CBSE Results 2024: எந்த நேரமும் 10, 12-ஆம் வகுப்பு தேர்வு முடிவுகள் வெளியாகலாம்: சிபிஎஸ்இ தகவல்

நாடு முழுவதும் 39 லட்சம் மாணவர்கள் சிபிஎஸ்இ 10, 12ஆம் வகுப்புப் பொதுத் தேர்வுகளை எழுதி, தேர்வு முடிவுகளைக் காத்திருக்கின்றனர்.

சிபிஎஸ்இ மாணவர்கள்

மே 20ஆம் தேதி என்றில்லை. எந்த நேரமும் 10, 12ஆம் வகுப்பு தேர்வு முடிவுகள் வெளியாகலாம் என்று சிபிஎஸ்இ அதிகாரி தகவல் தெரிவித்துள்ளார். 

மத்திய இடைநிலைக் கல்வி வாரியத்தின் (சி.பி.எஸ்.இ.) 10 மற்றும் 12ம் வகுப்புகளுக்கான தேர்வுகள் பிப்ரவரி 15ம் தேதி அன்று தொடங்கின. 10ஆம் வகுப்புப் பொதுத் தேர்வு மார்ச் 13ம் தேதியும், 12ஆம் வகுப்பு தேர்வுகள் ஏப்ரல் 2ம் தேதியும் முடிவடைந்தன. இந்த ஆண்டு 12.38 லட்சம் மாணவர்கள், பிளஸ் 2 பொதுத் தேர்வை எழுத விண்ணப்பித்து இருந்தனர்.

மே 12ஆம் தேதி வெளியான 2023 தேர்வு முடிவுகள்

கடந்த ஆண்டைப் பொறுத்தவரையில், 10ஆம் வகுப்புத் தேர்வை 20,16,779 மாணவ- மாணவிகள் எழுதினர். இதில் 93.12 சதவீதம் பேர் தேர்ச்சி பெற்றனர். 12ஆம் வகுப்புப் பொதுத் தேர்வை 2023ஆம் ஆண்டு, 14,50174 மாணவர்கள் எழுதிய நிலையில், தேர்ச்சி பெற்றவர்களின் விகிதம் 90.68 ஆக இருந்தது. கடந்த ஆண்டு மே 12ஆம் தேதி, 10 மற்றும் 12ஆம் வகுப்பு மாணவர்களின் பொதுத் தேர்வு முடிவுகளை சிபிஎஸ்இ வெளியிட்டது.  

இந்த நிலையில், இந்த ஆண்டுக்கான சிபிஎஸ்இ 10, 12ஆம் வகுப்பு பொதுத் தேர்வு முடிவுகள் எப்போது (CBSE Board exam result date 2024) என்று கேள்வி எழுந்தது. சில போலித் தேதிகள் கூட இணையத்தில் வைரலாகின. இதைத் தொடர்ந்து மே 20ஆம் தேதிக்குப் பிறகு தேர்வு முடிவுகள் வெளியாகும் என்று சிபிஎஸ்இ அதிகாரப்பூர்வமாக அறிவித்தது.

எந்த நேரமும் தேர்வு முடிவுகள் வெளியாகலாம்

இந்த நிலையில் எந்த நேரமும் 10, 12ஆம் வகுப்பு தேர்வு முடிவுகள் வெளியாகலாம் என்று சிபிஎஸ்இ அதிகாரி தகவல் தெரிவித்துள்ளார். சிபிஎஸ்இ திறன் கல்வி மற்றும் பயிற்சி இயக்குனர் பிஸ்வஜித் சாஹா தனியார் நாளிதழுக்கு அளித்த பேட்டியில், ’’தேர்வு முடிவுகள் குறித்த துல்லியமான தேதியை என்னால் கூற முடியாது. ஏற்கெனவே மே 20ஆம் தேதிக்குப் பிறகே 10, 12ஆம் வகுப்புப் பொதுத்தேர்வு முடிவுகள் வெளியாகும் என்று அறிவித்து இருந்தோம்.

தேர்வு முடிவுகள் அறிவிப்புப் பணியில் சிபிஎஸ்இ வாரியம் ஈடுபட்டுள்ளது. இந்தப் பணி முடிவடைந்ததும் தேர்வு முடிவுகளை நாங்கள் எந்த நேரத்திலும் வெளியிடுவோம். மே 20ஆம் தேதிக்கு முன்னதாகவும் தேர்வு முடிவுகள் வெளியிடப்படலாம்’’ என்று பிஸ்வஜித் சாஹா தெரிவித்துள்ளார்.

மாணவர்கள் தேர்ச்சி பெறுவதற்காக, அனைத்துப் பாடங்களிலும் 33 சதவீத மதிப்பெண்களைப் பெற வேண்டியது அவசியம் ஆகும்.

கூடுதல் தகவல்களுக்கு: https://cbseresults.nic.in/