Gautam Gambhir: "எனக்கு அந்த நம்பிக்கை இல்லை.." தோனி குறித்து கம்பீர் சொன்ன அந்த வார்த்தை! ரசிகர்கள் கொடுக்கும் ரியாக்ஷன்!

ஒருவேளை கடைசி ஓவரில் 20 ரன்கள் தேவைப்பட்டாலும் தோனி களத்தில் இருந்தால் நிச்சயம் அப்போட்டியை அவர் வென்றுவிடுவார் என்று கூறியுள்ளார் கம்பீர்.

தோனி - கம்பீர் BCCI/Sportzpics

இந்திய அணிக்கு கிடைத்த மிகப்பெரிய பொக்கிஷம் எம்.எஸ்.தோனி என்று கெளதம் கம்பீர் கூறியுள்ளார்.

ஐ.பி.எல் சீசன் 2024:

விறுவிறுப்புடன் நடைபெற்று வரும் ஐ.பி.எல் சீசன் 17ல் 21 வது லீக் போட்டி இன்று (ஏப்ரல் 8) நடைபெற்று வருகிறது. சென்னை எம்.ஏ.சிதம்பரம் மைதானத்தில் நடைபெற உள்ள இந்த போட்டியில் சென்னை சூப்பர் கிங்ஸ் மற்றும் கொல்கத்தா நைட் ரைடர்ஸ் அணிகள் மோதுகின்றன. இந்த ஐ.பி.எல் சீசனில் சென்னை சூப்பர் கிங்ஸ் அணி தன்னுடைய சொந்த மைதானத்தில் விளையாடிய இரண்டு போட்டிகளிலும் வெற்றி பெற்றது. ஆனால், வெளியில் சென்று விளையாடிய இரண்டு போட்டிகளிலும் தோல்வி அடைந்தது சி.எஸ்.கே. அதேநேரம் கொல்கத்தா நைட் ரைடர்ஸ் அணியோ விளையாடிய மூன்று போட்டிகளிலும் வெற்றி பெற்று இன்றைய போட்டியிலும் வெற்றி பெற வேண்டும் என்ற முனைப்பில் விளையாட உள்ளது.

எனக்கு அந்த நம்பிக்கை இல்லை..

இந்நிலையில் தான் இந்த ஐ.பி.எல் சீசனில் கொல்கத்தா நைட் ரைடர்ஸ் அணியின் ஆலோசகராக செயல்படும் கெளதம் கம்பீர் சென்னை சூப்பர் கிங்ஸ் அணியின் முன்னாள் கேப்டனான எம்.எஸ்.தோனி குறித்து வெளிப்படையாக பேசியுள்ளார். இது தொடர்பாக கெளதம் கம்பீர் பேசுகையில், “இத்தொடரின் அனைத்து போட்டிகளிலும் நாங்கள் வெற்றிபெற வேண்டும் என்பதில் மிகத் தெளிவாக உள்ளோம். அதேசமயம் இந்த போட்டியில் நண்பர்கள், பரஸ்பர மரியாதை என எல்லாமும் நிலைத்து இருக்கும். முன்னதாக நான் கொல்கத்தா நைட் ரைடர்ஸ் அணியின் கேப்டனாக இருந்தேன். அப்போது சென்னை சூப்பர் கிங்ஸ் அணியின் கேப்டனாக எம்.எஸ்.தோனி இருந்தார். எனவே நீங்கள் அவரிடம் கேட்டாலும் இதே பதிலைத்தான் சொல்வார்” என்று கூறினார்.

விட்டுக்கொடுக்க மாட்டேன்:

தொடர்ந்து பேசிய அவர், “எம்.எஸ்.தோனி குறித்து வெளிப்படையாகச் சொல்ல வேண்டும் என்றால் இந்தியாவிற்கு கிடைத்த வெற்றிகரமான கேப்டன் அவர் தான். குறிப்பாக ஐசிசியின் மூன்று கோப்பைகளையும் வென்று தோனியின் இடத்தை மற்றொரு வீரர் பிடிப்பார் என்ற நம்பிக்கை எனக்கு இல்லை. எனவே ஐ.பி.எல் தொடரில் தோனிக்கு எதிராக நாங்கள் விளையாடுவதில் மகிழ்ச்சி அடைகிறேன்” என்றும், ”அவர் பேட்டிங் செய்யும் வரை போட்டியை ஃபினிஷிங் செய்து கொடுப்பார் என்பதை நாம் அனைவரும் அறிவோம். ஒருவேளை கடைசி ஓவரில் 20 ரன்கள் தேவைப்பட்டாலும் தோனி களத்தில் இருந்தால் நிச்சயம் அப்போட்டியை அவர் வென்றுவிடுவார். 

அதே சமயம் சிஎஸ்கே அணியில் இருக்கும் ஒவ்வொரு வீரரையும் அட்டாக் செய்வதற்கான பந்துவீச்சு யுக்திகள் என்னிடம் உள்ளதை நான் அறிவேன். களத்தில் ஆக்ரோஷமாக இல்லாவிட்டாலும் சாமர்த்தியமாக செயல்படக்கூடிய தோனியை விடவும் நீங்கள் சிறந்தவராக இருக்க முயற்சி செய்ய வேண்டும். அவர் எப்போதும் விட்டுக் கொடுக்க மாட்டார். சென்னை சூப்பர் கிங்ஸை எதிர்த்து கடைசி பந்து வீசப்படும் வரை எதிரண வெற்றி பெற போவதில்லை  என்பது உங்களுக்குத் தெரியும். ஏனெனில் அது அப்படிப்பட்ட ஒரு அணி” என்று தெரிவித்துள்ளார்.