மேலும் ஒரு சதுரங்கவேட்டை ஸ்டைல் மோசடி.. 6 பேர் கைது ; ஒரு கோடி ரூபாய் கள்ளநோட்டுகள் பறிமுதல்..!

வீட்டில் வைத்து பல கோடி ரூபாய் மதிப்பிலான இரிடியம் உள்ளதாக கூறி ஒரு கும்பல், கேரளாவை சேர்ந்த நபர்களிடம் சோதனை செய்து காட்டி வருவதாக செட்டிபாளையம் காவல் துறையினருக்கு ரகசிய தகவல் கிடைத்தது.

பறிமுதல் செய்யப்பட்ட பணம்

இருடியம் இருப்பதாக நூதன முறையில் மோசடி செய்த 8 பேர் கொண்ட கும்பலை கோவை மாவட்ட காவல் துறையினர் கைது செய்து, 99.20 லட்ச ரூபாய் மதிப்பிலான கள்ள நோட்டுகளை பறிமுதல் செய்தனர்.

கோவை மாவட்டம் ஒத்தக்கால் மண்டபம் பகுதியில் உள்ள வீட்டில் வைத்து  பல கோடி ரூபாய் மதிப்பிலான இரிடியம் உள்ளதாக கூறி ஒரு கும்பல், கேரளாவை சேர்ந்த நபர்களிடம் சோதனை செய்து காட்டி வருவதாக செட்டிபாளையம் காவல் துறையினருக்கு ரகசிய தகவல் கிடைத்தது. இதன் பேரில் சம்பவ இடத்திற்கு சென்ற காவல் துறையினர் வீட்டில் சோதனை நடத்தினர். அப்போது அங்கு கட்டுக்கட்டாக கள்ள நோட்டுகள் இருப்பது தெரியவந்தது. மேலும் கவச உடை, ஆக்சிஜன் சிலிண்டர்கள் உள்ளிட்டவை வைத்திருந்ததும் தெரியவந்தது.  இதையடுத்து வீட்டில் இருந்த  6 பேரிடமும் காவல் துறையினர் தனித்தனியாக விசாரணை மேற்கொண்டனர். அப்போது இரிடியம் மற்றும் ரைஸ் புல்லிங் விற்பனை மோசடிக்கு கூடியிருந்தது தெரியவந்தது.  

முதல் கட்ட விசாரணையில் பிடிபட்டவர்கள் ராணிப்பேட்டையை சேர்ந்த தினேஷ்குமார், சூரியகுமார்,  திருப்பூர் மாவட்டத்தை சேர்ந்த போஜராஜ்,  கோவையை சேர்ந்த முருகேசன் செந்தில்குமார்,  வெங்கடேஷ் பிரபு என்பதும் தெரியவந்தது. மேலும் இவர்கள் கேரளாவை சேர்ந்த ரைஸ் புல்லிங் மோசடி கும்பலை சேர்ந்த சாஜி என்பவருடன் சேர்ந்து பணத் தேவை மற்றும் குடும்ப பிரச்சனைகள் காரணமாக ரைஸ் புல்லிங் தேவைப்படுவோரை இடைத்தரர்கள் மூலம் தேர்ந்தெடுத்து, இந்த மோசடியில் ஈடுபட்டு வந்தது தெரியவந்தது. தற்போது கேரளாவை சேர்ந்த மகரூப், அப்துல் கலாம் ஆகிய இரண்டு பேரை அனுகி தங்களிடம் 2 ஆயிரம் கோடி மதிப்பிலான இரிடியம் ரைஸ் புல்லிங் இருப்பதாக கூறிய இந்த கும்பல், பல தவணைகளாக ரூ. 27 லட்சம்  வரை பணத்தை பெற்றுள்ளனர். ஆனால் அவர்களுக்கு சந்தேகம் ஏற்படாமல் இருக்க இந்த கும்பல் சோதனை செய்து காட்டியும் பணம் பறித்து வந்துள்ளனர்.

சாதாரண வெங்கல செம்பை பெட்டிக்குள் வைத்து, பெட்டிக்குள் மிளகாய் பிரேவை அடித்து வைத்துக் கொள்கின்றனர். பின்னர் வாங்க வருவோரிடம் கவச உடைகளை அணிந்து கொண்டு வெளியே எடுக்கும் போது, அந்த இரிடியத்திற்கு சக்தி உள்ளது போல காட்டி ஏமாற்றியதும் கண்டுபிடிக்கப்பட்டது. இந்த கும்பலை சேர்ந்த ரோஜா ராஜ். முருகேசன், தினேஷ், சூரியகுமார், செந்தில் குமார், வெங்கடேஷ் ஆகிய 6 பேரை காவல் துறையினர் கைது செய்தனர். மேலும் அவர்களிடமிருந்து 99.20 லட்சம் ரூபாய் மதிப்புள்ள கள்ள நோட்டுகள், இரண்டு கவச உடைகள், ஆக்ஸிஜன் சிலிண்டர் மற்றும் 2 கார்களை பறிமுதல் செய்தனர். மேலும் இந்த மோசடியில் ஈடுபட்டு தலைமறைவான கேரளாவை சேர்ந்த சாஜி என்பவரை இரண்டு தனிப் படை அமைத்து காவல் துறையினர் தேடி வருகின்றனர்.