குற்றமில்லா மாவட்டமாக உருவெடுக்கும் மயிலாடுதுறை: 24 மணி நேரமும் கேமராக்களின் கண் இமைக்காத கண்காணிப்பு..!

மயிலாடுதுறை மாவட்டம் 24 மணி நேரமும் கேமராக்களின் கண் இமைக்காத கண்காணிப்பு இருக்கும் என்பதால், பொதுமக்கள் மற்றும் வணிகர்கள் மிகுந்த நிம்மதி அடைந்துள்ளனர்.

சிசிடிவி கேமரா தொடக்க நிகழ்ச்சி

Source : ABP

மயிலாடுதுறை மாவட்டத்தை பாதுகாப்பான மாவட்டமாக மாற்றும் நோக்கில், காவல் துறை மேற்கொண்டு வரும் நவீன குற்றத்தடுப்பு நடவடிக்கைகளின் ஒரு பகுதியாக, குத்தாலம் பகுதியில் சூரிய ஒளி மின்சாரத்தில் இயங்கும் அதிநவீன கண்காணிப்பு கேமராக்கள் மக்கள் பயன்பாட்டிற்கு கொண்டு வரப்பட்டுள்ளன.

ஆட்சியர் மற்றும் எஸ்.பி. தொடங்கி வைப்பு

மயிலாடுதுறை மாவட்டம் குத்தாலம் பேருந்து நிலையத்தில் நடைபெற்ற சிறப்பு விழாவில், மாவட்ட ஆட்சியர் ஹெச்.எஸ். ஸ்ரீகாந்த், மாவட்ட காவல் கண்காணிப்பாளர் கோ. ஸ்டாலின் கலந்து கொண்டு, புதிதாக நிறுவப்பட்டுள்ள கண்காணிப்பு கேமராக்களின் (CCTV) செயல்பாடுகளை ரிப்பன் வெட்டி முறைப்படி தொடங்கி வைத்தனர்.

குற்றச்சம்பவங்கள் 42% குறைவு: வியக்க வைக்கும் புள்ளிவிவரம்

இந்த நிகழ்வின் போது செய்தியாளர்களிடம் பேசிய அதிகாரிகள், மாவட்டத்தில் குற்றங்களை கட்டுப்படுத்த எடுக்கப்பட்ட தொடர் நடவடிக்கைகளின் பலன்களை விளக்கினர்.

"மயிலாடுதுறை மாவட்டத்தில் கடந்த 2024-ம் ஆண்டில் 168 திருட்டு வழக்குகள் பதிவு செய்யப்பட்டிருந்தன. ஆனால், காவல் துறையின் தீவிர ரோந்து மற்றும் விழிப்புணர்வு நடவடிக்கை மற்றும் குறிப்பாக சிசிடிவி கேமரா காட்சிகளின் பங்கின் காரணமாக 2025-ம் ஆண்டில் இந்த எண்ணிக்கை 98 ஆகக் குறைந்துள்ளது. இது கடந்த ஆண்டை விட 42 சதவீதம் குறைவு என்பது குறிப்பிடத்தக்கது."

இந்த பெரும் வீழ்ச்சிக்கு மாவட்டத்தின் எல்லைப் பகுதிகளில் அமைக்கப்பட்ட சோதனைச் சாவடிகள், இரவு நேர ரோந்துப் பணிகள் மற்றும் தொழில்நுட்ப ரீதியிலான கண்காணிப்பு ஆகியவையே முக்கிய காரணம் என கூறப்பட்டுள்ளது. 

சூரிய ஒளி மின்சாரத்தில் இயங்கும் 50 கேமராக்கள்

குற்றவாளிகளை அடையாளம் காண்பதற்கும், குற்றங்கள் நடைபெறாமல் தடுப்பதற்கும் சிசிடிவி கேமராக்கள் மிகச்சிறந்த கருவியாகச் செயல்படுகின்றன. இதனை உணர்ந்த மாவட்ட காவல் கண்காணிப்பாளர், மாவட்டத்தில் கூடுதல் கேமராக்கள் பொருத்த பரிந்துரை செய்திருந்தார்.

அதனை ஏற்று, மாவட்ட ஆட்சியர் ரூ. 15 லட்சம் நிதியினை ஒதுக்கீடு செய்தார். இந்த நிதியின் மூலம், குத்தாலம் காவல் சரகத்திற்கு உட்பட்ட 25 முக்கிய இடங்கள் கண்டறியப்பட்டன. மின்சாரத் தடையால் கண்காணிப்பு பாதிக்கப்படக் கூடாது என்பதற்காக, சூரிய ஒளி மின்சாரம் (Solar Power) மூலம் இயங்கும் வசதியுடன் கூடிய 50 அதிநவீன கேமராக்கள் தற்போது செயல்பாட்டிற்கு வந்துள்ளன.

பன்முகத்தன்மை கொண்ட குற்றத்தடுப்பு நடவடிக்கைகள்

கேமராக்கள் பொருத்துவதுடன் மட்டுமல்லாமல், மாவட்டம் முழுவதும் பல்வேறு பாதுகாப்பு முன்னெச்சரிக்கை நடவடிக்கைகள் முடுக்கி விடப்பட்டுள்ளன.

தீவிர வாகன தணிக்கை: வெளிமாவட்ட எல்லைகள் மற்றும் முக்கிய சந்திப்புகளில் 24 மணி நேரமும் வாகன சோதனை நடத்தப்படுகிறது.

* வணிகர்களுடன் ஆலோசனைக் கூட்டம்: வங்கிகள், அடகு கடைகள் மற்றும் நகைக்கடை உரிமையாளர்களுடன் அவ்வப்போது ஆலோசனைக் கூட்டங்கள் நடத்தப்பட்டு, அங்குள்ள பாதுகாப்பு ஓட்டைகளைச் சரிசெய்ய அறிவுறுத்தப்படுகிறது.

*பொதுமக்கள் விழிப்புணர்வு: பொதுமக்கள் தங்கள் வீடுகள் மற்றும் வணிக நிறுவனங்களில் சிசிடிவி கேமராக்கள் அமைப்பதன் அவசியம் குறித்து விழிப்புணர்வு ஏற்படுத்தப்பட்டு வருகிறது.

முக்கியப் பிரமுகர்கள் பங்கேற்பு

இந்தத் தொடக்க விழாவில் மயிலாடுதுறை துணை காவல் கண்காணிப்பாளர் பாலாஜி, குத்தாலம் பேரூராட்சித் தலைவர் சங்கீதா மாரியப்பன், பேரூராட்சி துணைத் தலைவர் சம்சுதீன் மற்றும் காவல்துறை உயர் அதிகாரிகள், பேரூராட்சி உறுப்பினர்கள், பொதுமக்கள் என ஏராளமானோர் கலந்து கொண்டனர்.

குத்தாலம் பேருந்து நிலையம் மற்றும் அதனைச் சுற்றியுள்ள பகுதிகளில் இனி 24 மணி நேரமும் கேமராக்களின் கண் இமைக்காத கண்காணிப்பு இருக்கும் என்பதால், பொதுமக்கள் மற்றும் வணிகர்கள் மிகுந்த நிம்மதி அடைந்துள்ளனர். "தொழில்நுட்பத்தைப் பயன்படுத்தி குற்றங்களை முளையிலேயே கிள்ளி எறியும் மாவட்ட நிர்வாகத்தின் இந்த முயற்சி மற்ற மாவட்டங்களுக்கும் ஒரு முன்னுதாரணமாக அமையும்" என சமூக ஆர்வலர்கள் பாராட்டு தெரிவித்துள்ளனர்.