Varichiyur Selvam Arrest: பிரபல ரவுடி வரிச்சியூர் செல்வம் கொலை வழக்கில் கைது

பிரபல ரவுடி வரிச்சியூர் செல்வத்தை கொலை வழக்கில் கைது செய்யப்பட்டுள்ள சம்பவம் பரபரப்பை ஏற்படுத்தியுள்ளது.

வரிச்சியூர் செல்வம்

மதுரையைச் சேர்ந்தவர் பிரபல ரவுடி வரிச்சியூர் செல்வம். இவர் மீது காவல்நிலையத்தில் ஏராளமான வழக்குகள் நிலுவையில் உள்ளது. இந்த நிலையில், கொலை வழக்கு ஒன்றில் வரிச்சியூர் செல்வத்தை விருதுநகர் மாவட்டம் சாத்தூரில் போலீசார் கைது செய்தனர்.

வரிச்சியூர் செல்வம் கைது

வரிச்சியூர் செல்வத்தின் கூட்டாளியாக இருந்தவர் செந்தில். இவருக்கும், வரிச்சியூர் செல்வத்திற்கும் இடையே மனக்கசப்பு ஏற்பட்டதால், விருதுநகர் மாவட்டத்தில் உள்ள சாத்தூரில் தனது குடும்பத்துடன் குடியேறியுள்ளார். இந்த நிலையில், வரிச்சியூர் செல்வம் அழைப்பதாக செந்திலின் மனைவி முருகலட்சுமிக்கு அழைப்பு வந்துள்ளது. அதன்பின்பு, சென்ற செந்தில் கொலை செய்யப்பட்டார்.  இந்த கொலை வழக்கின் கீழ் வழக்குப்பதிவு செய்த போலீசார் வரிச்சியூர் செல்வத்தை இன்று கைது செய்துள்ளனர்.

மதுரை மாவட்டத்தில் அமைந்துள்ளது வரிச்சியூர். இந்த பகுதியைச் சேர்ந்தவர் செல்வம். இவர் மீது கொலை வழக்கு, கட்டப்பஞ்சாயத்து வழக்கு, ஆள் கடத்தல், அடிதடி என பல வழக்குகள் காவல் நிலையத்தில் உள்ளது. தொடக்க காலத்தில் ரவுடியாக உலா வந்த இவர் திருந்தி வாழ விரும்புவதாக காவல்துறையினரிடம் உறுதி அளித்தார். இவர் மீது என்கவுன்டர் நடத்த போலீசார் நடவடிக்கை எடுத்ததாகவும் தகவல்கள் உள்ளது. இதன்பின்னரே, அவர் திருந்தி வாழ்வதாக காவல்துறையினரிடம் உத்தரவாதம் அளித்தாகவும் கூறப்படுகிறது.

உடல் முழுக்க தங்க நகைகள்:

அதன்பின்பு உடல் முழுவதும் தங்க நகைகளை அணிந்து கொண்டு பொது இடங்களில் உலா வரும் இவர் பிரபலமாகவே மாறிப்போனார். உடல் முழுவதும் கிலோகணக்கில் நகைகளை அணிந்து கொண்டு உலா வரும் வரிச்சியூர் செல்வத்தின் வீடியோக்கள் இணையத்தில் வைரலானது. தான் அணிந்திருக்கும் நகைகளுக்கு முறைப்படி வருமான வரி கட்டியுள்ளதாக விளக்கம் அளித்துள்ள வரிச்சியூர் செல்வத்தின் சொத்து மதிப்பு பல கோடி ரூபாய் ஆகும்.

கடந்த சில ஆண்டுகளுக்கு முன்பு பேட்டி அளித்த வரிச்சியூர் செல்வம், தான் ரவுடி இல்லை என்றும், அது எல்லாம் சிறிய வயதில் நடந்து முடிந்துவிட்டது என்றும், தற்போது பேரக்குழந்தைகளுடன் நேரத்தை செலவிடுவதாகவும் கூறியிருந்தார். மேலும், அந்த பேட்டியில் கடந்த 8 ஆண்டு காலத்தில் மட்டும் வழக்கறிஞர்களுக்காக மட்டும் ரூபாய் 7 கோடி செலவழித்ததாக கூறியிருந்தார்.

ஆடம்பர கார், சுற்றுப்பயணம் என்று ஆடம்பரமாக உலா வரும் வரிச்சியூர் செல்வம் கைது செய்யப்பட்டிருப்பது அவரது ஆதரவாளர்கள் மற்றும் நண்பர்களுக்கு அதிர்ச்சியை ஏற்படுத்தியுள்ளது. மேலும், இவர் வரிச்சூரான் வகையறா என்ற படத்தையும் தயாரித்து வருகிறார் என்பது குறிப்பிடத்தக்கது.

மேலும் படிக்க: Crime: சிதைந்த நிலையில் கிடைத்த பெண்ணின் உடல்.. நண்பனே கொலை செய்த கொடூரமா? பயங்கரம்..

மேலும் படிக்க: Aarudhra Chargesheet :ஆருத்ரா வழக்கின் நிலவரம் என்ன ? அடுத்த கட்டத்திற்கு எடுத்துச்சென்ற காவல்துறை .. பணம் திரும்ப கிடைக்குமா ?