PCB: ஒரு காலத்தில் இந்தியாவின் உலகக் கோப்பை பயிற்சியாளர்: இன்று பாகிஸ்தானில் புதிய பொறுப்பு!

டி20 உலகக் கோப்பை தொடர் ஜூன் 1 ஆம் தேதி தொடங்க உள்ளது.

கேரி கிர்ஸ்டன் - ஜேசன் கில்லெஸ்பி

 

பாகிஸ்தான் கிரிக்கெட் அணியின் ஒருநாள், டி20 தலைமை பயிற்சியாளராக கேரி கிர்ஸ்டன் நியமிக்கப்பட்டுள்ளார். டெஸ்ட் அணிக்கு தலைமைப் பயிற்சியாளராக ஜேசன் கில்லெஸ்பி நியமிக்கப்பட்டிருக்கிறார்.

பாகிஸ்தான் கிரிக்கெட் அணியில் பல்வேறு மாற்றங்கள் நடைபெற்று வருகிறது. அண்மையில் கூட பாகிஸ்தான் அணியின் கேப்டனாக இருந்த ஷாஹீன் அப்ரிடி கேப்டன் பொறுப்பை ராஜினாமா செய்தார். பின்னர் டி20 மற்றும் ஒருநாள் போட்டிகளின் கேப்டனாக பாபர் அசாம் நியமிக்கப்பட்டார்.

முன்னதாக கடந்த 2022 ஆம் ஆண்டு நடைபெற்ற டி20 உலகக் கோப்பை தொடரின் போது பாகிஸ்தான் அணி இறுதிப் போட்டிவரை முன்னேறி இருந்ததது. ஆஸ்திரேலியாவில் ந்டைபெற்ற இந்த டி20 உலகக் கோப்பையின் போது பாகிஸ்தான் அணியை கேப்டன் பொறுப்பில் இருந்து வழிநடத்தியவர் பாபர் அசாம்.

இச்சூழலில் தான் வரும் ஜூன் 1 ஆம் தேதி டி20 உலகக் கோப்பை 2024 தொடர் தொடங்க உள்ளது. வெஸ்ட் இண்டீஸ் மற்றும் அமெரிக்காவில் நடைபெறும் இந்த உலகக் கோப்பையிலும் பாபர் அசாம் தலைமையிலான பாகிஸ்தான் அணி களம் இறங்க உள்ளதால் மீண்டும் பாகிஸ்தான் அணி மீதான எதிர்பார்ப்பு அதிகரித்துள்ளது. 

புதிய பயிற்சியாளர்கள்:

இந்நிலையில் பாகிஸ்தான் கிரிக்கெட் அணியின் டி20 மற்றும் ஒருநாள் அணியின் பயிற்சியாளராக கேரி கிர்ஸ்டன் நியமிக்கப்பட்டுள்ளார். தென்னாப்பிரிக்க அணியின் முன்னாள் பேட்டரான இவர் தான் கடந்த 2011 ஆம் ஆண்டு உலகக் கோப்பையை வென்ற இந்திய கிரிக்கெட் அணியின் பயிற்சியாளராக இருந்தார். இச்சூழலில் தான் புதிய பயிற்சியாளராக பாகிஸ்தான் கிரிக்கெட் வாரிய்டம் கேரி கிர்ஸ்டனை நியமித்து இருக்கிறது. 

அதேபோல் பாகிஸ்தான் கிரிக்கெட் அணியின் டெஸ்ட் போட்டிகளுக்கான பயிற்சியாளராக ஸ்திரேலியா முன்னாள் வீரர் ஜேசன் கில்லெஸ்பி நியமனம் செய்யப்பட்டிருக்கிறார். அனைத்து வடிவங்களிலும் உதவி பயிற்சியாளராக அசார் மஹ்மூத்  செயல்படுவார் என்று பாகிஸ்தான் கிரிக்கெட் வாரியம் கூறியுள்ளது.

யார் இந்த கேரி கிர்ஸ்டன்?

56 வயதான தென்னாப்பிரிக்காவின் முன்னாள் டாப்-ஆர்டர் பேட்டர் 1993-2004 வரை 101 டெஸ்ட் மற்றும் 185 ஒருநாள் போட்டிகளில் விளையாடி 34 சதங்களுடன் மொத்தம் 14,087 ரன்கள் குவித்துள்ளார். 

