மழையில் தப்பி நெற்பயிர்கள், அதிகாரிகளால் பாழாகும் அவலம்... தீடீரென மூடப்பட்ட கொள்முதல் நிலையங்களால் விவசாயிகள் வேதனை...
மயிலாடுதுறை மாவட்டத்தில் சம்பா சாகுபடி அறுவடை இறுதிக்கட்டத்தை எட்டியுள்ள நிலையில், நேரடி நெல் கொள்முதல் நிலையங்கள் திடீரென மூடப்பட்டு வருவதால் விவசாயிகள் கடும் அதிர்ச்சியடைந்துள்ளனர்.
மயிலாடுதுறை: மயிலாடுதுறை மாவட்டத்தில் சம்பா சாகுபடி அறுவடை இறுதிக்கட்டத்தை எட்டியுள்ள நிலையில், நேரடி நெல் கொள்முதல் நிலையங்கள் திடீரென மூடப்பட்டு வருவதால் விவசாயிகள் கடும் அதிர்ச்சியில் உள்ளனர். குறிப்பாக சீர்காழி அருகே கற்கோயில் பகுதியில் 2500-க்கும் மேற்பட்ட நெல் மூட்டைகள் தேக்கமடைந்துள்ளதோடு, வயலில் உள்ள பயிர்களும் அறுவடை செய்ய முடியாமல் கருகும் அவலநிலை ஏற்பட்டுள்ளது.
தாமதத்திற்கான காரணம்
மயிலாடுதுறை மாவட்டத்தில் இந்த ஆண்டு சுமார் 1 லட்சத்து 70 ஆயிரம் ஏக்கர் பரப்பளவில் சம்பா மற்றும் தாளடி நெல் சாகுபடி செய்யப்பட்டது. விளைந்த நெல்லை விவசாயிகளிடமிருந்து தடையின்றி கொள்முதல் செய்வதற்காக மாவட்டம் முழுவதும் 180-க்கும் மேற்பட்ட நேரடி நெல் கொள்முதல் நிலையங்கள் (DPC) திறக்கப்பட்டன.
பொதுவாக ஜனவரி மற்றும் பிப்ரவரி மாதங்களில் அறுவடை பணிகள் நிறைவடைய வேண்டும். ஆனால், இந்த ஆண்டு பருவமழை எதிர்பாராத விதமாக நீடித்ததால், பல இடங்களில் இளம் பயிர்கள் நீரில் மூழ்கி சேதமடைந்தன. இதனால் விவசாயிகள் பெரும் நஷ்டத்திற்கு இடையே, மீண்டும் மறுசாகுபடி (மறுநாற்று நடுதல்) செய்தனர். இந்த இடர்ப்பாடுகளால் சாகுபடி காலம் தள்ளிப்போனது. இதன் விளைவாக, மாவட்டத்தின் பல்வேறு பகுதிகளில் தற்போதுதான் அறுவடை பணிகள் முழுவீச்சில் நடைபெற்று வருகின்றன.
விவசாயிகள் அதிர்ச்சி
தாமதமான சாகுபடியைக் கணக்கில் கொள்ளாமல், இலக்கு முடிந்துவிட்டதாகக் கூறி கொள்முதல் நிலையங்களை மூடுவதற்கு அதிகாரிகள் உத்தரவிட்டுள்ளனர். இந்த திடீர் நடவடிக்கையால் அறுவடை செய்த நெல்லை விற்க முடியாமல் விவசாயிகள் தவித்து வருகின்றனர்.
பாதிப்புகள்
* மூட்டைகள் தேக்கம்: சீர்காழி அடுத்த கற்கோயில் நேரடி நெல் கொள்முதல் நிலையத்தில் சுமார் 2500 நெல் மூட்டைகள் கொள்முதல் செய்யப்படாமல் தேங்கிக் கிடக்கின்றன.
* எடை குறைவு அபாயம்: நெல் மூட்டைகள் வெட்டவெளியில் அடுக்கி வைக்கப்பட்டுள்ளன. வெயிலின் தாக்கம் காரணமாக நெல்லில் உள்ள ஈரப்பதம் குறைந்து, எடையும் குறையும் அபாயம் உள்ளது. இது விவசாயிகளுக்குப் பெரும் நிதி இழப்பை ஏற்படுத்தும்.
* பதிவு செய்தும் பயன் இல்லை: கிராம நிர்வாக அலுவலரிடம் (VAO) முறையாகப் பதிவு செய்து, வரிசை எண்காகக் காத்திருக்கும் விவசாயிகளுக்கும் தற்போது கொள்முதல் மறுக்கப்படுவது வேதனையை ஏற்படுத்தியுள்ளது.
வயலிலேயே கருகும் நெற்பயிர்கள்
ஒருபுறம் அறுவடை செய்த நெல் கொள்முதல் செய்யப்படாமல் இருக்க, மறுபுறம் கற்கோயில் மற்றும் அதன் சுற்றுவட்டாரப் பகுதிகளில் சுமார் 100 ஏக்கர் பரப்பளவில் அறுவடைக்குத் தயாராக உள்ள நெற்பயிர்கள் வயலிலேயே காய்ந்து வருகின்றன.
"நெல்லை அறுவடை செய்தாலும் கொள்முதல் நிலையங்கள் மூடப்பட்டிருப்பதால் எங்கே கொண்டு செல்வது என்று தெரியவில்லை. அறுவடை செய்யாமல் விட்டால் முற்றிய நெல்மணிகள் தானாகவே வயலில் உதிர்ந்து வீணாகின்றன. முதலீடு செய்த பணத்தைக் கூட எடுக்க முடியுமா என்பது கேள்விக்குறியாக உள்ளது," என அப்பகுதி விவசாயிகள் கண்ணீருடன் தெரிவிக்கின்றனர்.
விவசாயிகளின் கோரிக்கைகள்
பாதிக்கப்பட்ட விவசாயிகள் மாவட்ட நிர்வாகத்திற்கு விடுத்துள்ள கோரிக்கையில்:
*கூடுதல் கால அவகாசம்: மழையால் பாதிக்கப்பட்ட பகுதிகளைக் கணக்கில் கொண்டு, மார்ச் இறுதி வரை கொள்முதல் நிலையங்களைச் செயல்படுத்த வேண்டும்.
* உடனடி கொள்முதல்: கற்கோயில் உள்ளிட்ட இடங்களில் தேங்கியுள்ள 2500 மூட்டைகளை உடனடியாக அரசு கொள்முதல் செய்ய வேண்டும்.
*பாதுகாப்பு வசதி: கொள்முதல் நிலையங்களில் போதிய தார்ப்பாய்கள் மற்றும் பாதுகாப்பு வசதிகளைச் செய்து தர வேண்டும்.
இயற்கை பேரிடர்களையும் தாண்டி கஷ்டப்பட்டு விளைவித்த நெல்லை விற்க முடியாமல் விவசாயிகள் வீதியில் காத்திருப்பது மயிலாடுதுறை மாவட்டத்தில் பெரும் பரபரப்பை ஏற்படுத்தியுள்ளது. "விவசாயிகளின் உழைப்பு வீணாவதை அரசு வேடிக்கை பார்க்கக் கூடாது" என்பதே அனைவரின் எதிர்பார்ப்பாக உள்ளது. மாவட்ட ஆட்சியர் தலையிட்டு உரிய நடவடிக்கை எடுப்பாரா என்பதைப் பொறுத்திருந்துதான் பார்க்க வேண்டும் என சமூக ஆர்வலர்கள் தெரிவித்துள்ளனர்.
தலைப்பு செய்திகள்
ட்ரெண்டிங் செய்திகள்
