Tamil Integrated : உலகத் தமிழாராய்ச்சி நிறுவனத்தில் பட்டப்படிப்பு மாணவர் சேர்க்கை; இலவச விடுதி வசதி: விண்ணப்பிப்பது எப்படி?
உலகத் தமிழாராய்ச்சி நிறுவனத்தில் 2024ஆம் ஆண்டுக்கான முதுகலை தமிழ் படிப்புக்கான மாணவர் சேர்க்கை குறித்த அறிவிப்பு வெளியாகி உள்ளது.
தமிழ்நாடு அரசு அங்கீகாரத்துடன், சென்னை, தரமணியில் இயங்கும் தஞ்சாவூர் தமிழ்ப் பல்கலைக்கழக ஏற்புடன், குறைந்த கட்டணத்தில் நடத்தப்படும் ஐந்தாண்டு ஒருங்கிணைந்த தமிழ் முதுகலைப் பட்டப் படிப்புக்கு (Five Years Integrated P.G. M.A. Tamil) விண்ணப்பங்கள் வரவேற்கப்படுகின்றன.
இதுகுறித்துத் தமிழ் வளர்ச்சி இயக்குநர் கூறி உள்ளதாவது:
’’தமிழ் மொழி வளர்ச்சிக்கெனத் தமிழ்நாடு அரசால்தோற்றுவிக்கப்பட்ட உலகத் தமிழாராய்ச்சி நிறுவனத்தில் பல்வேறு கற்பித்தல் மற்றும் ஆராய்ச்சிப் பணிகள் பல ஆண்டுகளாகத் தொடர்ந்து நடைபெற்று வருகின்றன.
தமிழ்ப் பல்கலைக்கழக ஏற்புடன், தமிழ் முதுகலை பட்டப் படிப்பு (M.A. Tamil) மற்றும் ஐந்தாண்டு ஒருங்கிணைந்த தமிழ் முதுகலை பட்டப் படிப்பு படிப்புக்கு (Five Years Integrated Post Graduate MA. Tamil) மற்றும் தமிழ் முனைவர் பட்ட வகுப்பு (பிஎச்.டி) ஆகியன இந்நிறுவனத்தில் ஆண்டுதோறும் தொடர்ந்து நடத்தப் பெற்று வருகின்றது.
2024- 25ஆம் கல்வியாண்டில் தற்போது ஐந்தாண்டு ஒருங்கிணைந்த தமிழ் முதுகலை பட்ட வகுப்பிற்கான மாணவர் சேர்க்கை நடைபெற உள்ளது.
மேற்கண்ட படிப்பில் பயில விரும்புவோர் சேர்க்கை தொடர்பான விதிமுறைகள்/ தகவல்கள் மற்றும் விண்ணப்பத்தை www.ulakaththamizh.in என்ற இணைய முகவரியில் பதிவிறக்கம் செய்து தெரிந்துக் கொள்ளலாம் அல்லது நேரில் பெற்றுக் கொள்ளலாம்.
கட்டணம் இல்லா தங்கும் விடுதி வசதி
இருபாலருக்கெனத் தனித்தனியே கட்டணம் இல்லா தங்கும் விடுதி வசதி உள்ளன. நிறைவு செய்யப்பட்ட விண்ணப்பங்கள் நேரில் (அ) அஞ்சலில் இறுதியாகப் படித்த கல்விச் சான்று மற்றும் மாற்றுச்சான்றிதழ் (சான்றொப்பமிடப்பட்டது) நகலுடன் இணைத்து அனுப்ப வேண்டும்.
முகவரி என்ன?
இயக்குநர் (கூ.பொ.), உலகத் தமிழாராய்ச்சி நிறுவனம், இரண்டாம் முதன்மைச் சாலை, மையத் தொழில்நுட்பப் பயிலக வளாகம், தரமணி, சென்னை- 600 113 என்ற முகவரியில் அனுப்ப வேண்டும். விண்ணப்பங்களை 07.06.2024 - வெள்ளிக்கிழமைக்குள் அளித்தல் வேண்டும். மேலும் தகவல்பெற மேற்காணும் முகவரியில் தொடர்பு கொள்ளலாம் அல்லது நிறுவன வலைத் தளத்தில் பார்த்து தெரிந்து கொள்ளலாம்.’’
இவ்வாறு தமிழ் வளர்ச்சி இயக்குநர் தெரிவித்துள்ளார்.
தொலைபேசி எண்: 044- 22542992
கூடுதல் தகவல்களுக்கு: https://ulakaththamizh.in/
தலைப்பு செய்திகள்
ட்ரெண்டிங் செய்திகள்
