Year Ender 2024: தமிழ்நாடு இல்லாமலா..! ரூ.31.5 லட்சம் கோடி, நாட்டின் பொருளாதாரத்தில் யாருக்கு அதிக பங்கு? யார் முதலிடம்?

Year Ender 2024: நடப்பாண்டில் நாட்டின் பொருளாதாரத்தில் முக்கிய பங்காற்றிய மாநிலங்களின் விவரங்களை இந்த தொகுப்பில் அறியலாம்.

நாட்டின் பொருளாதார வளர்ச்சி

Source : Special Arrangement - ABP Network

Year Ender 2024: நடப்பாண்டில் நாட்டின் பொருளாதாரத்தில், தமிழ்நாட்டின் பங்களிப்பு முக்கியத்துவம் பெற்றுள்ளது.

2024ல் இந்தியாவின் பொருளாதாரம்:

2024 ஆம் ஆண்டு இந்தியப் பொருளாதாரத்திற்கு முக்கியமான மற்றும் வெற்றிகரமான ஆண்டாக விளங்கியது. 2023-24 நிதியாண்டில் இந்தியா 8.2% GDP வளர்ச்சியைப் பதிவு செய்துள்ளது, இது அரசாங்கத்தின் கணிக்கப்பட்ட 7.3% வளர்ச்சியை விட அதிகமாகும். இதன் மூலம் இந்தியாவின் ஜிடிபி 47.24 லட்சம் கோடி ரூபாயை எட்டியுள்ளது. இந்த செயல்திறன் உலகின் ஐந்தாவது பெரிய பொருளாதாரம் என்ற இந்தியாவின் நிலையை மேலும் உறுதிப்படுத்தியுள்ளது.

நாட்டின் பணக்கார மாநிலம்:

இந்தியாவின் பன்முகத்தன்மை, 28 மாநிலங்கள், 8 யூனியன் பிரதேசங்கள் மற்றும் ஒரு தலைநகரம், அதன் பொருளாதார வலிமையை வரையறுக்கிறது. இவற்றில் சில மாநிலங்கள் பிராந்திய ரீதியாக மட்டுமல்லாமல் தேசிய அளவிலும் பொருளாதார வளர்ச்சியின் முக்கிய மையங்களாக உருவெடுத்துள்ளன. மொத்த உள்நாட்டு உற்பத்தி மற்றும் ஜிஎஸ்டிபி அடிப்படையில், மகாராஷ்டிரா, தமிழ்நாடு மற்றும் கர்நாடகா ஆகியவை இந்த ஆண்டு பணக்கார மாநிலங்களாக இருந்தன.

நாட்டின் பணக்கார மாநிலம்:

நாட்டின் பொருளாதார தலைநகராக கருதப்படும் மகாராஷ்டிரா, 2024ல் பணக்கார மாநிலமாக இருந்தது. அதன் மதிப்பிடப்பட்ட மொத்த மாநில உள்நாட்டு உற்பத்தி (GSDP) ரூ. 42.67 லட்சம் கோடி. இது தேசிய மொத்த உள்நாட்டு உற்பத்தியில் 13.3% ஆகும். மகாராஷ்டிராவின் பொருளாதார வலிமையின் பெரும்பகுதி அதன் நிதிச் சேவைகள், தொழில்கள் மற்றும் திரைப்படத் துறையில் இருந்து வருகிறது. மும்பையில் தேசிய பங்குச் சந்தை மற்றும் பாம்பே பங்குச் சந்தை போன்ற நிதி நிறுவனங்கள் உள்ளன. ரிலையன்ஸ் மற்றும் டாடா போன்ற நிறுவனங்களின் தலைமையகமும் மும்பையில் தான் உள்ளன என்பது குறிப்பிடத்தக்கது.

நாட்டின் பொருளாதாரத்தில் தமிழ்நாட்டின் பங்கு:

