Ducati: உலகின் மிகக் குறைந்த எடையில் சூப்பர் பைக்- காற்றில் மிதக்கும் வேகம்! களமிறக்கிய டுகாட்டி- விலை எவ்ளோ?

Ducati Superleggera V4: டுகாட்டி சூப்பர்லெகரா வி4 சென்டினாரியோ மாடல், தற்போது உலகின் மிகக் குறைந்த எடைகொண்ட சூப்பர் பைக் என்ற பிரம்மாண்டமான பெருமையைப் பெற்றுள்ளது.

டுகாட்டி பைக்

Source : சிறப்பு ஏற்பாடு

பைக் பிரியர்களின் சொப்பன வாகனமாகத் திகழும் இத்தாலியின் பிரபல டுகாட்டி (Ducati) நிறுவனம், தற்போது ஆட்டோமொபைல் உலகமே வியந்து பார்க்கும் வகையில் ஒரு புதிய பைக்கை அறிமுகப்படுத்தியுள்ளது.

என்ன மாடல் பைக்?

டுகாட்டி சூப்பர்லெகரா வி4 சென்டினாரியோ (Ducati Superleggera V4 Centenario) எனப் பெயரிடப்பட்டுள்ள இந்த மாடல், தற்போது உலகின் மிகக் குறைந்த எடைகொண்ட சூப்பர் பைக் என்ற பிரம்மாண்டமான பெருமையைப் பெற்றுள்ளது.

எடை குறைவு... ஆனால் பவரில் அசுரன்!

சூப்பர் பைக் என்றாலே அதீத எடையும், உறுமலான சத்தமும் தான் பலருக்கும் நினைவுக்கு வரும். ஆனால், இந்த பைக் அந்த இலக்கணத்தையே முற்றிலுமாக மாற்றியெழுதியுள்ளது. பைக்கின் எடையைக் குறைப்பதற்காக, இதன் பிரேம், ஸ்விங் ஆர்ம் மற்றும் சக்கரங்கள் எனப் பல முக்கிய பாகங்களை முழுவதுமாக கார்பன் ஃபைபரால் உருவாக்கியுள்ளது டுகாட்டி.

இதனால் இதன் எடை நம்ப முடியாத அளவுக்குக் குறைக்கப்பட்டுள்ளது. வெறும் 152 கிலோ எடை மட்டுமே கொண்ட இந்த பைக், ரேஸ் டிராக்கில் இறங்கினால் பறவை போல சீறிப்பாயும் வகையில் ஏரோடைனமிக்ஸ் தொழில்நுட்பத்துடன் வடிவமைக்கப்பட்டுள்ளது.

இதில் சக்திவாய்ந்த டெஸ்மோசெடிசி ஸ்ட்ராடேல் வி4 இன்ஜின் பொருத்தப்பட்டுள்ளது. இது சுமார் 234 குதிரைத்திறனை அநாயாசமாக வெளிப்படுத்தும் ஆற்றல் கொண்டது.

கோடிகளைத் தாண்டும் விலை!

 இது ஒரு ஸ்பெஷல் லிமிடெட் எடிஷன் மாடல். அதாவது, உலக அளவிலேயே மிகக் குறைந்த எண்ணிக்கையில், விஐபி வாடிக்கையாளர்களுக்காக மட்டுமே இந்த சென்டினாரியோ மாடல் தயாரிக்கப்பட உள்ளது.

இதன் சர்வதேச விலையை இந்திய ரூபாய்க்கு மாற்றிக் கணக்கிட்டால், ஆரம்ப விலையே சுமார் ரூ. 1.30 கோடியைத் தாண்டும் எனத் தெரிகிறது. இந்தியாவுக்கு இறக்குமதி செய்து, வரிகள் அனைத்தையும் கட்டினால் இதன் ஆன்-ரோடு விலை இன்னும் பல லட்சங்கள் எகிறும் என்று எதிர்பார்க்கப்படுகிறது.