Gold Rate 11th Oct.: இது உனக்கே நல்லா இருக்கா.?! மீண்டும் உயர்ந்த தங்கம் விலை; வெள்ளி விலையும் தாறுமாறாக உயர்வு

தொடர்ந்து குறையுமா என்று எண்ணியிருந்த மக்களை ஏமாற்றி, இன்று மீண்டும் விலை உயர்ந்துள்ளது தங்கம். அதற்கு போட்டியாக வெள்ளி விலையும் தாறுமாறாக உயர்ந்து வருகிறது. இன்றைய விலை நிலவரங்களை பார்க்கலாம்.

உச்சத்திற்கு செல்லும் தங்கம், வெள்ளி விலை

Source : તસવીર સોશિયલ મીડિયા

தங்கம் மற்றும் வெள்ளி விலை தொடர்ந்து உயர்வை சந்தித்து வருவது மக்களிடையே கடும் அதிர்ச்சியை ஏற்படுத்தியுள்ளது. நேற்று தங்கத்தின் விலை கணிசமாக குறைந்த நிலையில், இன்று மீண்டும் விலை உயர்ந்துள்ளது. ஆனால், வெள்ளி விலையோ தொடர்ந்து உயர்ந்து, இன்று புதிய உச்சத்தை எட்டியுள்ளது. இன்றைய தங்கம், வெள்ளி விலை நிலவரங்களை தற்போது பார்க்கலாம்.

மீண்டும் உயர்ந்த தங்கம் விலை

தங்கம் விலை தொடர் உயர்வை சந்தித்து வந்த நிலையில், நேற்று சற்று ஆறுதல் அளிக்கும் விதமாக கணிசமாக குறைந்தது. இப்படியே தொடர்ந்து விலை குறைந்தால் நன்றாக இருக்கும் என்று மக்கள் எதிர்பார்த்திருந்த நேரத்தில், அதை பொய்யாக்கி இன்று சவரனுக்கு 680 ரூபாய் உயர்ந்துள்ளது.

இந்த வாரத்தின் தொடக்க நாளான 6-ம் தேதி, அதிரடியாக விலை உயர்ந்து, புதிய உச்சத்தை அடைந்தது தங்கம். அதன்படி, ஒரு கிராம் 11,060 ரூபாய்க்கும், ஒரு சவரன் 88,480 ரூபாய்க்கும் விற்பனை செய்யப்பட்டது. இந்நிலையில், அன்று மாலையே மீண்டும் விலை உயர்ந்து, சவரன் 89 ஆயிரத்தை அடைந்தது. அதன்படி, ஒரு கிராம் 11,125 ரூபாய்க்கும், ஒரு சவரன் சரியாக 89,000 ரூபாய்க்கும் விற்கப்பட்டது.

அதைத் தொடர்ந்து, 7-ம் தேதி மீண்டும் விலை உயர்ந்து புதிய உச்சத்திற்கு சென்ற தங்கம், ஒரு கிராம் 11,200 ரூபாய்க்கும், ஒரு சவரன் 89,600 ரூபாய்க்கும் விற்பனை செய்யப்பட்டது. இந்நிலையில் 8-ம் தேதி மீண்டும் அதிரடியாக விலை உயர்ந்து, ஒரு சவரன் 90 ஆயிரம் ரூபாயை கடந்தது. அதன்படி, கிராமிற்கு 100 ரூபாய் விலை உயர்ந்து ஒரு கிராம் 11,300 ரூபாய்க்கும், சவரனுக்கு 800 ரூபாய் விலை உயர்ந்து ஒரு சவரன் 90,400 ரூபாய்க்கும் விற்பனை செய்யப்பட்டது. 

