ரூ.65.99 லட்சம் மதிப்புள்ள சிகரெட் கடத்தல்... கோவை விமான நிலைய சோதனையில் அம்பலம்...

கோவை விமான நிலையத்தில் ரூ.65.99 லட்சம் மதிப்பிலான சிகரெட், இ-சிகரெட் பறிமுதல் – 11 பயணிகளிடம் விசாரணை

கோவை விமான நிலைய சிகரெட் பறிமுதல்

Source : abp nadu

கோவை சர்வதேச விமான நிலையம்-இல் மத்திய புலனாய்வுத் துறையினர் மேற்கொண்ட தீவிர சோதனையில், ரூ.65 லட்சத்து 99 ஆயிரம் மதிப்பிலான கடத்தல் பொருட்கள் பறிமுதல் செய்யப்பட்டுள்ளன.

கடந்த 11 மற்றும் 12 ஆகிய தேதிகளில், ஷார்ஜாவில் இருந்து கோவை வந்த விமானங்களில் பயணம் செய்த பயணிகளை குறிவைத்து, மத்திய புலனாய்வுத் துறையினர் மற்றும் விமான நிலைய பாதுகாப்புப் படையினர் இணைந்து திடீர் சோதனை நடத்தினர். அப்போது சந்தேகத்தின் பேரில் பரிசோதனைக்கு உட்படுத்தப்பட்ட பயணிகளிடமிருந்து பெருமளவிலான கடத்தல் பொருட்கள் கைப்பற்றப்பட்டன.

இ-சிகரெட் தடை மீறல்

இந்த சோதனையின் போது, மொத்தம் 11 விமானப் பயணிகளிடமிருந்து 3 லட்சத்து 48 ஆயிரம் சிகரெட்டுகள், 895 இ-சிகரெட்டுகள் மற்றும் 4 செல்போன்கள் பறிமுதல் செய்யப்பட்டதாக அதிகாரிகள் தெரிவித்தனர். இந்தியாவில் தடை செய்யப்பட்டுள்ள இ-சிகரெட்டுகள் மற்றும் வரி செலுத்தாமல் கொண்டு வரப்பட்ட சிகரெட்டுகள் சட்டவிரோதமாக கடத்தப்பட்டதாக முதற்கட்ட விசாரணையில் தெரிய வந்துள்ளது.

பறிமுதல் செய்யப்பட்ட பொருட்களின் மொத்த மதிப்பு ரூ.65 லட்சத்து 99 ஆயிரம் என கணக்கிடப்பட்டுள்ளது. இந்த கடத்தல் சம்பவம் விமான நிலைய பாதுகாப்பு வட்டாரத்தில் பரபரப்பை ஏற்படுத்தியுள்ளது. கடத்தப்பட்ட சிகரெட்டுகள் மற்றும் இ-சிகரெட்டுகளை உள்ளூர் சந்தைகளில் விற்பனை செய்யும் நோக்கில் கொண்டு வரப்பட்டிருக்கலாம் என அதிகாரிகள் சந்தேகம் தெரிவிக்கின்றனர்.

சிகரெட் கடத்தல் அம்பலம்

இதுதொடர்பாக, சம்பந்தப்பட்ட 11 பயணிகளிடமும் தீவிர விசாரணை மேற்கொள்ளப்பட்டு வருகிறது. கடத்தல் பொருட்கள் எந்த வலையமைப்பின் மூலம் கொண்டு வரப்பட்டன, இதன் பின்னணியில் வேறு யாரேனும் தொடர்பில் உள்ளார்களா என்பது குறித்தும் அதிகாரிகள் விசாரணை நடத்தி வருகின்றனர். மேலும், பறிமுதல் செய்யப்பட்ட செல்போன்கள் மூலம் கூடுதல் தகவல்கள் கிடைக்கும் என எதிர்பார்க்கப்படுகிறது.

கடத்தல் முயற்சிகளை கட்டுப்படுத்தும் நடவடிக்கையின் ஒரு பகுதியாக, சர்வதேச விமான நிலையங்களில் சோதனைகள் மேலும் கடுமையாக்கப்படும் என்றும், சந்தேகத்திற்குரிய பயணிகளின் மீது சிறப்பு கவனம் செலுத்தப்படும் என்றும் அதிகாரிகள் தெரிவித்துள்ளனர். விமானப் பயணிகள் சட்ட விதிமுறைகளை கடைபிடிக்க வேண்டும் என்றும் எச்சரிக்கை விடுக்கப்பட்டுள்ளது.