Rohit Sharma Test Duck: 2015-க்கு பிறகு டக் அவுட்... ஹிட்மேன் ரோகித் சர்மாவை மிரட்டிய இளம் பந்து வீச்சாளர் ககிசோ ரபாடா!

டெஸ்ட் கிரிக்கெட்டில் 2015க்குப்பின் 8 வருடங்கள் கழித்து டக் அவுட் ஆகியுள்ளார் இந்திய அணியின் கேப்டன் ரோகித் சர்மா.

ரோகித் சர்மா - ககிசோ ரபாடா

இந்தியா - தென்னாப்பிரிக்கா:

தென்னாப்பிரிக்காவில் சுற்றுப்பயணம் மேற்கொண்டுள்ள இந்திய கிரிக்கெட் அணி டி 20 மற்றும் ஒரு நாள் போட்டிகளில் விளையாடி முடித்துள்ளது. தற்போது இரண்டு டெஸ்ட் போட்டிகளை கொண்ட தொடரில் ரோஹித் சர்மா தலைமையிலான இந்திய அணி விளையாடி வருகிறது. 

முன்னதாக, சென்சூரியனில் நடைபெற்று வரும் இந்த டெஸ்ட் தொடரில் முதல் இன்னிங்ஸ் விளையாடி முடிக்கப்பட்டு தற்போது இரண்டாவது இன்னிங்ஸ் விளையாடப்பட்டு வருகிறது. முதல் இன்னிங்ஸில் இந்திய அணி 67.4 ஓவர்களில் அனைத்து விக்கெட்டுகளையும் இழந்து 245 ரன்கள் எடுத்தது.

இதில், இந்திய அணியின் தொடக்க வீரர்கள் யஜஸ்வி ஜெய்ஸ்வால், ரோகித் சர்மா , சுப்மன் கில் ஆகியோர் சொதப்பினாலும்,  அடுத்து வந்த விராட் கோலி, ஸ்ரேயஸ் அய்யர் ஓரளவிற்கு ரன்களை சேர்த்தனர். பின்னர், களமிறங்கிய கே.எல்.ராகுல் சிறப்பாக விளையாடி சதம் அடித்தார். அந்த வகையில்,  137 பந்துகளில் 101 ரன்கள் எடுத்தார்.

அதனைத்தொடர்ந்து விளையாடி வந்த தென்னாப்பிரிக்க அணி அனைத்து விக்கெட்டுகளையும் இழந்து 408 ரன்கள் எடுத்தது. இதில், தொடக்க ஆட்டக்காரராக களமிறக்கிய ஐடன் மார்க்ராம் 5 ரன்களில் நடையைக்கட்டினார். மறுபுறம் பொறுமையாக விளையாடிய டீன் எல்கர் சதம் விளாசினார். 

டக் அவுட்டான ரோகித் சர்மா:

இந்நிலையில், இந்திய அணி தற்போது இரண்டாவது இன்னிங்ஸில் விளையாடி வருகிறது. அதன்படி, முதல் இன்னிங்ஸில் 5 ரன்களில் விக்கெட்டை பறிகொடுத்த இந்திய அணியின் கேப்டன் ரோகித் சர்மா இந்த போட்டியில் நிதனமாக விளையாடி இந்திய அணிக்கு ரன்களை சேர்ப்பார் என்று ரசிகர்கள் எதிர்பார்த்து காத்திருந்தனர்.  ஆனால், ரசிகர்களுக்கு ஏமாற்றம் அளிக்கும் வகையில் தென்னாப்பிரிக்க அணியின் இளம் பந்து வீச்சாளர் ககிசோ ரபாடா வீசிய பந்தில் கிளீன் போல்ட் ஆனார் ரோகித் சர்மா. :

8 வருடங்களுக்கு பிறகு:

குறிப்பாக டெஸ்ட் கிரிக்கெட்டில் 2015-க்குப்பின் 8 வருடங்கள் கழித்து டக் அவுட் ஆகியுள்ளார்.  தென்னாப்பிரிக்க மண்ணில் நடைபெற்ற டெஸ்ட் போட்டிகளில் 14, 6, 0, 25, 11, 10, 10, 47, 5, 0 என வெறும் 128 ரன்களை 12.80 என்ற மோசமான சராசரியில் எடுத்துள்ள அவர் ஒரு முறை கூட அரை சதம் அடித்ததில்லை என்பது குறிப்பிடத்தக்கது.

ரோஹித்தை மிரட்டும் ககிசோ ரபாடா:

அதேநேரம் தென்னாப்பிரிக்க பந்து வீச்சாளர்  ககிசோ ரபாடா மறுபுறம் டெஸ்ட், ஒருநாள், டி20 ஆகிய 3 வகையான கிரிக்கெட்டிலும் ரோகித் சர்மாவை டக் அவுட்டாக்கிய முதல் பந்து வீச்சாளர் என்ற சாதனையை படைத்துள்ளார். அத்துடன் ஏற்கனவே சர்வதேச கிரிக்கெட்டில் ரோகித் சர்மாவை (14) அதிக முறை அவுட்டாக்கிய பந்து வீச்சாளர் என்ற சாதனையும் அவர் படைத்திருப்பது கவனிக்கத்தக்கது.

மேலும் படிக்க: Tamil Thalaivas:எங்கள மன்னிச்சுடுங்க... கண்டிப்பா அது நடக்கும்... நம்பிக்கை அளிக்கும் தமிழ் தலைவாஸ் வீரர்கள்!