பாகிஸ்தானுக்கு எதிரான 11 டெஸ்ட் போட்டிகளில், 55.86 சராசரியில் 838 ரன்கள் எடுத்தார்; 24 ஒருநாள் போட்டிகளில் 55.47 சராசரியில் 1,054 ரன்கள் எடுத்தார்

1998 ஐசிசி நாக்-அவுட் டிராபியை வென்ற தென்னாப்பிரிக்கா அணியில் உறுப்பினராக இருந்தார் (தற்போது ஐசிசி சாம்பியன்ஸ் டிராபி என அழைக்கப்படுகிறது); 1996 முதல் 2003 வரை மூன்று ஐசிசி ஆண்கள் கிரிக்கெட் உலகக் கோப்பைகளில் விளையாடினார்.

2008-2011 வரை இந்தியாவுக்குப் பயிற்சி அளித்து, ஐசிசி ஆடவர் உலகக் கோப்பை 2011 பட்டத்தையும், ஐசிசி டெஸ்ட் அணி தரவரிசையில் நம்பர் 1 இடத்தையும் பெற உதவியது. 

2011-2013 வரை தென்னாப்பிரிக்கா ஆண்கள் கிரிக்கெட் அணிக்கு பயிற்சி அளித்து, ஐசிசி டெஸ்ட் அணி தரவரிசையில் நம்பர் 1 இடத்திற்கு அவர்களை ஊக்கப்படுத்தினார்.

 

யார் இந்த ஜேசன் கில்லெஸ்பி?

49 வயதான முன்னாள் ஆஸ்திரேலிய வேகப்பந்து வீச்சாளர் 1996-2006 வரை 71 டெஸ்ட், 97 ஒருநாள் மற்றும் 1 டி20 போட்டிகளில் விளையாடி மொத்தம் 402 விக்கெட்டுகளை வீழ்த்தி 1,531 ரன்கள் குவித்துள்ளார். 1997 ஆம் ஆண்டு ஜூலை மாதம் ஹெடிங்லேயில் இங்கிலாந்துக்கு எதிராக 37 ரன்களுக்கு 7 விக்கெட்டுகளை வீழ்த்தியதே ஒரு இன்னிங்ஸில் அவரது சிறந்த பந்துவீச்சாகும், அதே சமயம் ஏப்ரல் 2006 இல் சட்டோகிராமில் வங்காளதேசத்திற்கு எதிராக அவர் ஆட்டமிழக்காமல் 201 ரன்களை எடுத்ததே அவரது டெஸ்ட் சிறந்த ஸ்கோர் ஆகும்.

பாகிஸ்தானுக்கு எதிரான நான்கு டெஸ்ட் போட்டிகளில், அவர் 10 விக்கெட்டுகளை வீழ்த்தினார்; 13 ஒருநாள் போட்டிகளில் 21 விக்கெட்டுகளை வீழ்த்தி இருக்கிறார்.

2003 ஆம் ஆண்டு தென்னாப்பிரிக்காவில் நடைபெற்ற ஐசிசி ஆடவர் உலகக் கோப்பையை வென்ற ஆஸ்திரேலிய அணியில் இடம்பெற்றிருந்தார்.

ECB அங்கீகாரம் பெற்ற லெவல் 4 பயிற்சியாளர், க்ளூசெஸ்டர்ஷைர் பல்கலைக்கழகத்தில் இரண்டு ஆண்டு படிப்பை முடித்தவர்.

2014 மற்றும் 2015 ஆம் ஆண்டுக்கான கவுண்டி சாம்பியன்ஷிப் பட்டங்களுக்கு யார்க்ஷயர் கவுண்டி கிரிக்கெட் கிளப் பயிற்சியளித்தார்.

யார்க்ஷயருடன் இருந்த காலத்தில் இங்கிலாந்து நட்சத்திரங்களான ஜானி பேர்ஸ்டோ, கேரி பேலன்ஸ் மற்றும் ஜோ ரூட் ஆகியோரின் வளர்ச்சிக்கு பெருமை சேர்த்தவர்.

மேலும் 2015-2024 வரை அடிலெய்டு ஸ்ட்ரைக்கர்ஸ் பயிற்சியாளராக இருந்தார், 2017-18 சீசனில் BBL பட்டத்திற்கு வழிநடத்தினார்; 2018-2020 வரை சசெக்ஸ் மற்றும் 2020-2024 வரை தெற்கு ஆஸ்திரேலியாவிற்கு பயிற்சியாளராக இருந்தார்.

2010-2012 வரை ஜிம்பாப்வேயில் பயிற்சியாளராக இருந்தார், மேலும் 2017 இல் பப்புவா நியூ கினியா தேசிய கிரிக்கெட் அணியின் இடைக்கால தலைமை பயிற்சியாளராக இரண்டு மாதங்கள் பணியாற்றினார், அங்கு அவர் ICC T20 உலகக் கோப்பை தகுதிச் சுற்றுக்குத் தயாராக உதவினார்.