HD Calling, பேட்டரி லைஃப்.. இந்தியாவில் அறிமுகமான நோக்கியாவின் 110 4ஜி மாடல் : ரிவ்யூ எப்படி இருக்கு?

நோக்கியா நிறுவனம் அடிப்படை மொபைல் போன்களில் தங்களது புதிய மாடலான 110 4ஜி என்ற புதிய செல்போன் மாடலை இந்தியாவில் அறிமுகம் செய்தது

நோக்கியா_110_4ஜி

இந்தியாவில் மொபைல்ஃபோன்களை அனைத்து தரப்பினரையும் கொண்டு சேர்த்ததில் நோக்கியா போனின் பங்களிப்பு அதிகம். நோக்கியா மொபைல்ப போன்களை தயாரிக்கும் எச்.எம்.டி. குளோபல் நிறுவனம், புதிய அடிப்படை வசதிகள் கொண்ட 4ஜி மொபைல்களை இந்தியாவில் அறிமுகம் செய்துள்ளது. நோக்கியோ 110 4ஜி என்று பெயரிடப்பட்டுள்ள இந்த மாடலின் விலை ரூபாய் 2 ஆயிரத்து 799 ஆகும்.  ஜூலை 24 முதல் மஞ்சள், ஆக்வா, கருப்பு ஆகிய நிறங்களில் அமேசான் இணையதளத்திலும், நோக்கியாவின் தளத்திலும் இந்த மொபைல்கள் கிடைக்கும்.

எப்.எம். ரேடியோவை ஹெட்செட் இல்லாமல் கேட்கும் வசதி, எம்.பி.3 பிளேயர், 32ஜிபி வரை மெமரி கார்ட் பயன்படுத்தும் வசதி, பிரபலமான ஸ்னேக் விளையாட்டு என பொழுதுபோக்கு அம்சங்கள் இந்த மாடலில் பிரதானமாக இடம்பெற்றுள்ளன.

மேலும், இதன் பிரதான கேமரா 0.8 மெகா பிக்ஸல் அளவில் க்யூவிஜிஏ வடிவில் இடம்பெற்றுள்ளது. வயதானவர்களுக்கு வசதியாக திரையில் தோன்றும் எழுத்துக்களை தானாக படித்து காட்டும் வசதியும் இதில் உள்ளது. பேட்டரி 1020 எம்.ஏ.ஹெச். திறன் கொண்டது. 4ஜி மாடல் என்பதால் அழைப்புகளில் குரல் துல்லியம் அதிகமாக இருக்கும் என்று நோக்கியா தெரிவித்துள்ளது. எங்கள் ரசிகர்கள் விரும்பும், நம்பும், வைத்துக்கொள்ள விரும்பும் மாடலாக இது இருக்கும் என்று எச்.எம்.டி. குளோபல் துணைத்தலைவர் சன்மீத்சிங் கூறியுள்ளார்.