சினிமா ஸ்டைல் செல்போன் திருட்டு... வெளியே பைக்குடன் காத்திருந்த கூட்டாளி...

கோவை வடவள்ளியில் சினிமா ஸ்டைல் திருட்டு – கூட்டாளியுடன் தப்பிய மர்ம நபர்

செல்போன் கடையில் திருட்டு

Source : abp nadu

கோவை வடவள்ளி பகுதியில் உள்ள மொபைல் விற்பனை கடையில், வாடிக்கையாளர் போல் நடித்து வந்த மர்ம நபர் ஒருவர், கடைக்காரரின் கண்ணெதிரிலேயே விலை உயர்ந்த செல்போனை பறித்துக் கொண்டு கூட்டாளியுடன் தப்பிச் சென்ற சம்பவம் பரபரப்பை ஏற்படுத்தியுள்ளது. இந்த சம்பவத்தின் சி.சி.டி.வி காட்சிகள் தற்போது வெளியாகி வியாபாரிகள் மத்தியில் அதிர்ச்சியை ஏற்படுத்தியுள்ளது.

வாடிக்கையாளர் போல நடித்து லட்சம் மதிப்புள்ள மொபைல் திருட்டு

சம்பவம் நேற்று மாலை வடவள்ளி பகுதியில் உள்ள ஒரு செல்போன் கடையில் நடந்தது. அப்போது மர்ம நபர் ஒருவர் கடைக்கு வந்து, புதிய மாடல் மொபைல் வாங்க விரும்புவதாக கூறி பல்வேறு மாடல்கள் குறித்து கடைக்காரரிடம் கேட்டறிந்தார். அவர் வாடிக்கையாளர் போல நடந்து கொண்டு, மொபைலின் சிறப்பம்சங்களை பார்க்க விரும்புவதாக கூறியுள்ளார்.

இதையடுத்து கடைக்காரர் விலை உயர்ந்த ஒரு ஸ்மார்ட்போனை எடுத்து அந்த நபரிடம் காட்டியுள்ளார். மொபைலை கையில் பிடித்து பார்த்துக்கொண்டிருந்த அந்த நபர், திடீரென மின்னல் வேகத்தில் கடையை விட்டு வெளியே ஓடினார்.

கடைக்கு வெளியே அவரது கூட்டாளி ஒருவர் இருசக்கர வாகனத்தை ஸ்டார்ட் செய்தபடி காத்திருந்ததாக கூறப்படுகிறது. ஓடி வந்த மர்ம நபர் உடனே அந்த பைக்கில் ஏறியதும், இருவரும் அங்கிருந்து வேகமாக தப்பிச் சென்றனர். திடீர் சம்பவத்தால் அதிர்ச்சி அடைந்த கடைக்காரர் அவர்களைத் துரத்திச் செல்ல முயன்றாலும், அவர்கள் கண நேரத்தில் மாயமாகி விட்டனர். 

இந்த சம்பவம் குறித்து கடை உரிமையாளர் உடனடியாக வடவள்ளி காவல் நிலையத்தில் புகார் அளித்தார். கடையில் பொருத்தப்பட்டிருந்த சி.சி.டி.வி கேமராவில் திருடனின் முகம் மற்றும் அவர்கள் தப்பிச் சென்ற வாகனம் பதிவாகியுள்ளது.

இந்த காட்சிகளின் அடிப்படையில் வடவள்ளி போலீசார் வழக்குப்பதிவு செய்து, மர்ம நபர்களை தீவிரமாக தேடி வருகின்றனர். இந்த சம்பவம் அப்பகுதி வியாபாரிகள் மத்தியில் பெரும் பதற்றத்தை ஏற்படுத்தியுள்ளது.