தொர்ந்து அன்று மாலையே மீண்டும் விலை உயர்ந்து சவரன் 91 ஆயிரம் ரூபாயை கடந்தது. அதன்படி, ஒரு கிராம் தங்கம் 11,385 ரூபாய்க்கும், ஒரு சவரன் 91,080 ரூபாய்கும் விற்கப்பட்டது. இந்நிலையில், 9-ம் தேதி மீண்டும் விலை உயர்ந்து புதிய உச்சத்தை அடைந்தது தங்கம் விலை. அதன்படி, ஒரு கிராம் 11,400 ரூபாய்க்கும், ஒரு சவரன் 91,200 ரூபாய்க்கும் விற்பனையானது.

இப்படிப்பட்ட சூழலில், 10-ம் தேதியான நேற்று தங்கத்தின் விலை அதிரடியாக சவரனுக்கு 1,320 ரூபாய் குறைந்தது. அதன்படி, கிராமிற்கு 165 குறைந்து ஒரு கிராம் 11,260 ரூபாய்க்கும், ஒரு சவரன் 90,080 ரூபாய்க்கும் விற்பனையானது. ஆனாலும், மாலையில் விலை உயர்ந்து, ஒரு கிராம் 11,340 ரூபாய்க்கும், ஒரு சவரன் 90,720 ரூபாய்க்கும் விற்கப்பட்டது.

இந்நிலையில், இன்று காலை தங்கத்தின் விலை மீண்டும் உயர்ந்தது. அதன்படி கிராமிற்கு 85 ரூபாய் விலை உயர்ந்து ஒரு கிராம் 11,425 ரூபாய்க்கும், சவரனுக்கு 680 ரூபாய் விலை உயர்ந்து, ஒரு சவரன் 91,400 ரூபாய்க்கும் விற்கப்படுகிறது.

தாறுமாறாக உயர்ந்துவரும் வெள்ளியின் விலை

தங்கத்தோடு போட்டி போட்டு உயர்ந்துவரும் வெள்ளியின் விலை கிராமிற்கு 3 ரூபாய் உயர்ந்து புதிய உச்சத்தை அடைந்துள்ளது. 

கடந்த 6-ம் தேதி 2 ரூபாய் விலை உயர்ந்து, கிராம் 167 ரூபாயை எட்டியது வெள்ளி. அதைத் தொடர்ந்து, 7-ம் தேதி அதே விலையில் நீடித்த வெள்ளி, 8-ம் தேதி ஒரு கிராமிற்கு 3 ரூபாய் விலை உயர்ந்து, புதிய உச்சமாக கிராம் 170 ரூபாய்க்கு சென்றது.

இந்நிலையில், 9-ம் தேதி மீண்டும் விலை உயர்ந்த வெள்ளி, ஒரு கிராம் 177 ரூபாயாக மற்றொரு புதிய உச்சத்தை அடைந்தது.  இந்த சூழலில், 10-ம் தேதியான நேற்று மீண்டும் விலை உயர்ந்த வெள்ளி, ஒரு கிராம் 180 ரூபாயாகவும், ஒரு கிலோ பார் வெள்ளி 1 லட்சத்து 80 ஆயிரம் ரூபாயாகவும் விற்பனையானது.

இந்நிலையில், நேற்று மாலையில் மீண்டும் அதிரடியாக கிராமிற்கு 4 ரூபாய் விலை உயர்ந்து, ஒரு கிராம் 184 ரூபாய் என்ற புதிய உச்சத்திற்கு சென்றது. இச்சூழலில், இன்று மீண்டும் 3 ரூபாய் விலை உயர்வை சந்தித்து, கிராம் 187 ரூபாய் என்ற வரலாறு காணாத உச்ச விலைக்கு சென்றுள்ளது. அதன்படி, ஒரு கிலோ பார் வெள்ளி 1 லட்சத்து 87 ஆயிரம் ரூபாயாக விற்பனையாகிறது.

தங்கத்துடன் போட்டி போட்டி வெள்ளி விலையும் தொடர்ந்து அதிகரித்து வருவது, பொதுமக்களிடையே பெரும் அச்சத்தை ஏற்படுத்தியுள்ளது.