Crime: பிளஸ் 1 மாணவிக்கு குளிர்பானத்தில் மது கலந்து கொடுத்த இரும்பு வியாபாரி கைது!

பாலியல் பலாத்கார முயற்சியில் ஈடுபட முயன்ற போது, சிறுமிக்கு திடீரென வலிப்பு வந்துள்ளது. உடனடியாக சிறுமியை, டூவீலரில் ஏற்றி வந்து ரோட்டோரம் இறக்கி விட்டு சென்றது விசாரணையில் தெரியவந்தது.

கோவிந்தசாமி

Source : ABP Nadu original

சேலம் மாநகர் அழகாபுரம் பகுதியில், நேற்று முன்தினம் மாலை 16 வயது உடைய பிளஸ் 1 மாணவி, சாலையோரம் மயங்கிய நிலையில் வாயில் நுரை தள்ளியபடி கிடந்தார். இதனை பார்த்து அதிர்ச்சியடைந்த அக்கம்பக்கம் இருந்தவர்கள் ஓடி வந்து, மயங்கிய நிலையில் இருந்த மாணவியை மீட்டு சிகிச்சைக்காக சேலம் அரசு மோகன் குமாரமங்கலம் மருத்துவமனைக்கு அனுப்பி வைத்தனர். அப்போது மாணவி மது போதையில் இருந்துள்ளார். அவரால் உட்கார கூட முடியவில்லை. இதனால் அச்சிறுமிக்கு கட்டாயமாக மதுவை ஊற்றிக்கொடுத்த நபர்கள், பாலியல் சீண்டலில் ஈடுபட்டனரா? என்ற சந்தேகம் எழுந்தது. இதுகுறித்த தகவல் கிடைத்ததும், அஸ்தம்பட்டி உதவி கமிஷனர் அஸ்வினி, அம்மாப்பேட்டை மகளிர் இன்ஸ்பெக்டர் கஸ்தூரி மற்றும் போலீசார் தீவிர விசாரணை நடத்தினர்.

பின்னர், அச்சிறுமியை மருத்துவர்கள் பரிசோதனை செய்தனர். அவர் அளவுக்கு அதிகமான மது போதையில் இருந்ததால், போலீசாரால் விசாரணை நடத்த முடியவில்லை. அதே நேரத்தில் சம்பவ இடத்தில் நடந்த விசாரணையில், வாலிபர் ஒருவர் அச்சிறுமியை டூவீலரில் கொண்டு வந்து இறக்கி விட்டது தெரியவந்தது. இதையடுத்து அப்பகுதியில் உள்ள சிசிடிவி கேமராக்களை ஆய்வு செய்தனர். அதில் பதிவாகியிருந்த படத்தை வைத்து விசாரித்தனர். இதில் ராமன்குட்டையை சேர்ந்த கோவிந்தசாமி (36) என்பவரை போலீசார் அதிரடியாக கைது செய்தனர். இவர் பழைய இரும்பு கடை வைத்துள்ளார். அச்சிறுமியும், அதே பகுதியில் உள்ள மற்றொரு இரும்பு கடையில் வேலை செய்துள்ளார். அப்போது இரு வருக்கும் இடையே நட்பு ஏற்பட்டுள்ளது. கோவிந்த சாமிக்கு ஏற்கனவே திருமணமாகி 2 குழந்தைகள் உள்ளனர்.

இந்நிலையில், நேற்று முன்தினம் சிறுமியை அங்குள்ள காட்டு பகுதிக்கு கோவிந்தசாமி அழைத்து சென்றுள்ளார். அப்போது குளிர்பானத்தில் மதுவை ஊற்றி, குடிக்க வைத்துள்ளார். சிறுமியும் அதனை குடித்தார். சிறுமி என்பதால் உடனடியாக போதை தலைக்கேறியது. இதனை பயன்படுத்திய அவர், பாலியல் பலாத்கார முயற்சியில் ஈடுபட முயன்ற போது, சிறுமிக்கு திடீரென வலிப்பு வந்துள்ளது. இதனால் பயந்து போன அவர், உடனடியாக சிறுமியை, டூவீலரில் ஏற்றி வந்து ரோட்டோரம் இறக்கி விட்டு சென்றது விசாரணையில் தெரியவந்தது. இதையடுத்து அவர் மீது போக்சோ வழக்கு பதிவு செய்த போலீசார், கோர்ட்டில் ஆஜர்படுத்தி சிறையில் அடைத்தனர். அதே நேரத்தில் சிறுமிக்கான மருத்துவ பரிசோதனை செய்யப்பட்டுள்ளது. பரிசோதனை முடிவு வந்த பிறகு தான் முழு விவரமும் தெரியவரும் என போலீசார் தெரிவித்தனர்.