Duraimurugan DMK | ”எனக்கு பதவி வேணாம்” ஒதுங்கும் துரைமுருகன்? அடுத்த பொதுச்செயலாளர் யார்?

திமுகவின் மிக முக்கிய பொறுப்பான பொதுச்செயலாளர் பதவியில் இருந்து துரைமுருகன் விலக இருப்பதாக தகவல் வெளியாகியுள்ளது. அடுத்த பொதுச்செயலாளர் ரேஸில் 2 சீனியர்கள் இருக்கும் நிலையில், இளைய தலைமுறையை சேர்ந்த ஒருவருக்கு வாய்ப்பு கொடுக்கலாமா என்றும் ஆலோசனை நடந்து வருவதாக சொல்கின்றனர்.

தமிழக சட்டமன்ற தேர்தலில் வெற்றி பெற்று மீண்டும் 2.o திராவிட மாடல் ஆட்சி அமையும் என திமுகவினர் உறுதியாக நம்பிய நிலையில், திடீர் திருப்பமாக நடிகர் விஜய் தலைமையிலான தவெக வெற்றி பெற்று ஆட்சியை கைப்பற்றியுள்ளது. இந்த நிலையில் தேர்தல் தோல்விக்கான காரணத்தை கண்டறிய திமுக தலைமை குழு அமைத்துள்ளது. இந்த குழு தமிழகம் முழுவதும் சுற்றுப்பயணம் செய்து தோல்விக்கான காரணத்தை கட்சி நிர்வாகிகளிடம் விசாரித்து வருகிறது. 

இந்தநிலையில் திமுகவின் முக்கிய பொறுப்பான பொதுச்செயலாளர் பதவியில் இருந்து துரைமுருகன் விலக இருப்பதாக தகவல் வெளியாகியுள்ளது. தேர்தலுக்கு முன்பாகவே இந்த மாற்றம் நடக்கவிருப்பதாக சொல்லப்பட்ட நிலையில் அந்த முடிவு தள்ளிபோடப்பட்டது. திமுக பொதுச்செயலாளராக இருந்த அன்பழகனின் மறைவிற்கு பிறகு திமுகவின் பொதுச்செயலாளராக கடந்த 2020ஆம் ஆண்டு முதல் துரைமுருகன் செயல்பட்டு வருகிறார். 

2021 தேர்தலில் வெறும் 746 வாக்குகள் வித்தியாசத்திலேயே வெற்றி பெற்ற துரைமுருகன் உடல் நிலை பாதிப்பு காரணமாக இந்த முறை தேர்தலில் போட்டியிட மாட்டார் என தகவல் வெளியான நிலையில், மீண்டும் திமுக தான் ஆட்சிக்கு வரும் அமைச்சரவையில் இடம் பிடித்து விடலாம் என தேர்தல் களத்தில் இறங்கினார். ஆனால் இந்த முறை 3வது இடத்திற்கு துரைமுருகன் தள்ளப்பட்டு தோல்வி அடைந்தார். தற்போது 87 வயதாகும் துரைமுருகன் உடல்நிலை பாதிப்பு காரணமாக திமுக நிகழ்வுகளில் பெரிய அளவில் பங்கேற்காமல் உள்ளார். மேலும் இளைய தலைமுறை தமிழகத்தில் ஆட்சியை பிடித்துள்ள நிலையில், அடுத்த தலைமுறையினருக்கு வழிவிடும் வகையில் பொதுச்செயலாளர் பதவியில் இருந்து விலக இருப்பதாக சொல்கின்றனர். அந்த வகையில் விரைவில் திமுக பொதுக்குழு கூட்டத்தில் தனது முடிவை அறிவிக்கவுள்ளதாக கூறப்படுகிறது.

இந்தநிலையில் திமுகவின் அடுத்த பொதுச்செயலாளர் யார்.? என்ற கேள்வி எழுந்துள்ளது. அந்த வகையில் திமுக பொதுச்செயலாளர் ரேஸில் தற்போது பொருளாளார் பதவியில் உள்ள டி.ஆர். பாலு பெயர் முதல் இடத்தில் உள்ளது. அடுத்தாக திமுக முதன்மை செயலாளராக இருப்பவர் கே.என். நேரு இவரது பெயரும் உள்ளது. ஆனால் இளைஞர்களுக்கு வழிவிடும் வகையில் திமுகவின் இளைய தலைமுறையை சேர்ந்த ஒருவருக்கு வாய்ப்பு அளிக்கப்படலாம் என்றும் சொல்கின்றனர்.