TVK MLA vs Cong MP | காங்.MP-தவெக MLA மோதல்! மெழுகுவர்த்தியை தட்டிவிட்ட MLA.. அமைச்சர் முன்பே வாக்குவாதம்

குத்து விளக்கேற்ற தன்னிடம் மெழுகுவர்த்தி கொடுக்காமல் காங்கிரஸ் எம்.பியிடம் கொடுத்ததால் தவெக எம்.எல்.ஏ நவல்பட்டு விஜி கோபப்பட்டு அமைச்சர் ரமேஷ் முன்பே மெழுகுவர்த்தியை தட்டிவிட்டதால் பரபரப்பு ஏற்பட்டது. 

சமூக நலன் மற்றும் மகளிர் உரிமைத்துறை ஒருங்கிணைந்த குழந்தைகள் வளர்ச்சி திட்ட பணிகள் சார்பாக கர்ப்பிணிகளுக்கு சமுதாய வளைகாப்பு விழா இன்று திருச்சி மத்திய பேருந்து நிலையம் அருகே உள்ள கலையரங்கம் மண்டபத்தில் நடைபெற்றது. இதில் இந்து சமய அறநிலைத்துறை அமைச்சர் ரமேஷ் கலந்து கொண்டார். சமுதாய வளைகாப்பு நிகழ்ச்சிகள் தொடக்கமாக குத்துவிளக்கு ஏற்றும் நிகழ்ச்சி நடைபெற்றது. அப்போது முதலில் அமைச்சர் ரமேஷ் குத்துவிளக்கு ஏற்றினார்.

தொடர்ந்து மாவட்ட ஆட்சியர் பிரதிக் தாயள் மணப்பாறை எம்எல்ஏ கதிரவன், முசிறி எம்எல்ஏ விக்னேஷ் ஏற்றினர். அதனை தொடர்ந்து மாநிலங்களவை உறுப்பினர் கிறிஸ்டோபர் திலக்கிடம் குத்துவிளக்கு ஏற்ற மெழுகுவர்த்தியை கொடுத்தனர். அப்போது திருவெறும்பூர் எம்எல்ஏ நவல்பட்டு விஜி நான் ஏற்றுவதற்கு முன்பு எப்படி ஏற்றலாம் என எம்பியுடன் வாக்குவாதத்தில் ஈடுபட்டார். ஆத்திரத்தில் குத்து விளக்கு ஏற்றுவதற்கான மெழுகுவர்த்தியை கீழே தள்ளிவிட்டு வாக்குவாதத்தில் ஈடுபட்டார்.

பின்னர் அமைச்சர் ரமேஷ் மற்றும் அதிகாரிகள் சமாதானம் செய்த பின்பு திருவெறும்பூர் எம்எல்ஏ நவல்பட்டு விஜி குத்து விளக்கேற்றினார். ஆனால் மாநிலங்களவை உறுப்பினர் கிறிஸ்டோபர் திலக் குத்து விளக்கு ஏற்றாமல் நிகழ்ச்சியில் கலந்து கொண்டார். மேடையிலேயே வைத்து காங்கிரஸ் எம்பி மற்றும் தவெக எம் எல் ஏ இடையே நடந்த மோதல் பரபரப்பை கிளப்பியுள்ளது.