ஆசியாவின் டெட்ராய்ட் என்று அழைக்கப்படும் தமிழ்நாடு, 31.55 லட்சம் கோடி ஜிஎஸ்டிபியுடன் நாட்டின் பணக்கார மாநிலங்களின் பட்டியலில் இரண்டாவது இடத்தில் உள்ளது. ஆட்டோமொபைல், ஜவுளி மற்றும் தகவல் தொழில்நுட்பம் போன்ற தொழில்கள் தமிழ்நாட்டின் பொருளாதாரத்திற்கு முக்கிய பங்களிப்பை வழங்குகின்றன. தமிழ்நாட்டின் தனிநபர் மொத்த உள்நாட்டு உற்பத்தி ரூ.3.50 லட்சமாக (FY 2023-24), தனிநபர் வருமானத்திலும் வலுவான மாநிலமாக உள்ளது. அதேநேரம், மாநிலத்தின் கடன் சுமை தொடர்ந்து அதிகரித்து வருவதும் நினைவுகூறத்தக்கது. மேலும், நாட்டின் பொருளாதாரத்தில் முக்கிய பங்கு வகித்தாலும், மத்திய அரசின் நிதிப்பங்கீடு போதுமானதாக இல்லை என்பது மாநில அரசின் தொடர் குற்றச்சாட்டுகளாக உள்ளன.

மூன்றாவது இடம்பிடித்த கர்நாடகா:

ரூ.28.09 லட்சம் கோடி ஜிஎஸ்டிபியுடன் கர்நாடகா மூன்றாவது இடத்தில் உள்ளது. இது தேசிய மொத்த உள்நாட்டு உற்பத்தியில் 8.2% பங்களிக்கிறது. இந்தியாவின் "சிலிகான் பள்ளத்தாக்கு" என்று அழைக்கப்படும் பெங்களூர், மாநிலத்தின் பொருளாதார சக்தியின் முக்கிய ஆதாரமாக உள்ளது. தகவல் தொழில்நுட்பம், ஸ்டார்ட்அப்கள் மற்றும் கண்டுபிடிப்புகளில் மாநிலம் முன்னணியில் உள்ளது.

நான்காவது இடத்தில் குஜராத்:

27.9 லட்சம் கோடி ஜிஎஸ்டிபியுடன் குஜராத் நான்காவது இடத்தில் உள்ளது. இது தேசிய மொத்த உள்நாட்டு உற்பத்தியில் 8.1% பங்களிக்கிறது. மாநிலம் அதன் வலுவான தொழில்துறை அடித்தளம் மற்றும் வணிக சூழலுக்கு பிரபலமானது. பெட்ரோ கெமிக்கல்ஸ், டெக்ஸ்டைல்ஸ் மற்றும் வைர பாலிஷ் போன்ற துறைகளில் மாநிலம் முன்னணியில் உள்ளது.

மற்ற மாநிலங்களின் விவரங்கள்:

• உத்தரபிரதேசம்: இந்தியாவில் அதிக மக்கள்தொகை கொண்ட இந்த மாநிலமானது, 24.99 லட்சம் கோடி GSDP மற்றும் தேசிய மொத்த உள்நாட்டு உற்பத்தியில் 8.4% பங்களிப்புடன் ஐந்தாவது இடத்தில் உள்ளது. இருப்பினும், மாநிலத்தின் தனிநபர் வருமானம் ரூ.0.96 லட்சம் மட்டுமே, இது மற்ற உயர்மட்ட மாநிலங்களை விட குறைவாக உள்ளது.
• மேற்கு வங்கம்: 18.8 லட்சம் கோடி GSDP மற்றும் 5.6% தேசிய பங்களிப்புடன் ஆறாவது இடத்தில் உள்ளது.
• தெலுங்கானா: 16.5 லட்சம் கோடி GSDP மற்றும் 4.9% பங்களிப்புடன் வேகமாக வளர்ந்து வரும் மாநிலம், இந்தப் பட்டியலில் 8வது இடத்தில் உள்ளது.
• ஆந்திரப் பிரதேசம்: 15.89 லட்சம் கோடி GSDP மற்றும் 4.7% பங்களிப்புடன் 8வது இடம்.
• டெல்லி: இந்தியாவின் தலைநகர் டெல்லியின் ஜிஎஸ்டிபி ரூ.11.07 லட்சம் கோடி. இது தேசிய மொத்த உள்நாட்டு உற்பத்தியில் 3.6% பங்களிக்கிறது.

எதிர்கால சாத்தியம்:

எஸ் அண்ட் பி குளோபல் மார்க்கெட் இன்டலிஜென்ஸின் கூற்றுப்படி, 2030க்குள் இந்தியாவின் பொருளாதாரம் 7 டிரில்லியன் டாலர்களைத் தாண்டும். இந்த அதிகரிப்புக்கு பொருளாதார ரீதியாக நாட்டின் முக்கிய மாநிலங்களின் பொருளாதார பங்களிப்பு மற்றும் அவற்றின் உள்கட்டமைப்பு ஆகியவை காரணமாக இருக்கலாம் என கூறப்படுகிறது.