தாய், மகளிடம் கத்தி முனையில் கொள்ளையடித்த திருடர்களை 3 மணி நேரத்தில் பிடித்த போலீஸ்...!

புதுச்சேரி: திருமண வீட்டில் தாய், மகளைக் கட்டிப்போட்டு நகை,பணம் மற்றும் வெள்ளிப் பொருட்கள் கத்தி முனையில் கொள்ளைடித்துச் சென்ற 2 பேரை போலீசார் கைது செய்தனர்.

பறிமுதல் செய்யப்பட்ட நகைகளுடன் குற்றவாளிகள்

புதுச்சேரி மடுகரை பேட்டை அரசு தொடக்கப்பள்ளியில் ஆசிரியையாக பணிபுரிந்து வரும் பிரேமா (32), லாஸ்பேட்டையில் உள்ள சுவாமி விவேகானந்தர் வீதியில் தனது தாய் புஷ்பலதா (56) உடன் வசித்து வருகிறார். இந்த நிலையில் பிரேமாவுக்கு வரும் 20ஆம் தேதி திருமணம் நிச்சயிக்கப்பட்டுள்ளது. இதற்காக 36 சவரன் நகை, வெள்ளி பொருட்கள், பணம் ஆகியவற்றை பிரேமா தனது வீட்டில் வைத்திருந்தார். இதனிடையே அடிக்கடி தாய், மகள் இருவரும் திருமண வேலை சம்மந்தமாக வெளியே சென்று விட்டு வந்துள்ளனர். இந்நிலையில் நேற்று முன் தினம் இரவு இருவரும் வீட்டில் சாப்பிட்டு தூங்கி கொண்டிருக்கும்போது,

அதிகாலை அவர்களது அறைக்குள் திடீரென நுழைந்த 2 முகமூடி அணிந்த நபர்கள் தாய், மகள் இருவரையும் கத்தி முனையில் மிரட்டி கயிற்றால் கை, கால்களை கட்டி போட்டுள்ளனர். மேலும் சத்தம் போடாத வகையில் இருவரது வாயிலும் துணியை கொண்டு அடைத்தார். பின்னர் பீரோ சாவியை பறித்த அவர்கள் அதனை திறந்து அதிலிருந்த 36 சவரன் நகை, 4 கிலோ வெள்ளி மற்றும் 12 ஆயிரம் ரொக்கத்தை கொள்ளையடித்துக் கொண்டு தப்பிச் சென்று விட்டனர். பின்னர் வாயில் அடைத்திருந்த துணியை அகற்றிய பிரேமா, வீட்டில் நடந்த கொள்ளை சம்பவம் பற்றி  தனது சசோதரர் குமரனுக்கு தகவல் தெரிவித்தார்.

 

இதையடுத்து சம்பவ இடத்துக்கு வந்த போலீசார் விசாரணை நடத்தினர். அதில், வீட்டினுள்ளேயே பதுங்கியிருந்து கொள்ளையர்கள், கொள்ளை சம்பவத்தில் ஈடுபட்டது தெரியவந்தது. கொள்ளையர்களின் அடையாளங்கள் குறித்து தாய், மகளிடம் போலீஸார் விசாரித்த நிலையில், அதில் ஒருவரின் குரல் மட்டும் ஏற்கனவே தாங்கள் கேட்ட குரல்போல் இருப்பதாக போலீஸாரிடம் அவர்கள் தெரிவித்தனர்.

இதனையடுத்து போலீசார்  தனிப்படை அமைத்து விசாரணையை தீவிரப்படுத்தினர். இது தொடர்பாக லாஸ்பேட்டையைச் சேர்ந்த கட்டடத்தொழிலாளி அய்யனார் (22) என்பவரை பிடித்து விசாரணை நடத்தினர். அதில் பிரேமா வீட்டில் கொள்ளையில் ஈடுபட்டதை அவர் ஒப்புக்கொண்டார். அய்யனார் அவ்வப்போது பிரேமா வீட்டில் ஏதேனும் வேலைகள் இருந்தால் அங்கு சென்று செய்வது வழக்கம். அதுபோல் சென்ற போது தான் பிரேமாவின் திருமணத்துக்கு நகைகள் வாங்கி வைத்திருப்பது அவருக்கு தெரியவந்துள்ளது. இதனையடுத்து கோட்டகுப்பத்தைச் சேர்ந்த அபினாஷ் (23) என்பவருடன் சேர்ந்து பிரேமா வீட்டில் கொள்ளையடித்து தெரியவந்தது.

பின்னர் இருவரையும் கைது செய்த போலீசார் அவர்களிடம் இருந்து 36 சவரன் நகை, 4 கிலோ வெள்ளி பொருட்கள் மற்றும் 12 ஆயிரம் பணத்தை பறிமுதல் செய்தனர். இருவரையும் புதுச்சேரி நீதிமன்றத்தில் ஆஜர்படுத்தி காலாப்பட்டு மத்திய சிறையில் அடைத்தனர். கொள்ளை சம்பவம் நடந்த 3 மணி நேரத்துக்குள் கொள்ளையர்களை உடனே கைது செய்த லாஸ்பேட்டை சீனியர் எஸ்.பி. பிரதிக்ஷா கொடாரா பாராட்டினார்.