படும் என எச்சரிக்கப்பட்டுள்ளது.

https://cdnbbsr.s3waas.gov.in/s37bc1ec1d9c3426357e69acd5bf320061/uploads/2026/05/202605222022919758.pdf என்ற அறிவிக்கையில் இதுகுறித்த முழு விவரங்களும் அளிக்கப்பட்டுள்ளன.    

உதவி எண்கள்: +91-11-40759000, இ-மெயில் முகவரி: neetug2026@nta.ac.in