Gold-Silver Price, 23 August: வாரத்தின் முதல்நாளில் குறைந்தது தங்கம்... எவ்வளவு தெரியுமா?

தங்கத்துக்கு ஹால்மார்க் முத்திரை பெறுவது விருப்பம் என இருந்த நிலையில் கட்டாயமாக்கியதற்கு கண்டனம் தெரிவித்து, தமிழ்நாட்டில் 2.30 மணி நேரம் கடைகளை அடைத்து உரிமையாளர்கள் போராட்டம் நடத்தி வருகின்றனர்.

தங்கம் - வெள்ளி நிலவரம்

சென்னையில் நேற்று ஆபரணத்தங்கம் 22 கேரட் கிராமிற்கு ரூபாய் 4 ஆயிரத்து 465-க்கு விற்கப்பட்டது. இந்த நிலையில், சென்னையில் இன்று காலை நிலவரப்படி ஆபரணத்தங்கம் கிராமிற்கு ரூபாய் 4 குறைந்து  ரூ. 4 ஆயிரத்து 461-க்கு விற்கப்படுகிறது. அதேபோல, சென்னையில் நேற்று சவரன் தங்கம் ரூபாய்  35 ஆயிரத்து 720க்கு விற்கப்பட்டது. இன்று காலை நிலவரப்படி, சென்னையில் இன்று 22 கேரட் ஆபரணத் தங்கத்தின் விலை சவரனுக்கு ரூபாய் 32 குறைந்து ரூபாய் 35 ஆயிரத்து 688க்கு விற்பனை செய்யப்படுகிறது.

24 கேரட் தங்கம் கிராம் ரூபாய் 4 ஆயிரத்து 825க்கு விற்கப்படுகிறது. சவரன் தங்கம் ரூபாய் 38 ஆயிரத்து 600க்கு விற்கப்படுகிறது. வெள்ளியின் விலை கிராமுக்கு 10 காசு அதிகரித்து ரூபாய் 66.70க்கு விற்கப்படுகிறது. வெள்ளி விலை கிலோ ரூபாய் 67,400க்கு விற்கப்படுகிறது.

இதனிடையே, தங்கத்துக்கு ஹால்மார்க் முத்திரை பெறுவது விருப்பம் என இருந்த நிலையில் கட்டாயமாக்கியதற்கு கண்டனம் தெரிவித்து, தமிழ்நாட்டில் 2.30 மணி நேரம் நகைக்கடைகளை அடைத்து உரிமையாளர்கள் போராட்டம் நடத்தி வருகின்றனர். புதிய தனி ஹாஸ்மார்க் அடையாள எண்ணுக்கு எதிர்ப்பு தெரிவித்து 35 ஆயிரம் நகைக்கடைகள் மூடப்பட்டுள்ளன. இந்திய தர நிர்ணய ஆணைய அறிவிப்புக்கு எதிர்ப்பு தெரிவித்து சென்னையில் சுமார் 1000 கடைகள் மூடப்பட்டன. இந்தியாவின் 256 மாவட்டங்களிலும் இனி தங்க விற்பனையின் தர முத்திரை கட்டாயம் என சமீபத்தில் அறிவிக்கப்பட்டது குறிப்பிடத்தக்கது.

தங்கம் விலை தொடர்ந்து அதிகரிக்குமா என்பது குறித்து மெட்ராஸ் ஜூவல்லர்ஸ் மற்றும் டைமண்ட் மெர்ச்சன்ட் அசோசியேசன் தலைவர் ஜெயந்திலால் சலானி ஏபிபி நாடுக்கு பேட்டி அளித்தார். அந்தப் பேட்டியில் அவர் கூறுகையில், ‛‛பொருளாதார மந்தமான  சூழ்நிலை ஏற்படும்போது, பொருளாதார துறையைச் சேர்ந்த பங்குச் சந்தைகள் சரிவை நோக்கிப்போகும். அப்படிப்பட்ட சூழலில் தங்கத்தின் மீது முதலீடுகள் அதிகரிக்கும். இந்த மாதிரியான சூழ்நிலை தொடர்ந்து நீடித்தால் தங்கம் விலை இன்னும் அதிகரிக்கும். காரணம் முதலீட்டாளர்களிடம் உள்ள ஒரு பீதியால், தங்கத்தின் மீது முதலீடுகள் அதிகரிக்கும். முதலீடுகள் எப்போதெல்லாம் அதிகரிக்கிறதோ, அப்போதெல்லாம் தங்கத்தின் விலை அதிகரிக்கக்கூடும் என்றார்.

மேலும், கொரோனா இரண்டாவது அலை உலகம் முழுவதும் இருந்த நிலையில், மூன்றாவது அலை சில நாடுகளில் உள்ளது. இதனால், இந்தியாவில் மட்டுமல்லாமல் உலகம் முழுவதுமே தங்கம் விலை உயரும் என்று கூறினார். கொரோனாவின் தாக்கத்தால் முதலீடுகள் அதிகரிக்கும் வாய்ப்புகள் உண்டாகும். ஏனென்றால், பங்குச்சந்தைகள் சரிவை நோக்கிப்போகும். தொழிற்துறையைச் சேர்ந்த எல்லாப் பொருட்களின் உற்பத்தி குறையும். உற்பத்தி குறைந்தால், அந்த உற்பத்தி சார்ந்த பங்குச்சந்தைகள் விலை மிகவும் குறையும். அப்படிப்பட்ட சூழ்நிலையில் முதலீட்டாளர்கள் தங்கத்தின் மீது முதலீடு செய்வார்கள். அதன் காரணமாக தங்கம் விலை உயரும் என்று கூறினார்.

மேலும், கொரோனாவின் தாக்கம் குறைந்து, பொருளாதாரம் மந்த நிலையில் இருந்து மீண்டு நல்ல நிலைக்கு சென்ற காரணத்தினால், பொருளாதார துறையைச் சேர்ந்த முதலீடுகள், பங்குச்சந்தைகள் அதிகரித்தன. அதன் காரணமாக தங்கம் விலை சரிந்தது. தற்போதைய சூழ்நிலையில் பங்குச்சந்தையில் முதலீடு செய்வதையே  முதலீட்டாளர்கள் விரும்புவார்கள். காரணம் எது லாபம் கொடுக்குமோ அதில்தான் அவர்கள் முதலீடு செய்வார்கள். இப்போதைய சூழ்நிலை இதுவே" என்று கூறினார். கொரோனா தொடர்ந்து அதிகரிக்கும்பட்சத்தில், தங்கத்தின் விலையும் தொடர்ந்து உயரும். தங்கத்தின் விலை சவரனுக்கு 40 ஆயிரம் ரூபாய் வரை கடக்க வாய்ப்புள்ளது என்றார். மீண்டும் தங்கம் விலை உயருமா, அல்லது குறையுமா என்பதை அடுத்தடுத்த நாட்களில் தெரிய வரும்" என்றார்.