ABP கோயில் உலா: பல்வேறு ஆதீனங்கள் கலந்து கொண்டு நடைபெற்ற பஞ்சாக்கை அக்னிபுரீஸ்வரர் கோயில் கும்பாபிஷேக விழா
தரங்கம்பாடி அருகே பஞ்சாக்கை கிராமத்தில் அமைந்துள்ள அக்னிபுரீஸ்வரர் கோயில் கும்பாபிஷேகம் தருமபுரம் ஆதீனம் முன்னிலையில் வெகு விமரிசையாக நடைபெற்றது.
தரங்கம்பாடி அருகே பஞ்சாக்கை கிராமத்தில் அமைந்துள்ள அக்னிபுரீஸ்வரர் கோயில் தருமபுரம் ஆதீனம் முன்னிலையில் வெகு விமரிசையாக நடைபெற்ற கும்பாபிஷேகம் விழாவில் வேளாகுறிச்சி ஆதீனம், நாச்சியார் கோயில் ஆதீனம், சூரியனார் கோயில் ஆதீனம் உள்ளிட்ட ஆதீனங்கள் பங்கேற்று சுவாமி தரிசனம் செய்து வழிபாடு மேற்கொண்டனர்.
கற்பகாம்பிகை சமேத அக்னிபுரீஸ்வரர் திருக்கோயில்
மயிலாடுதுறை மாவட்டம் தரங்கம்பாடி தாலுக்கா திருக்கடையூர் அடுத்த பஞ்சாக்கை கிராமத்தில் பிரசித்தி பெற்ற மிகவும் பழமையான தருமபுரம் ஆதீனத்திற்கு சொந்தமான கற்பகாம்பிகை சமேத அக்னிபுரீஸ்வரர் திருக்கோயில் அமைந்துள்ளது. தேவார நால்வர்களில் ஒருவரான திருநாவுக்கரசரின் வைப்புத்தலமான இக்கோயிலில் தருமபுரம் ஆதீன குருமகா சன்னிதானங்களின் ஜென்ம நட்சத்திர திருநாளில் வழிபாடு செய்யும் சிறப்புக்கு உரியது. கோயிலில் சுவாமி அம்பிகையை வழிபட்டால் தீமைகள், சத்ரு உபாதைகள் நீங்கி சகல ஐஸ்வர்யங்களும், நீண்ட ஆயுளும் கிடைக்கும் என்பது ஐதீகம்.
தருமபுரம் ஆதீனம் 27-வது குருமகா சன்னிதானம் முன்னிலையில் கும்பாபிஷேகம்
இத்தகைய பல்வேறு சிறப்புகள் வாய்ந்த கோயில், கடந்த பல ஆண்டுகளாக சிதிலமடைந்து இருந்தது. இந்நிலையில் தருமபுரம் ஆதீனம் 27-வது குருமகா சன்னிதானம் உத்தரவின் பேரில் கோயில்கள் முழுமையாக திருப்பணி செய்து முடிக்கப்பட்டு, தொடர்ந்து பக்தர்களின் பங்களிப்புடன் கோயில் புனரமைப்பு உள்ளிட்ட திருப்பணிகள் நடைபெற்று வந்தது. பணிகள் அனைத்தும் நிறைவுற்றதை அடுத்து கும்பாபிஷேக விழா வெகு விமரிசையாக நடைபெற்றது.
பூர்வாங்க பூஜைகள்
கும்பாபிஷேகத்தை முன்னிட்டு கடந்த ஜூலை 7-ம் தேதி பூர்வாங்க பூஜைகள், அதனைத் தொடர்ந்து ஜூலை 9-ம் தேதி முதல் கால யாகசாலை பூஜைகள் தொடங்கப்பட்டது. கும்பாபிஷேக தினத்தில் ஆறாம் கால யாகசாலை பூஜைகள் முடிவடைந்து, புரணகஹதி செய்யப்பட்டு, மகா தீபாராதனை காண்பிக்கப்பட்டது. அதனைத் தொடர்ந்து யாகசாலையில் வைத்து பூஜிக்கப்பட்ட புனிதநீர் அடங்கிய கடங்கள் புறப்பாடு செய்யப்பட்டு, மேள தாள மங்கள வாத்தியங்கள் முழங்க சிவாச்சாரியார் புனிதநீர் அடங்கிய கடங்களை தலையில் சுமந்து கோயில் சுற்றி வலம் வந்து கோபுர கலசங்களை அடைந்தனர்.
புனிதநீர் ஊற்றல்
பின்னர் ராஜகோபுரம், விநாயகர், முருகன், சுவாமி, அம்பாள், கொடிமரம், தட்சிணாமூர்த்தி சன்னதிகளை விமான கலசங்களில் வேத விற்பன்னர்கள் வேத மந்திரங்கள் முழங்க தருமபுரம் ஆதீனம் 27 ஆவது குருமகா சன்னிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாச்சாரியார் சுவாமிகள் முன்னிலையில் சிவாச்சாரியார்கள் விமான கலசங்களில் புனித நீரை ஊற்றி கும்பாபிஷேகத்தை நடத்தி வைத்தனர்.
கலந்துகொண்ட ஆதீனங்கள்
அதனை தொடர்ந்து மூலவர்களுக்கு சிறப்பு அபிஷேக ஆராதனைகள் நடைபெற்றது. கும்பாபிஷேகத்தில் சூரியனார் கோயில் சிவாக்கிர யோகிகள், ஆதீனம் 28 வது குருமகாசந்நிதானம் ஸ்ரீலஸ்ரீ மகாலிங்க தேசிக பரமாச்சாரிய சுவாமிகள், வேளாக்குறிச்சி ஆதீனம் 18 -வது குருமகாசந்நிதானம் ஸ்ரீலஸ்ரீ சத்திய ஞான மகாதேவ தேசிக பரமாசாரிய சுவாமிகள், நாச்சியார் கோயில் ஆதீனம் குருமகா சந்நிதானம் ஸ்ரீலஸ்ரீ சிவசுப்ரமணிய தேசிக பரமாச்சாரியார் சுவாமிகள் உள்ளிட்ட திரளான பக்தர்கள் கலந்து கொண்டு தரிசனம் செய்து வழிபட்டனர்.
தலைப்பு செய்திகள்
ட்ரெண்டிங் செய்திகள்
