Mumbai man escapes quarantine: மனைவியை பார்க்க கொரோனா க்வாரண்டைன் மையத்தில் இருந்து தப்பியோடியவர் கைது..

மும்பையில் போலீஸாருக்கு சவால் விட்டு தனிமைப்படுத்தப்பட்ட மையத்தில் இருந்து தப்பிச் சென்றவரை போலீஸார் 24 மணி நேரத்தில் கைது செய்தனர்.

தப்பித்த நபர் - நன்றி Times Now

மும்பையில் தனிமைப்படுத்தப்பட்ட மையத்தில் இருந்து தப்பிச்சென்றவரை போலீஸார் 24 மணிநேரத்திற்குள் கைது செய்தனர். சபுக்கா கான் என்ற நபர், பாந்த்ராவிற்கும் போரிவாலிக்கும் இடையில் அமைந்துள்ள பல கடைகளில் கொள்ளையடித்ததாக குற்றம்சாட்டப்பட்டு, சமீபத்தில் கைது செய்யப்பட்டார். இதையடுத்து, அவருக்கு மருத்துவ பரிசோதனை நடத்தப்பட்டது.

பரிசோதனை முடிவில், அவருக்கு கொரோனா பாசிட்டிவ் என்பது தெரியவந்தது. அதைத் தொடர்ந்து, அவர் போரிவாலி (மேற்கு) சாய் நகர் பகுதியில் உள்ள ஒரு தனிமைப்படுத்தப்பட்ட மையத்திற்கு கொண்டு செல்லப்பட்டார். அங்கு 2 நாட்களுக்குள் தனிமைப்படுத்தப்பட்ட மையத்திலிருந்து தப்பிப்பேன் என்று போலீசாருக்கு சவால் விடுத்திருந்தார். சொன்னபடி, கம்பியை வெட்டி அங்கிருந்து தப்பிச்சென்றார்.

தேடுதல் வேட்டையில் ஈடுபட்ட போலீசார் அவரை, மும்பையின் ஓஷிவாரா பகுதியில் அவரை 24 மணிநேரத்திற்குள் கைது செய்தனர். அவரிடம் விசாரணை செய்ததில், தனது மனைவியை சந்திக்க விரும்பியதால் தனிமைப்படுத்தப்பட்ட மையத்திலிருந்து தப்பித்ததாக கூறியதாக கூறப்படுகிறது. மேலும், அந்த நபர் மீது மருந்தகங்களிலிருந்து ரெம்டிசிவர் மருந்தை திருடியதாகவும் குற்றம் சாட்டப்பட்டுள்ளது.