Netflix Lay Off : அடிமேல் அடி.. வருமானம் குறைவு.. பணிநீக்கம் செய்து ஊழியர்களை வீட்டுக்கு அனுப்பிய நெட்பிளிக்ஸ்!

முன்னதாக, 2 லட்சம் வாடிக்கையாளர்களை நெட்ஃபிளிக்ஸ் இழந்ததால் இத்தனை ஆண்டுகள் நடைமுறைப்படுத்தி வந்த சில வழக்கங்களை மாற்ற திட்டமிட்டுள்ளனர்.

நெட்பிளிக்ஸ்

வருவாய் குறைந்து வருவதைக் காரணமாக கூறி 150 ஊழியர்களை பணி நீக்கம் செய்துள்ளது நெட்பிளிக்ஸ்.குறிப்பாக இந்த ஊழியர்கள் அமெரிக்காவைச் சேர்ந்தவர்கள்.

உலக அளவில் மிகவும் பிரபலமான ஸ்ட்ரீமிங் நிறுவனமான நெட்ஃபிளிக்ஸ், பத்தாண்டுகளில் இல்லாத அளவுக்கு தனது வாடிக்கையாளர்களை சமீபத்தில் இழந்தது. இந்தாண்டு நிதியாண்டின் முதல் காலாண்டில், 2 லட்சம் வாடிக்கையாளர்களை நெட்ஃபிளிக்ஸ் இழந்ததால் அதிர்ச்சிக்குள்ளானது அந்நிறுவனம். இதனைக் காரணமாகக் கூறி தற்போது ஊழியர்களை பணி நீக்கம் செய்துள்ளது. இது குறித்து தெரிவித்துள்ள நெட்பிளிக்ஸின் செய்தித்தொடர்பாளர், வருமானக்குறைவுதான் ஊழியர்களின் பணி நீக்கத்துக்கு காரணம் எனக் குறிப்பிட்டுள்ளார்.

முன்னதாக, 2 லட்சம் வாடிக்கையாளர்களை நெட்ஃபிளிக்ஸ் இழந்ததால் இத்தனை ஆண்டுகள் நடைமுறைப்படுத்தி வந்த சில வழக்கங்களை மாற்ற திட்டமிட்டுள்ளனர். அதன்படி, தற்போது நெட்ஃபிளிக்ஸ் ஆப் விளம்பரங்கள் இல்லாமல் திரைப்படங்கள், வெப் சீரிஸ் போன்றவற்றை வழங்கி வருகிறது. இனி விளம்பரங்களை கொடுக்கப்போவதாகவும் அதுவும் இந்த வருடத்தில் கடைசியில் இது நடைமுறைக்கு வரும் எனவும் தகவல் வெளியாகியுள்ளது. 2022, அக்டோபர், நவம்பர், டிசம்பர் மாதங்களில் இந்த நடைமுறை அமலுக்கு வரலாம் எனக் கூறப்படுகிறது. 

இதுவரை அதிகாரபூர்வ அறிவிப்பு வெளியாகவில்லை என்றாலும் இதுதான் திட்டம் என நெட்பிளிக்ஸ் தங்களது ஊழிகர்களிடம் தெரிவித்ததாக தகவல் வெளியாகியுள்ளது. அதேபோல, பாஸ்வேர்டு பகிர்தல் என்ற வசதியையும் விரைவில் கட்டுக்குள் கொண்டு வரப்போவதாக கூறப்படுகிறது. அதாவது, தற்போது ஒருவரிடம் நெட்ஃபிளிக்ஸ் சப்ஸ்கிரிப்சன் இருந்தால், அவருடைய அக்கவுண்டை, மற்ற டிவைஸ்களில், யூசர் ஐடி, பாஸ்வேர்டு கொடுத்து பயன்படுத்தலாம். தற்போது, வாடிக்கையாளர் எண்ணிக்கை குறைந்துள்ளதை அடுத்த, இந்த பாஸ்வேர்டு ஷேரிங் ஆப்சனில் மாற்றம் செய்ய இருப்பதாக நெட்ஃபிளிக்ஸ் தெரிவித்துள்ளது.

இது குறித்து பேசிய நெட்ஃபிளிக்ஸ் இணை நிறுவனர்  ரீட் ஹேஸ்டிங்ஸ்(Reed Hastings), இவ்வளவு காலமாக நெட்ஃபிளிக்ஸில் விளம்பங்கள் கிடையாது; பாஸ்வேர்டு ஷேரிங் ஆப்சன் இருந்தது; இவைகளை பயனாளர்களுக்கு வழங்குவதில் எந்த பிரச்சனையும் இருந்ததில்லை. ஆனால், இனிவரும் காலத்தில் நெட்ஃபிளிக்ஸில் பல மாற்றங்கள் கொண்டுவரப்படும். கடந்த பத்தாண்களில் இல்லாத அளவிற்கு, இந்தாண்டு நிதியாண்டின் முதல் காலாண்டில், 2 லட்சம் வாடிக்கையாளர்களை நெட்ஃபிளிக்ஸ் இழந்துள்ளதால் பல மாற்றங்களை மேற்கொள்ள வேண்டிய அவசியம் ஏற்பட்டுள்ளது. இரண்டாவது காலண்டில் மேலும், 2 மில்லியன் வாடிக்கையாளர்களை இழக்கும் என கணித்துள்ளது என்றார்.